សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ឆ្នាំ២០២៤នេះ ធនាគារពិភពលោកបានព្យាករណ៍ហើយនៅក្នុងរបាយការណ៍ The Global Economic Prospects ថា កំណើនសេដ្ឋកិច្ចសកលលោកនឹងទទួលបានត្រឹមតែ ២,៤ភាគរយមុនពេលដែលវាអាចមានកំណើនឡើងវិញបន្តិច ២,៧ភាគរយនៅឆ្នាំបន្ទាប់២០២៥។
ក្នុងឆ្នាំនេះវិបត្តិសេដ្ឋកិច្ចពិភពលោកជាច្រើនបានរុញច្រានឲ្យល្បឿនសេដ្ឋកិច្ចមានការថមថយខ្លាំង ជាពិសេសវិបត្តិភូមិសាស្ត្រនយោបាយរបស់ពិភពលោកក្រោយសង្គ្រាមនៅអ៊ុយក្រែនដែលបង្កើតឡើងដោយរុស្ស៊ី និងភាពតានតឹងរវាងចិន និងអាមេរិកជាដើម។ ប៉ុន្តែក្រៅតែពីបញ្ហាប្រឈមទាំងនេះ សេដ្ឋកិច្ចសកលក៏នឹងអាចជួបរងនូវវិបត្តិធំៗជាច្រើនផ្សេងទៀតផងដែរ ដែលវាសុទ្ធតែជាកត្តាធ្វើឲ្យរាំងស្ទះដល់កំណើនសេដ្ឋកិច្ចសកលក្នុងនោះរាប់ចាប់តាំងពីបញ្ហាវិបត្តិហិរញ្ញវត្ថុ, បញ្ហាធ្វើពាណិជ្ជកម្មតាមគ្រប់ច្រកអន្តរជាតិ, បញ្ហាបម្រែបម្រួលអាកាសធាតុ ជាពិសេសបញ្ហានៃកំណើនសេដ្ឋកិច្ចយឺតយ៉ាវនៃប្រទេសចិនដែលត្រូវបានគេចាត់ទុកថាជារោងចក្រដ៏ធំបំផុតមួយរបស់ពិភពលោក។
ឆ្នាំនេះ ចិននឹងអាចទទួលបានកំណើនត្រឹមតែ៤,៥ភាគរយដែលវាត្រូវបានគេមើលឃើញថាជាកំណើនសេដ្ឋកិច្ចដ៏យឺតយ៉ាវបំផុតរបស់មហាយក្សអាស៊ីនេះគិតចាប់តាំងតែពីឆ្នាំ១៩៩០ និងសូម្បីតែអំឡុងពេលកូវីដដែលនេះវានឹងធ្វើឲ្យមានផលប៉ះពាល់ដោយផ្ទាល់ និងប្រយោលទៅលើសម្ព័ន្ធមិត្តជាច្រើនដែលមានទំនាក់ទំនងពាណិជ្ជកម្មជាមួយនឹងចិន។
គេនៅចាំបានថា កាលពីចុងឆ្នាំ២០២១ ប្រទេសចិនបានក្លាយទៅជាទីផ្សារធំបំផុតរបស់ពិភពលោក ដោយផលិតផលនៃបណ្តាប្រទេសកំពុងអភិវឌ្ឍដល់ទៅ២០ភាគរយត្រូវបានដឹកជញ្ជូនចូលទៅក្នុងទីផ្សារមួយនេះ ជាពិសេសទៅលើប្រភេទផលិតផលដែលមានការពាក់ព័ន្ធទៅនឹងផែនការនៃការផ្លាស់ប្តូរថាមពលទៅជាថាមពលកកើតឡើងវិញ។
ក្នុងន័យនេះ អ្នកវិភាគជាច្រើនបានព្រមានថា ក្នុងករណីដែលបើកំណើនសេដ្ឋកិច្ចចិនធ្លាក់ចុះ១ភាគរយនៅក្នុងឆ្នាំ២០២៤នេះវានឹងអាចបណ្តាលឲ្យកំណើនសេដ្ឋកិច្ចសកលធ្លាក់ចុះប្រមាណ ០,២ភាគរយ ដែលវានឹងជះឥទ្ធិពលសំខាន់ទៅលើការនាំចេញនៃបណ្តាប្រទេសកំពុងអភិវឌ្ឍយ៉ាងច្រើន៕
Account
Security
Favourite Content