សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ៖ របាយការណ៍របស់អគ្គនាយកដ្ឋានគយ និងរដ្ឋាករកម្ពុជា បានឱ្យដឹងថា ក្នុងរយៈពេល១១ខែ ឆ្នាំ២០២៥ កម្ពុជាសម្រេចបានការនាំចេញសំបកកង់រថយន្ដក្នុងទំហំទឹកប្រាក់ ១ ២១៩លានដុល្លារ កើនឡើង៥៧.៨៨% បើធៀបនឹងរយៈពេលដូចគ្នា ឆ្នាំ២០២៤ ដែលមានត្រឹមចំនួន ៧៧២លានដុល្លារប៉ុណ្ណោះ។
ក្រោមកិច្ចខិតខំ ប្រឹងប្រែងកៀរគរបណ្តាវិនិយោគិនបរទេសចូលមកកាន់កម្ពុជារបស់រាជរដ្ឋាភិបាល ជាលទ្ធផល នៅក្នុងរយៈពេលប៉ុន្មានឆ្នាំចុងក្រោយនេះ កំណើននៃគម្រោងវិនិយោគដែលកម្ពុជាទទួលបានមានការកើនឡើងគួរឱ្យកត់សម្គាល់។ ជាក់ស្ដែង និយាយចំពោះតែទីផ្សារកៅស៊ូ ដែលកម្ពុជាធ្លាប់តែធ្វើការនាំចេញស្ទើរតែទាំងស្រុងជាវត្ថុធាតុដើមទៅកាន់ទីផ្សារនៃប្រទេសវៀតណាមនោះ បច្ចុប្បន្ននេះ មានប្រមាណជាង១០ភាគរយត្រូវបានកែច្នៃក្នុងស្រុកមុនការនាំចេញ ជាពិសេសផ្នែកឧស្សាហកម្មផលិតសំបកកង់រថយន្ត។
អ្នកឧកញ៉ា លឹម ហេង អនុប្រធានសភាពាណិជ្ជកម្មកម្ពុជា បានប្រាប់ AMS ថា សម្រាប់ទីផ្សារកៅស៊ូកម្ពុជារហូតដល់ពេលបច្ចុប្បន្ននេះគឺនៅតែល្អប្រសើរ និងមិនមានបញ្ហាចោទនោះទេ ទាំងបរិមាណនាំចេញ និងតម្រូវការកែច្នៃនៅក្នុងស្រុកមុនពេលនាំចេញ ខណៈដែលឧស្សាហកម្មផលិតសំបកកង់រថយន្តសម្រាប់នាំចេញត្រូវការកៅស៊ូប្រមាណ ១០ភាគរយប៉ុណ្ណោះនៃបរិមាណកៅស៊ូសរុបដែលផលិតបាន។
អ្នកឧកញ៉ា បានបញ្ជាក់ថា ៖
«កៅស៊ូរបស់កម្ពុជាមានប្រភេទលេខ១ លេខ២ និងប្រភេទកៅស៊ូតម្លៃធូរថ្លៃសម្រាប់កែច្នៃ និងផលិតជាសំបកកង់ឡាន ខណៈដែលប្រភេទលេខ១ និងលេខ២ អាចនាំចេញបានក្នុងតម្លៃថ្លៃជាង។ ដូច្នេះ ខាងរោងចក្រផលិតសំបកកង់ឡាន ពួកគាត់មិនត្រូវការប្រភេទថ្លៃនោះដែរ ហើយរោងចក្រក៏អាចមានជម្រើសនាំកៅស៊ូពីប្រទេសជិតខាងនៅក្នុងតំបន់អាស៊ានយកមកកែច្នៃហើយនាំចេញបានដែរ»។
ដោយឡែក ពាក់ព័ន្ធទៅនឹងទំហំទីផ្សារសំបកកង់រថយន្តវិញ អ្នកឧកញ៉ាបានកត់សម្គាល់ថា ហាក់មានភាពទូលំទូលាយ ដែលកម្ពុជាអាចនាំចេញបានទាំងនៅក្នុងតំបន់អាស៊ាន និងបណ្តាប្រទេសដែលជាដៃគូពាណិជ្ជកម្មសេរី ដូចជា ចិន កូរ៉េខាងត្បូង អេមីរ៉ាតអារ៉ាប់រួម ជាដើម។ បន្ថែមពីនេះ កម្ពុជា ក៏អាចនាំចេញទៅកាន់បណ្តាប្រទេសផ្សេងៗទៀតតាមរយៈកិច្ចព្រមព្រៀងគ្រប់ជ្រុងជ្រោយក្នុងតំបន់ RCEP ជាពិសេស បណ្តាប្រទេសនៅប៉ែកអឺរ៉ុប និងសហរដ្ឋអាម៉េរិកផងដែរ ខណៈដែលរដ្ឋបាល លោក ដូណាល់ ត្រាំ បានសម្រេចបន្ទាបអត្រាពន្ធគយបដិការជាមួយកម្ពុជាត្រឹម១៩ភាគរយប៉ុណ្ណោះ ។
សូមជ្រាបថា គិតត្រឹមចុងឆ្នាំ២០២៥នេះ កម្ពុជា មានរោងចក្រផលិតសំបកកង់រថយន្ដសម្រាប់នាំចេញចំនួន ៣ ដែលកំពុងតែដំណើរការ រួមមាន ៖
ទី១- ក្រុមហ៊ុន CART TIRE CO.,LTD នៅតំបន់សេដ្ឋកិច្ចពិសេស ឈីលូ ជាន ពុចាយ (ខេត្ដស្វាយរៀង) បានដំណើរការនៅឆ្នាំ២០២១ លើទំហំផ្ទៃដី ៥០ហិកតា ក្រោមទុនវិនិយោគ ៧៨៧លានដុល្លារ ដោយមានទីផ្សារនាំចេញ ទៅអាម៉េរិក កាណាដា សហគមន៍អីរ៉ុប និងអាស៊ី ដែលមានម៉ាក «Sailun»។
ទី២- ក្រុមហ៊ុន GENERAL TIRES TECHNOLOGY (CAMBODIA) CO.,LTD នៅតំបន់សេដ្ឋកិច្ចពិសេស ក្រុងព្រះសីហនុ (ខេត្ដព្រះសីហនុ) បានដំណើរការនៅឆ្នាំ២០២២ លើទំហំផ្ទៃដី២០ហិកតា ក្រោមទុនវិនិយោគ ២៩៧លានដុល្លារ ដោយមានទីផ្សារនាំចេញ ទៅអាម៉េរិក និងមានគម្រោងនាំចេញទៅទីផ្សារប្រទេសប្រេស៊ីល ដែលមានម៉ាក «Sailun»។
ទី៣- រោងចក្រផលិតសំបកកង់រថយន្ដ ក្រុមហ៊ុន NEWBUSTAR (Cambodia) នៅតំបន់រដ្ឋបាលសេដ្ឋកិច្ចពិសេស យូ ប៊ី អ៊ី ស្នួល ស្ថិតនៅស្រុកស្នួល តម្លៃជាង ១៣៨លានដុល្លារ បានបើក ដំណើរការជាផ្លូវការ នៅថ្ងៃទី០៦ ខែកញ្ញា ឆ្នាំ២០២៤ ដោយមានទីផ្សារនាំចេញ ទៅអាមេរិក សហគមន៍អីរ៉ុប និងប្រទេសប្រេស៊ីល ដែលមានម៉ាក «DoubleStar»។
សូមជម្រាបថា តាមរបាយការណ៍របស់អគ្គនាយកដ្ឋានកៅស៊ូ ផ្ទៃដីកៅស៊ូកម្ពុជាសរុបមានចំនួន ៤២៥ ៤៤៣ហិកតា ក្នុងនោះផ្ទៃដីចៀរជ័រមានចំនួន ៣៣០ ២៥៩ហិកតា ស្មើនឹង៧៨% និងផ្ទៃដីថែទាំមានចំនួន ៩៥ ១៨៤ហិកតា ស្មើនឹង២២%៕
Account
Security
Favourite Content