ត្បូងឃ្មុំ ៖ សហគមន៍កសិកម្មទំនើប ម្រេចមេមត់ត្បូងឃ្មុំ បានធ្វើការចុះកិច្ចសន្យាជាផ្លូវការក្នុងការផ្គត់ផ្គង់ម្រេចខ្មៅដែលមានស្ដង់ដារសុវត្ថិភាពទៅដល់ក្រុមហ៊ុន FUCHS Cambodia ក្នុងបរិមាណ ១០០តោន ក្នុង១ឆ្នាំ ជាមួយតម្លៃថេរ ៧ដុល្លារក្នុង១គីឡូក្រាម ដែលជាតម្លៃល្អលើសពីតម្លៃមធ្យមនៅលើទីផ្សារប្រមាណ ១០ភាគរយ ។

ឯកឧត្តម ឃឹម ហ្វីណង់ អនុរដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ បានឱ្យដឹងថា កិច្ចសន្យាទិញលក់ម្រេចខ្មៅក្នុងទំហំទឹកប្រាក់៧០ម៉ឺនដុល្លារ ត្រូវបានចុះហត្ថលេខាជាផ្លូវការរវាងសហគមន៍កសិកម្មទំនើប ម្រេចមេមត់ត្បូងឃ្មុំ និងក្រុមហ៊ុនFUCHS Cambodia កាលពីថ្ងៃចុងសប្ដាហ៍កន្លងទៅនេះ ដោយមានមន្ត្រីជាន់ខ្ពស់នៃក្រសួងកសិកម្មជាសាក្សី ខណៈដែលសហគមន៍មួយនេះមានលទ្ធភាពអាចផលិតម្រេចបានចន្លោះ​ពី ២៥០តោន ទៅ ៣០០តោនក្នុងឆ្នាំ។ ទន្ទឹមគ្នានេះ ក្រសួងកសិកម្ម ក៏បានតភ្ជាប់ទីផ្សារជាមួយក្រុមហ៊ុនអន្តរជាតិចំនួន ៣ រួចហើយ រួមមាន ក្រុមហ៊ុន Fuchs, ក្រុមហ៊ុន OLAM និងក្រុមហ៊ុន Sela Pepper ដើម្បីរង់ចាំទទួលទិញម្រេចពីសហគមន៍ដោយផ្ទាល់។

សូមជម្រាបថា សហគមន៍កសិកម្មទំនើបថ្មីនេះ មានឈ្មោះថា «សហគមន៍កសិកម្មទំនើបម្រេច មេមត់ត្បូង​ឃ្មុំ» មានដែលមានទីតាំងស្ថិតក្នុងឃុំត្រមូង ស្រុកមេមត់ ខេត្តត្បូងឃ្មុំ មានសមាជិក៦៥គ្រួសារ និងជាមួយផ្ទៃដីផលិតកម្មប្រមាណ១០០ហិកតា ឬប្រហែល១០ម៉ឺនជន្លង់។ សហគមន៍នេះ គឺជាសហគមន៍កសិកម្មទំនើបម្រេចមុនគេដែលត្រូវបានបង្កើតឡើង និងគាំទ្រដោយផ្ទាល់ពីក្រសួងកសិកម្ម រុក្ខាប្រមាញ់ និងនេសាទ។

សហគមន៍កសិកម្មទំនើប​ គឺជាចក្ខុវិស័យនៃការអនុវត្តផលិតកម្មកសិកម្ម រួមគ្នាក្នុងទ្រង់ទ្រាយធំនៅក្នុងវិស័យកសិកម្ម ដែលជាផ្នែកមួយនៃកម្មវិធីគោលនយោបាយអាទិភាពទី៦ របស់រដ្ឋាភិបាលនីតិកាលទី៧ នៃរដ្ឋសភា ដែលចាប់ផ្ដើមដាក់ឱ្យអនុវត្តចាប់តាំងពីឆ្នាំ២០២៣។  បច្ចុប្បន្ន ការបង្កើតសហគមន៍កសិកម្មទំនើប គឺផ្ដល់អាទិភាពសម្រាប់តែដំណាំ ៤ប្រភេទប៉ុណ្ណោះ រួមមាន ស្វាយចន្ទី ស្រូវ ម្រេច និងបន្លែ ដើម្បីប្រែក្លាយវិស័យកសិកម្មកម្ពុជាពីលក្ខណៈគ្រួសារឱ្យទៅជាសហគ្រាសសេដ្ឋកិច្ចកសិកម្មដ៏រឹងមាំ មានសមាហរណកម្មខ្ពស់ មានសេដ្ឋកិច្ចមាត្រដ្ឋាន (Economies of Scale) និងមានសមត្ថភាពប្រកួតប្រជែងទាំងបរិមាណ និងគុណភាព។ 

យោងតាមទិន្នន័យរបស់ក្រសួងកសិកម្ម ឆ្នាំ២០២៤នេះ កម្ពុជាបាននាំចេញម្រេចបានប្រមាណ ៨,៩០០តោនទៅកាន់ទីផ្សារអន្តរជាតិ កើនឡើងជិត២០០ភាគរយ ធៀបនឹងរយៈពេលដូចគ្នាកាលពីឆ្នាំ២០២៣ ដែលមានត្រឹម២,៩៩២តោន។ ម្រេច​កម្ពុជា​មាន​ទីផ្សារ​ទូលំទូលាយ គឺ​មាន​តែ​ម្រេច​កំពត​ដែល​អាច​នាំ​ចេញ​ទៅ​ទីផ្សារ​នៅ​ក្រៅប្រទេស​ ដូច​ជា កូរ៉េ ចិន ជប៉ុន អឺរ៉ុប អា​មេ​រិ​ក ប៉ុន្តែ​ភាគច្រើន​នៃ​ផលិតផល​ម្រេច​នៅ​ខេត្ត​ផ្សេង​ៗ​ដូច​ជា កំពង់ចាម ត្បូងឃ្មុំ និង​ខេត្ត​ភូមិភាគ​ឦសាន្ត​វិញ គឺ​ភាគច្រើននាំ​ចេញ​ទៅ​តែ​វៀតណាម​ប៉ុណ្ណោះ ។

ស្ថិតិ​នៃ​ការ​នាំ​ចេញ ​ដែល​ទទួល​បាន​ពី​អគ្គនាយកដ្ឋាន​គយ និង​រដ្ឋាករ​បានឱ្យដឹង​ថា ក្នុង​ឆ្នាំ​២០២៤ កន្លង​ទៅ​នេះ​ កម្ពុជា​អាច​នាំ​ចេញ​ម្រេច​ ទៅ​កាន់​ប្រទេស​ទីផ្សារ​អន្តរជាតិ​នៅ​ក្នុង​តម្លៃ​សរុប​៣៥,២៧​លាន​ដុល្លារ​កើនឡើង​​ជាង​១៣១​ភាគរយ ធៀប​នឹង​ការ​នាំ​ចេញ​កាលពី​ឆ្នាំ​២០២៣ ដែល​ការ​នាំ​ចេញ​បាន​តម្លៃ​ត្រឹមតែ​១៥,២៣ លាន​ដុល្លារ​ប៉ុណ្ណោះ៕