សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
បរទេស៖ យោងតាមប្រភពព័ត៌មានពី CNA បានរាយការណ៍ថា ប្រធានាធិបតីអាម៉េរិក Donald Trump យល់ព្រមបន្តក្របខណ្ឌកាត់បន្ថយសម្ពាធពាណិជ្ជកម្មជាមួយប្រទេសចិនបន្ថែមរយៈពេល ៩០ ថ្ងៃទៀត ដោយអាម៉េរិកផ្អាកយកពន្ធ ១៤៥% លើការនាំចូលពីចិន ខណៈដែលចិនផ្អាកយកពន្ធ ១២៥% លើការនាំចូលពីអាម៉េរិកដូចគ្នា។
កាលពីខែកក្កដា កិច្ចប្រជុំរវាងអាម៉េរិក និងចិននៅប្រទេសស៊ុយអែត ដោយមានរដ្ឋមន្ត្រីក្រសួងរតនាគារ លោក Scott Bessent និងភាគីទីក្រុងប៉េកាំង ដោយឧបនាយករដ្ឋមន្ត្រី លោក He Lifeng គឺពួកគេបានព្រមព្រៀងគ្នាក្នុងការជំរុញឱ្យបន្តក្របខណ្ឌកាត់បន្ថយភាពតានតឹងពាណិជ្ជកម្មរួចហើយ ប៉ុន្តែត្រូវរង់ចាំការអនុម័តពីមេដឹកនាំទាំងពីរសិន។ រដ្ឋមន្ត្រីក្រសួងរតនាគារអាម៉េរិក Scott Bessent បានលើកឡើងថា ការពង្រីក ឬ ការបន្តណាមួយនឹងអាស្រ័យលើប្រធានាធិបតី Donald Trump។
កាលពីថ្ងៃចន្ទ Donald Trump បានចុះហត្ថលេខាលើបទបញ្ជាប្រតិបត្តិដែលពន្យារពេលយកពន្ធខ្ពស់ពីប្រទេសចិនរហូតដល់ពាក់កណ្តាលខែវិច្ឆិកា ដែលជារដូវកាលទិញទំនិញដ៏សំខាន់មួយ ដោយសារអ្នកប្រើប្រាស់ភាគច្រើនសម្រុកទិញសម្រាប់រដូវកាលបុណ្យណូអែលរួមមាន គ្រឿងអេឡិចត្រូនិក សំលៀកបំពាក់ និងប្រដាប់ក្មេងលេងក្នុងអត្រាពន្ធទាប។ គួរឲ្យបញ្ជាក់ដែរថា ក្របខណ្ឌនៃការកាត់បន្ថយសម្ពាធពាណិជ្ជកម្មត្រូវផុតកំណត់នៅថ្ងៃទី ១២ ខែសីហានេះ ប៉ុន្តែ Trump យល់ព្រមពន្យារពេលបន្ថែម ៩០ ថ្ងៃទៀត។ ការផ្អាកយកពន្ធរយៈពេល ៩០ ថ្ងៃបន្ថែមទៀតការពារអាម៉េរិកពីការយកពន្ធលើទំនិញរបស់ចិន ១៤៥% ខណៈដែលចិនក៏ផ្អាកយកពន្ធ ១២៥% លើទំនិញនាំចូលពីអាម៉េរិកដូចគ្នា។ គេប៉ាន់ប្រមាណថា អាម៉េរិកអាចនឹងយកពន្ធយ៉ាងហោចណាស់ ៣០% លើការនាំចូលពីចិន ហើយចិនអាចនឹងយកពន្ធ ១០% លើការនាំចូលពីអាម៉េរិក។
លោក Wendy Cutler អតីតមន្ត្រីពាណិជ្ជកម្មជាន់ខ្ពស់របស់អាម៉េរិក លើកឡើងថា វាជាដំណឹងល្អមួយគួបផ្សំជាមួយនឹងការកើនឡើងនៃជំហានកាត់បន្ថយសម្ពាធមួយចំនួន ដែលអាម៉េរិក និងចិនបានធ្វើឡើងក្នុងប៉ុន្មានសប្តាហ៍ថ្មីៗនេះ។ វាបង្ហាញថាភាគីទាំងពីរកំពុងព្យាយាមមើលថា តើពួកគេអាចឈានដល់កិច្ចព្រមព្រៀងណាមួយនៅក្នុងកិច្ចប្រជុំរវាងមេដឹកនាំទាំងពីរនាពេលមុខនេះ ដែរឬទេ? កាលពីសប្តាហ៍មុន Trump បង្ហើបថា អាម៉េរិក និងចិនកំពុងខិតជិតកិច្ចព្រមព្រៀងពាណិជ្ជកម្ម ហើយប្រសិនបើកិច្ចព្រមព្រៀងមួយត្រូវបានសម្រេច នោះលោកនឹងជួបជាមួយមេដឹកនាំចិន Xi Jinping មុនដាច់ឆ្នាំនេះ។
កាលពីខែឧសភា អាម៉េរិក និងចិនព្រមព្រៀងកាត់បន្ថយសម្ពាធពាណិជ្ជកម្មសម្រាប់រយៈពេល ៩០ ថ្ងៃនៅទីក្រុងហ្សឺណែវ ប៉ុន្តែវាមានការរង្គោះរង្គើរ ដោយសារអាម៉េរិកបានចោទប្រកាន់ថា ចិនមិនបានដកការរឹតបន្តឹងលើការនាំចេញសារធាតុរ៉ែកម្រ ខណៈដែលទីក្រុងប៉េកាំងបានចោទប្រកាន់វិញថា អាម៉េរិកបានរំលោភលើកិច្ចព្រមព្រៀង។ ក្រោយមក ភាគីទាំងពីរបានជួបគ្នាម្តងទៀតនៅទីក្រុង Stockholm ប្រទេសស៊ុយអែតកាលពីចុងខែកក្កដា ដើម្បីពិភាក្សាលើការបន្តក្របខណ្ឌកាត់បន្ថយសម្ពាធពាណិជ្ជកម្ម ដោយសារការដំឡើងពន្ធខ្ពស់ទៅលើគ្នាទៅវិញមកនឹងធ្វើឲ្យសម្ពាធកាន់តែតានតឹង និងប៉ះពាល់សេដ្ឋកិច្ចខ្លាំង។ អ្នកវិភាគយល់ឃើញថា ហេតុផលទាំងមូលនៃការផ្អាកយកពន្ធរយៈពេល ៩០ ថ្ងៃកាលពីលើកដំបូង គឺដើម្បីឲ្យមានការចរចាកាន់តែទូលំទូលាយ។ ទន្ទឹមនឹងនេះ ការពន្យារពេល ៩០ ថ្ងៃបន្ថែមទៀតនឹងផ្តល់ឱ្យភាគីទាំងពីរមានពេលវេលាបន្ថែមក្នុងការយកចិត្តទុកដាក់ពីភាពតានតឹងនៃពាណិជ្ជកម្ម។ មិនត្រឹមតែប៉ុណ្ណោះ វាអាចនឹងកាត់បន្ថយភាពតានតឹងនៃកិច្ចចរចារវាងភាគីទាំងសងខាង ជាមួយនឹងក្តីសង្ឃឹមថាមហាអំណាចទាំងពីរនឹងឆ្ពោះទៅរកកិច្ចព្រមព្រៀងក្របខ័ណ្ឌមួយ៕
Account
Security
Favourite Content