ភ្នំពេញ ៖ ព្រះរាជាណាចក្រកម្ពុជា នឹងធ្វើជាម្ចាស់ផ្ទះនៃកម្មវិធីវេទិកាជំនួបវិនិយោគកម្ពុជាឆ្នាំ២០២៥ ( Cambodia Investment Matching 2025 ៖CIM 2025) ក្រោមប្រធានបទ « ការជំរុញកំណើនតាមរយៈដៃគូវិនិយោគយុទ្ធសាស្ត្រ (Empowering Growth Through Strategic Investment Partnerships) » នៅ​ដើម​ខែ​មិថុនា​ ឆ្នាំ២០២៥ ក្នុងគោលបំណងភ្ជាប់សហគ្រិនក្នុងស្រុកជាមួយវិនិយោគិនពិភពលោក ជំរុញកំណើនការវិនិយោគលើវិស័យទេសចរណ៍ បង្កើនកំណើនសេដ្ឋកិច្ច និង​បង្កើត​ឱកាសការងារ។

វេទិកាវិនិយោគនេះ គ្រោងធ្វើនៅថ្ងៃទី ២-៣ ខែមិថុនា ឆ្នាំ២០២៥ នៅសណ្ឋាគារសុខាភ្នំពេញ រាជធានីភ្នំពេញ។ ព្រឹត្តិការណ៍នេះមានរយៈពេល២ថ្ងៃ ដែលមានការ​ចូលរួម​​ពីសហគ្រិន​កម្ពុជា​ជាង ១៥០ នាក់ និងក្រុមហ៊ុនវិនិយោគអន្តរជាតិចំនួន ៩០ មកពីទូទាំងអាស៊ី មជ្ឈិមបូព៌ា និងបណ្តាប្រទេសផ្សេងទៀត។ វេទិកានេះរៀបចំឡើងដោយក្រសួងទេសចរណ៍ សហការជាមួយសមាគមទេសចរណ៍អាស៊ីប៉ាស៊ីហ្វិក-កម្ពុជា PATA Cambodia Chapter (PATACC) និងសមាគមអ្នក​វិនិ​យោគ​នវានុវត្តន៍ និងអភិវឌ្ឍន៍ (IDI) និងមានការគាំទ្រពីក្រសួងស្ថាប័នពាក់ព័ន្ធមួយចំនួនទៀត។

ថ្លែងនៅក្នុងសន្និសីទសារព័ត៌មានស្តីពី «ការពង្រឹងកំណើនយុទ្ធសាស្រ្តវិនិយោគតាមរយៈភាពជាដៃគូសហការ» នារសៀលថ្ងៃទី២៤ ខែឧសភា នៅសណ្ឋាគារសុខា លោកបណ្ឌិត ធួន ស៊ីណាន ស្ថាបនិក CIM និងជាប្រធាន PATACC បានមានប្រសាសន៍ថា ៖ វេទិកាជំនួបវិនិយោគកម្ពុជាឆ្នាំ២០២៥ រៀបចំឡើងស្របតាមយុទ្ធសាស្ត្រ​បញ្ចកោណដំណាក់ការទី១ នៃអាណត្តិទី ៧ របស់រាជរដ្ឋាភិបាលកម្ពុជា (២០២៣-២០២៨)។ព្រឹត្តិការណ៍នេះពង្រឹងអាទិភាពជាតិ ដើម្បីធ្វើពិពិធកម្មសេដ្ឋកិច្ច ក៏ដូចជាជំរុញ​កំណើន​វិស័យឯកជន ពង្រីកលទ្ធភាពហិរញ្ញវត្ថុ និងលើកកម្ពស់គោលជំហររបស់​កម្ពុជា​ជាគោលដៅ​ប្រកួត​ប្រជែង​លើការ​វិនិយោគ។

លោកបណ្ឌិត ធួន ស៊ីណាន បានគូសបញ្ជាក់ថា៖

«ព្រឹត្តិការណ៍ CIM ២០២៥ គឺជាកាតាលីករមួយសម្រាប់ការផ្លាស់ប្តូរសេដ្ឋកិច្ច តាមរយៈការភ្ជាប់អាជីវកម្មកម្ពុជាដែល​មានការត្រួតពិនិត្យ​ជាមួយមូលធនអន្តរជាតិ ជាមូលដ្ឋានគ្រឹះសម្រាប់ការបង្កើតឱកាសការងារ ដើម្បីបង្កើនសេដ្ឋកិច្ចរយៈពេលវែងប្រកបដោយនិរន្តរភាព។ គំនិតផ្តួច​ផ្តើម​នេះ​ក៏ជាចំណុចសំខាន់ក្នុងការជំរុញការអភិវឌ្ឍទេសចរណ៍ប្រកបដោយនិរន្តរភាព និងជំរុញរដូវកាលបៃតងរបស់កម្ពុជាប្រែក្លាយទៅជារយៈពេលនៃការវិនិយោគ​ដ៏មានតម្លៃខ្ពស់ និងមានការផ្តល់យុទ្ធសាស្ត្ររបស់អ្នកចូលរួម»។

លោកបណ្ឌិតបានឱ្យដឹងថា៖ គណៈប្រតិភូវិនិយោគិន៥០០នាក់នឹងចូលរួមមកពីប្រមាណ ១០ ប្រទេស រួមមាន ប្រទេសថៃ ម៉ាឡេស៊ី ចិន កូរ៉េ ជប៉ុន ឥណ្ឌា និងម៉ាល់ឌីវ។ល។ វេទិកានេះជាកន្លែងផ្លាស់ប្តូរ ពិភាក្សា និងផ្គូរផ្គងអាជីវកម្ម ។ វេទិកានេះមានព្រឹត្តិការណ៍បណ្តាញ Gala ដែលជាឱកាសសំណេះសំណាល និងពិសាអាហារទំនាក់ទំនងពាណិជ្ជកម្ម។ ជាងនេះទៅទៀតក៏មានផ្តល់ការប្រឹក្សាផ្នែកច្បាប់ និងបទប្បញ្ញត្តិដោយក្រុមប្រឹក្សាអភិវឌ្ឍន៍កម្ពុជា (CDC) ក្រសួងពាណិជ្ជកម្ម និងអ្នកជំនាញផ្នែកច្បាប់ឯកជន។

ស្ថាបនិក CIM និងជាប្រធាន PATACC បានបញ្ជាក់ថា៖ វេទិកាជំនួបវិនិយោគកម្ពុជាឆ្នាំ២០២៥ ផ្តោតទៅលើវិស័យធំៗចំនួន៤គឺ៖

១-ទេសចរណ៍ និងបដិសណ្ឋារកិច្ច ៖ឱកាសវិនិយោគដែលរួចរាល់នៅក្នុងវិស័យរមណីយដ្ឋានកម្រិតខ្ពស់ ក្រុមហ៊ុនដឹកជញ្ជូនទេសចរណ៍ (DMC) ទេសចរណ៍សុខភាព និង SMART Tourism។

២– កសិ-ទេសចរណ៍ (Agri-Tourism ) តាមសហគមន៍ដែលភ្ជាប់ជាមួយកសិកម្មសរីរាង្គ និងការអភិវឌ្ឍន៍ជនបទ។

៣-វិស័យទេសចរណ៍អចលនទ្រព្យ ជាការរួមបញ្ចូលគ្នារវាងអចលនទ្រព្យ និងសណ្ឋាគារ ដើម្បីការអភិវឌ្ឍតំបន់ប្រកបដោយនិរន្តរភាព។

៤-បច្ចេកវិទ្យា និងការច្នៃប្រឌិត ទាក់ទងនឹងការចាប់ផ្តើមអាជីវកម្ម Fintech, E-commerce, និងសេវាកម្មឌីជីថល ដែលរួមចំណែកដល់វិស័យអេកូទេសចរណ៍។

លោកបណ្ឌិត ធួន ស៊ីណាន បានបន្ថែមថា៖

«វេទិកានេះ មិនត្រឹមតែតភ្ជាប់វិនិយោគិនក្នុងស្រុក និងអ្នកដាក់​ទុនមកពីក្រៅស្រុកទេ ប៉ុន្តែអ្នកដែលនៅក្នុងស្រុកក៏មានឱកាសក្នុងការ​ចាប់ដៃគូដែលជាលំ​ហូរនៃ​ការធ្វើពាណិជ្ជកម្ម ជាវេទិកាមួយ​មិនត្រឹមតែ​យើង​ណាត់​ឱ្យ​ជួបរវាង​អ្នករកស៊ីក្នុងស្រុក និងអ្នក​នៅ​ក្រៅប្រទេសនោះទេ CIM មានការសម្រប​សម្រួល​តាមផ្លូវច្បាប់ធ្វើម៉េចឱ្យជាក់ច្បាស់​នូវទុនដែល​អ្នក​​វិនិយោគដាក់មកឱ្យស្របតាមផែនការ»។

 ឯកឧត្តម នី ផល្លី រដ្ឋលេខាធិការក្រសួងទេសចរណ៍ បានមានប្រសាសន៍ថា ៖ CIM គឺជាយន្តការមួយពិសេស ដែលអាចធ្វើការណាត់ជួបគ្នារវាងអ្នកវិនិយោគនៅក្នុងវិស័យទេសចរណ៍ ដែលជាថ្នាលមួយក្នុងការបំពេញបន្ថែម ដើម្បីពង្រឹង​ក្នុងខ្សែច្រវាក់ផលិតកម្មវិស័យទេសចរណ៍ឱ្យមានភាពរឹងមាំជាងមុន។

ឯកឧត្តមរដ្ឋលេខាធិការ បានលើកឡើងថា៖

«វេទិកាជំនួបវិនិយោគកម្ពុជា គឺជាថ្នាល(Platform)មួយល្អពិសេស ដែលអាចជាកន្លែងមួយដើម្បីណាត់ជួបរវាងអ្នកវិនិយោគ អ្នកដែលមានធនធាន ទាំងនៅក្នុងស្រុក និងបរទេស ​ជួបជាមួយនឹងអ្នកវិនិយោគក្នុងស្រុក ឬអ្នកដែលមានគម្រោងស្វែងរកដៃគូអាជីវកម្មលើវិស័យទេសចរណ៍។ វេទិកានេះ ជាការបំពេញបន្ថែមពង្រឹងខ្សែចង្វាក់ផលិតកម្មក្នុងវិស័យទេសចរណ៍ឱ្យមានភាពរឹងមាំជាងមុន»។

លោក ចាប សុគ័គ អគ្គលេខាធិការសមាគម IDI បានមានប្រសាសន៍ថា ៖ ជំនួបវិនិយោគកម្ពុជានេះ នឹងជំរុញឱ្យសហគ្រិនខ្មែររួមគ្នាបង្កើននូវដៃគូវិនិយោគយុទ្ធសាស្ត្រ​នៅក្នុងវិស័យសំខាន់ៗ ដូចជាវិស័យទេសចរណ៍ កសិ-ទេសចរណ៍ បដិសណ្ឋារកិច្ច និងទេសចរណ៍អចលនទ្រព្យ ជាដើម ហើយក៏ជាយន្ត​ការអនុវត្តពិសេសមួយរបស់កម្ពុជា សម្រាប់ភ្ជាប់សហគ្រាសជាតិដែលមានលក្ខណសម្បត្តិគ្រប់គ្រាន់ជាមួយវិនិយោគិនដែលមានបទពិសោធន៍ និងគុណវុឌ្ឍិ តាមរយៈគំរូអាជីវកម្មដែលមានរចនាសម្ព័ន្ធ ច្បាស់លាស់ តម្លាភាព និងផ្តោតលើលទ្ធផល៕ ដោយៈញ៉ែម សុផល