សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ក្រចេះ ៖ ជារៀងរាល់ឆ្នាំ កម្ពុជា តែងរៀបចំពិធីបុណ្យទន្លេ ឬហៅជាភាសាអង់គ្លេសថា (River Festival) គឺជាព្រឹត្តិការណ៍វប្បធម៌ និងទេសចរណ៍ដ៏សំខាន់មួយ ដើម្បីអបអរសាទរ និងបង្ហាញតម្លៃនៃទន្លេនៅកម្ពុជា ដូចជា ទន្លេមេគង្គ ទន្លេសាប និងទន្លេបាសាក់។ ជាមួយនឹងព្រឹត្តិការណ៍ប្រចាំឆ្នាំលើកទី១០ ដែលប្រព្រឹត្តទៅនៅខេត្តក្រចេះ រយៈពេល៣ថ្ងៃ ចាប់ពីថ្ងៃទី២៧-២៩ ខែមីនា ឆ្នាំ២០២៦ ក្រោមប្រធានបទ «ទន្លេបៃតង បេតិកភណ្ឌវប្បធម៌ និងធម្មជាតិមហាសាល» អ្នកជំនាញក្នុងវិស័យទេសចរណ៍រំពឹងថា នឹងអាចទាក់ទាញភ្ញៀវជាតិ និងអន្តរជាតិចូលទស្សនាកម្សាន្ត និងស្វែងយល់ពីសកម្មភាពវិនិយោគខេត្តក្រចេះ បានច្រើនកុះករ។
លោកបណ្ឌិត ធួន ស៊ីណាន ប្រធានសមាគមទេសចរណ៍អាស៊ីបាស៊ីហ្វិក(PATA) បានលើកឡើងថា ពិធីបុណ្យទន្លេខេត្តក្រចេះក្នុងឆ្នាំនេះ មិនត្រឹមតែអាចទាក់ទាញទេសចរចូលទស្សនាកម្សាន្ត អំពីសក្តានុពលទេសចរណ៍ក្នុងខេត្តក្រចេះប៉ុណ្ណោះទេ ពោល គឺថែមទាំងផ្តល់ឱកាសដល់អ្នកទេសចរស្វែងយល់ពីសក្តានុពលវិនិយោគ និងសកម្មភាពផ្លាស់ប្តូរពាណិជ្ជកម្ម ជំរុញដល់កំណើនសេដ្ឋកិច្ចក្នុងតំបន់ថែមទៀតផង។
លោកបណ្ឌិតបានបញ្ជាក់ ៖
« ដូចបងប្អូនធ្លាប់ដឹងហើយ បុណ្យទន្លេជា Platform មួយផ្តល់ឱកាសឱ្យអ្នកទេសចរចូលទស្សនា កម្សាន្ត និងជួបប្រាស្រ័យទាក់ទងគ្នាក្នុងការវិនិយោគនៅក្នុងមូលដ្ឋានមួយៗ ហើយក៍ជាសកម្មភាពមួយធ្វើឱ្យចំរើនឡើងនៃសេដ្ឋកិច្ចនៅក្នុងមូលដ្ឋានផងងដែរ »។
ឯកឧត្តម ហួត ហាក់ រដ្ឋមន្រ្តីក្រសួងទេសចរណ៍ បានមានប្រសាសន៍ថា ព្រឹត្តិការណ៍នៃពិធីបុណ្យទន្លេខាងមុខនេះ និងមានភ្ញៀវទេសចរជាតិ និងអន្តរជាតិ ចូលរួមកម្សាន្តជាមួយសកម្មភាពជាច្រើន ដូចជាការតាំងពិព័រណ៍ផលិតផលក្នុងស្រុក ការសម្តែងសិល្បៈវប្បធម៌ប្រពៃណី កីឡា និងកម្មវិធីកម្សាន្តជាច្រើនទៀត ពោលគឺជាវេទិកាសំខាន់សម្រាប់ផ្សព្វផ្សាយសម្រស់ទេសភាព និងសក្តានុពលទេសចរណ៍របស់ខេត្តក្រចេះឱ្យកាន់តែទូលំទូលាយ។
ឯកឧត្តមបញ្ជាក់ដូច្នេះថា ៖
«បុណ្យទន្លេគឺជាព្រឹត្តិការណ៍ទេសចរណ៍ដ៏សំខាន់មួយសម្រាប់កម្ពុជា ដែលមិនត្រឹមតែរួមចំណែកក្នុងការផ្សព្វផ្សាយពីសក្តានុពលទេសចរណ៍នៃខេត្តជាប់ដងទន្លេប៉ុណ្ណោះទេ ប៉ុន្តែថែមទាំងចូលរួមគាំទ្រគោលនយោបាយរបស់រាជរដ្ឋាភិបាល ក្នុងការយកចិត្តទុកដាក់អភិវឌ្ឍតំបន់តាមដងទន្លេ ប្រកបដោយនិរន្តរភាព និងការទទួលខុសត្រូវ»។
គួរបញ្ជាក់ថា បុណ្យទន្លេមិនត្រឹមតែជាព្រឹត្តិការណ៍សម្រាប់ខេត្តជាម្ចាស់ផ្ទះប៉ុណ្ណោះទេ ប៉ុន្តែបានផ្តល់នូវអត្ថប្រយោជន៍ច្រើន ដូចជា បង្ហាញពីសាមគ្គីភាពរឹងមាំគ្រប់តួអង្គពាក់ព័ន្ធ តាម “អភិក្រមជវភាពនៃប្រព័ន្ធតួអង្គតែមួយ” ជំរុញការអភិវឌ្ឍ និងកំណើនសេដ្ឋកិច្ច លើកកម្ពស់ការអភិវឌ្ឍបៃតង លើកកម្ពស់ការអប់រំ ការយល់ដឹង និងលើកកម្ពស់វិស័យទេសចរណ៍ដ៏ប្រសើរ៕
Account
Security
Favourite Content