សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ សម្រាប់ឆ្នាំ២០២៦នេះ ក្រសួងទេសចរណ៍បានព្យាករណ៍ពីកំណើនវិស័យទេសចរណ៍ ដោយគ្រោងទទួលបានភ្ញៀវទេសចរអន្តរជាតិចន្លោះពីប្រមាណ ៥,៦លាននាក់ ដល់ ៥,៨លាននាក់ ប៉ុន្តែតួលេខនេះអាចនឹងមានការប្រែប្រួល ដោយសារឥទ្ធិពលនៃភ្លើងសង្គ្រាមនៅមជ្ឈិមបូព៌ា។ នេះបើតាមការលើកឡើងស្រដៀងៗគ្នារវាងមន្រ្តីផ្លូវការក្រសួងទេសចរណ៍ និងអ្នកជំនាញក្នុងវិស័យទេសចរណ៍ ថ្លែងប្រាប់ៗបណ្តាញសារព័ត៌មាន AMS នៅថ្ងៃទី២០ ខែមីនា ឆ្នាំ២០២៦ នេះ ។
លោកជំទាវ ហ៊ុន ដានី អ្នកនាំពាក្យក្រសួងទេសចរណ៍បានមានប្រសាសន៍ថា ការព្យាករណ៍ដែលធ្វើឡើងតាំងពីខែកុម្ភៈ ឆ្នាំ២០២៦កន្លងទៅ ពោលគឺនៅមុនពេលកើតមានសង្គ្រាមមជ្ឈិមបូព៌ា រវាងប្រទេសអ៊ីស្រាអែល សហការជាមួយអាម៉េរិក វាយប្រហារទៅលើប្រទេសអ៊ីរ៉ង់ ដែលជះឥទ្ធិពលមិនល្អដល់វិស័យទេសចរណ៍នៅលើសកលលោក រួមទាំងកម្ពុជាផងដែរ។
លោកជំទាវបានបញ្ជាក់ថា ៖
«ពាក់ព័ន្ធនឹងការព្យាករណ៍នេះ វាស្ថិតនៅក្នុងបរិបទមុនគ្រា ប៉ុន្តែឥឡូវសភាពការណ៍ និងស្ថានភាពសកលវាមានការប្រែប្រួល ចឹងទេ ការព្យាករណ៍ក៏អាចនឹងប្រែប្រួលដែរ មានន័យថា អ្វីៗគ្រប់យ៉ាងវាស្ថិតនៅក្នុងភាពមិនប្រាកដប្រជា»។
ទោះយ៉ាងណា ថ្នាក់ដឹកនាំក៏ដូចជាមន្រ្តីក្រោមឱវាទនៃក្រសួងទេសចរណ៍ បាន និងកំពុងខិតខំប្រឹងប្រែងយ៉ាងសកម្ម ធ្វើយ៉ាងណាពង្រឹងនូវភាពធន់ ក៍ដូចជាការបង្កើតឱ្យមានភាពសំបូរបែបនៃផលិតផលទេសចរណ៍ សំដៅទាក់ទាញភ្ញៀវទេសចរជាតិ អន្តរជាតិ ក៏ដូចជាភ្ញៀវទេសចរដែលមានស្រាប់នៅក្នុងស្រុក ដើម្បីឱ្យពួកគេធ្វើដំណើរកម្សាន្តទៅតាមគោលដៅទេសចរណ៍នានានៅទូទាំងប្រទេស។
លោកបណ្ឌិត ធួន ស៊ីណាន ប្រធានសមាគមទេសចរណ៍អាស៊ីប៉ាស៊ីហ្វិកកម្ពុជា(PATA) បានទទួលស្គាល់ថា បញ្ហាភូមិសាស្រ្តនយោបាយដែលកំពុងកើតមានឡើងយ៉ាងក្តៅគគុកនេះ អាចធ្វើឱ្យអ្វីៗគ្រប់យ៉ាងមានការប្រែប្រួលគ្រប់ពេលវេលា ដោយមិនមានអ្នកណាម្នាក់ប៉ាន់ស្មានដឹងឡើយថា នៅពេលខាមុខដ៏ខ្លីនេះនឹងមានអ្វីកើតឡើងឱ្យប្រាកដ។
លោកថា ការព្យាករណ៍របស់ក្រសួង ធ្វើឡើងនៅមុនពេលសង្គ្រាមនៅអ៊ីរ៉ង់ផ្ទុះ ដូច្នេះចំនួនភ្ញៀវទេសចរជាតិ-អន្តរជាតិអាចនឹងមានការប្រែប្រួលដោយជៀសមិនផុតនោះឡើ។
លោកបណ្ឌិតបញ្ជាក់ថា ៖
«ទាំងអស់ហ្នុង ការព្យាករណ៍របស់ក្រសួង គឺព្យាករណ៍មុនពេលដែលវាកើតរឿងឡើង (សង្ក្រាមអ៊ីរ៉ង) ក៍ប៉ុន្តែអ្វីដែលយើងត្រូវចាំផងដែរនោះថា បញ្ហា Scam នៅស្រុកខ្មែរនេះ នៅតែជាស្រមោលអន្ទោលតាមប្រាណ»។
យ៉ាងណាក៏ដោយ ដើម្បីជំនួសផលប៉ះពាល់នេះ រាជរដ្ឋាភិបាលកម្ពុជាបានសហការជាមួយវិស័យឯកជន ធ្វើយ៉ាងណាអាចទាក់ទាញភ្ញៀវទេសចរអ៊ឺរ៉ុប និងភ្ញៀវអន្តរជាតិផ្សេងទៀត ដែលកំពុងស្នាក់នៅមជ្ឈិមបូព៌ារយៈពេលវែង និងស្នាក់នៅអចិន្រ្តៃយ៍ ដើម្បីឱ្យពួកគេបង្វែគោលដៅមកស្នាក់នៅក្នុងប្រទេសកម្ពុជាជំនួសវិញ។
បើតាមក្រសួងទេសចរណ៍ នៅក្នុងឆ្នាំ២០២៥ កម្ពុជាទទួលបានភ្ញៀវទេសចរអន្តរជាតិប្រមាណ ៥,៥៧លាននាក់ ធ្លាក់ចុះ ១៦% ធៀបនឹងឆ្នាំ២០២៤ ហើយទេសចរជាតិមានប្រមាណ ២៥លាននាក់ ខណៈចំណូលពីវិស័យនេះទទួលបានប្រមាណ ៣,៧ពាន់លានដុល្លារ កើនឡើង ៣% ៕
Account
Security
Favourite Content