តាខ្មៅ ៖ ជារឿយៗគេតែងឮពាក្យនិយាយចំអែរចំអន់គ្នាថា «ល្អមើល តែមិនល្អស៊ី ឬល្អស៊ី តែមិនល្អមើល» ដែលអាចជាភាសារនិយាយលេងសើច ប៉ុន្តែមានពេលខ្លះវាក៏បានបញ្ជាក់ទិដ្ឋភាពពិតនៃជីវិតរស់នៅប្រចាំថ្ងៃដែរ។ តួយ៉ាងដូចជាគ្រួសារប្តីប្រពន្ឋមួយ គ្រាន់តែលក់ផាក់ឡូវមួយទូនៅមុខផ្ទះ ក៏អាចរកចំណូលបានក្បែរពាន់ដុល្លារក្នុងមួយខែៗ មិនចាញ់អ្នកធ្វើការនៅក្នុងការិយាល័យមានម៉ាស៊ីនត្រជាក់នោះទេ។

លោក យឹម យ៉ាត ជាអាជីវករលក់ផាក់ឡូវមួយកន្លែង ដែលមានយីហោហៅក្រៅថា «ផាក់ឡូវពូយ៉ាត» នៅម្តុំវត្តឈូងលាភ សង្កាត់រការខ្ពស់ ក្រុងតាខ្មៅ ខេត្តកណ្តាល បានឱ្យដឹងថា គ្រួសាររបស់លោកបានចាប់ផ្តើមអាជីវកម្មលក់ផាក់ឡូវនេះមានរយៈពេលប្រមាណជា ៣ឆ្នាំមកហើយ ដែលកាលពីដើមឡើយលក់មិនសូវបានច្រើនទេ ប៉ុន្តែក្រោយពេលឆ្លងផុតដំណាក់កាលកូវីដ-១៩ រហូតមកដល់ពេលបច្ចុប្បន្ន អាជីវកម្មប្រចាំគ្រួសារមួយនេះមានអតិថិជនគាំទ្រច្រើន ក្រោមគោលការណ៍ រក្សាបានរសជាតិឆ្ងាញ់ មានអនាម័យខ្ពស់ និងតម្លៃសមរម្យ។

លោក យឹម យ៉ាត បានរំលឹកឱ្យដឹងថា កាលពីដើមឡើយលោកគ្រាន់តែជាចុងភៅតាមរោងការ ឬចុងភៅសម្រាប់ធ្វើម្ហូបក្នុងពិធីបុណ្យទានប៉ុណ្ណោះ ប៉ុន្តែស្របដែលវិស័យនេះហាក់មានការធ្លាក់ចុះមិនសូវកាក់កប លោក និងគ្រួសារបានពិភាក្សាគ្នាចង់ធ្វើអ្វីមួយដើម្បីរកចំណូលផ្គត់ផ្គង់គ្រួសារ ហើយក៏នឹកឃើញគំនិតច្នៃធ្វើផាក់ឡូវលក់នេះតែម្ដង។

ជាមួយនឹងជំនាញផ្នែកចម្អិនម្ហូបអាហារជាច្រើនឆ្នាំ ទាំងការចម្អិន ទាំងការផ្សំគ្រឿងរសជាតិ សាច់ផាក់ឡូវ ក៏ដូចជាសាច់ខ្វៃរបស់ លោក យឹម យ៉ាត មានភាពទាក់ទាញខុសពីសច់ផាក់ឡូវដទៃនៅក្នុងតំបន់ ដែលកាន់តែទាក់ទាញអតិថិជនបានច្រើន និកើនឡើងជារៀងរាល់ថ្ងៃ។ ជាក់ស្ដែង ការលក់ប្រចាំថ្ងៃ យ៉ាងហោចណាស់អាចលក់បានសាច់ចម្រុះសរុបប្រមាណជាង ៣០គីឡូសាច់ស្រស់ ដែលអាចរកប្រាក់ចំណេញបានន្លោះពី ១២ម៉ឺនរៀលទៅដល់១៥ម៉ឺនរៀលជាប្រចាំ ពិសេសនៅរៀងរាល់ថ្ងៃសៅរ-អាទិត្យ ថ្ងៃបុណ្យទាន ឬថ្ងៃកម្មករបើកប្រាក់ខែជាដើម ដែលអាចលក់ដាច់រហូតដល់៤០គីឡូក្រាម។

បើតាមការលើកឡើងខាងលើនេះ ក្នុងមួយថ្ងៃអ្នកលក់ផាក់លូវរូបនេះអាចទទួលបានប្រាក់ចំណេញចន្លោះពី ១២ ទៅ ១៥ ម៉ឺន ឬគិតជាលុយដុល្លារជាមធ្យមអាចទទួលបានប្រមាណ ៣០ដុល្លារ ដូច្នេះ មួយខែមានរយៈពេល៣០ថ្ងៃ​ លោកអាចរកចំណូលបានប្រមាណជា ៩០០ដុល្លារឯណោះ ដែលអាចចាត់ទុកថាមានចំណូលខ្ពស់រួចទៅហើតបើធៀបនឹងអ្នកធ្វើការរោងចក្រ ឬអ្នកធ្វើការនៅការិយាល័យមួយចំនួន។

សូមជម្រាប់ដែរថា ក្នុងចំណោមសាច់ជ្រូក និងសាច់ទាស្រស់សរុបប្រមាណជា ៣០គីឡូក្រាមនេះ លោកធ្វើបានផាក់ឡូវ ៣ រសជាតិ មានដូចជា គ្រឿងក្នុងជ្រូកផាក់ឡូវ សាច់ទាខ្វៃតៃវ៉ាន់ និងសាច់ជ្រួក ៣ជាន់ខ្វៃ គួបផ្សំបន្លែស្រស់ល្អ ទឹកជ្រលក់មានរសជាតិឆ្ងាញ់ ជារៀងរាល់ថ្ងៃ ពូយ៉ាត លក់ផាក់ឡូវមិនដែលសល់នោះទេ។ ដោយឡែក សម្រាប់អ្នកដែលមានចំណាប់អារម្មណ៍ចង់ចេះជំនាញចម្អិនសាច់ផាក់ឡូវនេះ លោក យឹម យ៉ាត ក៏មានទទួលបង្រៀនដោយផ្ទាល់ផងដែរ៕ វិន ឈុនហ៊ាត