មជ្ឈមណ្ឌលអង្គរសម្រាប់ការអភិរក្សជីវៈចម្រុះ (ACCB) ជាកន្លែងទេសចរណ៍មួយក្នុងចំណោមកន្លែងទេសចរណ៍ដទៃទៀតក្នុងខេត្តសៀមរាប ដែលបើកទទួលភ្ញៀវទេសចរជាតិ និងអន្តរជាតិឲ្យចូលទស្សនាប្រភេទសត្វដែលត្រូវបានអភិរក្សនៅក្នុងមជ្ឈមណ្ឌលអង្គរសម្រាប់អភិរក្សជីវៈចម្រុះនេះ។

បើតាមប្រសាសន៍លោក ជិម សុភាព ប្រធានផ្នែកអប់រំផ្សព្វផ្សាយមជ្ឈមណ្ឌលអង្គរសម្រាប់ការអភិរក្សជីវៈចម្រុះ (ACCB) បានឲ្យដឹងក្នុងឱកាសប្រារព្ធយុទ្ធនាការអន្ទាក់សូន្យដំណាក់កាលទី២ នៅក្នុងខេត្តសៀមរាបកាលពីពេលកន្លងទៅថា សម្រាប់ភ្ញៀវជាតិ និងអន្តរជាតិអាចអញ្ជើញមកទស្សនាប្រភេទសត្វនៅក្នុងមជ្ឈមណ្ឌលអង្គរសម្រាប់ការអភិរក្សជីវៈចម្រុះរៀងរាល់ថ្ងៃ ចាប់ពីថ្ងៃច័ន្ទ ដល់ថ្ងៃអាទិត្យ។ សម្រាប់ការចូលទស្សនាទូទៅភ្ញៀវទេសចជាតិពុំមានការគិតថ្លៃនោះទេ ហើយសម្រាប់ការទស្សនាគឺមានរយៈពេលមួយម៉ោងកន្លះ ដែលមានពីរវេន គឺ ពេលព្រឹក និងពេលរសៀល លើសពីនេះក៏មានបើកទទួលភ្ញៀវជាលក្ខណៈឯកជនផងដែរ។

លោក ជិម សុភាព ក៏បានបញ្ជាក់ដែរថា ៖

“បច្ចុប្បន្ននេះ មជ្ឈមណ្ឌលអង្គរសម្រាប់ការអភិរក្សជីវៈចម្រុះ (ACCB) មានប្រភេទសត្វ៣០ប្រភេទ ដែលកំពុងទទួលបានការមើលថែទាំ អភិរក្ស ជាពិសេសប្រភេទសត្វជិតផុតពូជ ដូចជា ប្រភេទសត្វ ក្រៀល សត្វខ្សឹប ត្រយងចង្គំក​ស និងដណ្ដើកហ្វួង  ដែលជាប្រភេទសត្វដែលបង្កាត់ពូជជោគជ័យ ដែលមានបង្ហាញបង្អួតខ្លួនយ៉ាងប្រិមប្រិយ៍សម្រាប់ភ្ញៀវទេសចរគយគន់ទស្សនា។”

ឯកឧត្តម នេត្រ ភក្ក្រា បានមានប្រសាសន៍ថា ៖

“មជ្ឈមណ្ឌលអង្គរសម្រាប់ការអភិរក្សជីវៈចម្រុះ (ACCB) ពិតជាដើរតួនាទីសំខាន់ ហើយក្នុងនាមក្រសួងបរិស្ថានសូមថ្លែងអំណរគុណចំពោះមន្ត្រីដែលបំរើការងារក៏ដូចជាម្ចាស់ជំនួយដែលគាំទ្រទៅលើសកម្មភាព និងអង្គការដៃគូដែលបានសហការជាមួយមជ្ឈមណ្ឌលជាមួយក្រសួងបរិស្ថានក្នុងការធ្វើឲ្យមាននិរត្តន៍ភាពប្រភេទជីវៈចម្រុះ ជាពិសេសប្រភេទសត្វព្រៃកម្រៗ។”

ឯកឧត្តមបានបញ្ជាក់ថា ៖

“ការបង្កើតមជ្ឈមណ្ឌលដើម្បីបង្កាត់ពូជនេះជាកិច្ចខិតខំប្រឹងប្រែងរួមមួយរបស់អ្នកអភិរក្សដើម្បីធ្វើឲ្យសត្វកម្រៗនេះបន្តមានវត្តមាននៅក្នុងប្រទេសកម្ពុជាក៏ដូចជាពិភពលោក ហើយកម្ពុជាក៏ចង់ឃើញការចូលរួមរបស់អង្គការដៃគូរផ្សេងទៀតចូលរួមឲ្យកាន់តែសកម្មក្នុងការងារការពារ និងអភិរក្សធនធានធម្មជាតិតាមរយៈការពង្រឹងនូវការការពារ និងអភិរក្សជាមួយក្រសួង ហើយអប់រំផ្សព្វផ្សាយដើម្បីឲ្យប្រជាពលរដ្ឋបានយល់ និងការផ្តល់បច្ចេសទេសថ្មីៗពីបណ្ដាប្រទេសផ្សេងៗដែលធ្វើជោគជ័យយកចូលមកកាន់កម្ពុជារបស់ដើម្បីបង្កាត់ប្រភេទពូជកម្រឲ្យបានជោគជ័យ បង្កើនចំនួនឲ្យកាន់តែច្រើនឡើងបន្ថែមទៀត។”

គួរបញ្ជាក់ផងថា ៖ មជ្ឈមណ្ឌលអង្គរសម្រាប់ការអភិរក្សជីវៈចម្រុះ (ACCB) ត្រូវបានបង្កើតឡើងតាំងពីឆ្នាំ២០០៣ មកម្ល៉េះ ហើយគិតត្រឹមខែឧសភា ឆ្នាំ២០២៣នេះ ចំនួនភ្ញៀវទេសចរណ៍ ដែលបានអញ្ជើញមកទស្សនាចំនួនសរុប ២៣៩២នាក់ ដោយក្នុងនោះភ្ញៀវជាតិមានចំនួន ១៧១៩នាក់ និងអន្តរជាតិមានចំនួន ៦៧២នាក់៕