សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
បរទេស៖ អតិផរណានៅតំបន់ចាយលុយអឺរ៉ូបានកើនឡើងដល់ ៧ ភាគរយកាលពីខែមេសាកន្លងទៅនេះ និង ជាការកើនឡើងលើកដំបូងក្នុងរយៈពេលប៉ុន្មានខែនាឆ្នាំ ២០២៣ នេះ។ នេះបើយោងតាមប្រភពព័ត៌មានពីរ៉យទ័រ។
កាលពីខែមេសាកន្លងទៅនេះ តម្លៃទំនិញប្រើប្រាស់បានកើនឡើងដល់ ១៣,៦ ភាគរយ ដែលកើនឡើងពី ៦,៩ ភាគរយ នៅខែមីនា ដោយសារការកើនឡើងត្រូវបានជំរុញដោយតម្លៃម្ហូបអាហារ ភេសជ្ជៈ និងថាមពល។ តម្លៃសេវាកម្មបានកើនឡើង ៥,២ ភាគរយ នៅក្នុងខែមេសា បើធៀបនឹងខែមីនាដែលមានអត្រា ៥,១ ភាគរយ។ តម្លៃថាមពលបានកើនឡើងដល់ ២,៥ ភាគរយ បន្ទាប់ពីការធ្លាក់ចុះបន្តិចបន្តួចនៅត្រឹម ០,៩ ភាគរយ កាលពីខែមីនា។
ទោះជាយ៉ាងណាក្តី អតិផរណាស្នូល (មិនរាប់បញ្ចូលតម្លៃអាហារ និងថាមពល) បានធ្លាក់ចុះពី ៥,៧ ភាគរយ ក្នុងខែមីនា មកនៅត្រឹម ៥,៦ ភាគរយ ក្នុងខែមេសា។ បើទោះបីជាអតិផរណាមានការចុះយឺតក៏ដោយ ប៉ុន្តែតម្លៃរស់នៅតែបន្តមានតម្លៃថ្លៃ។ ដូច្នោះហើយ តួលេខនេះត្រូវបានយកចិត្តទុកដាក់យ៉ាងជាប់លាប់ ដោយអ្នកបង្កើតគោលនយោបាយរបស់ធនាគារកណ្តាលអឺរ៉ុបដែលនឹងសម្រេចចិត្តថា តើត្រូវបន្តដំឡើងអត្រាការប្រាក់ ដើម្បីទប់ស្កាត់អតិផរណាដែរ ឬទេ?
ស្របពេលនេះដែរ ប្រទេសឡាតវីបន្តតស៊ូជាមួយនឹងអតិផរណាខ្ពស់បំផុតនៅ ១៥ ភាគរយ រួមជាមួយនឹងប្រទេសស្លូវ៉ាគី លីទុយអានី និងអៀរឡង់ផងដែរ។ ប្រទេសទាំងអស់នេះ ចាំបាច់ត្រូវដោះស្រាយបញ្ហាការឡើងថ្លៃតម្លៃរស់នៅក្នុងចំណោមតំបន់ចាយប្រាក់អឺរ៉ូ ដែលមានសមាជិក ២០ នេះ។ លើសពីនេះផងដែរ តម្លៃទំនិញប្រើប្រាស់នៅប្រទេសបារាំងបានកើនឡើងពី ៦,៧ ភាគរយ នៅខែមីនា ឡើងដល់ ៦,៩ ភាគរយកាលពីខែមេសាកន្លងទៅនេះ។ ទោះយ៉ាងណាក្តី អតិផរណានៅអាល្លឺម៉ង់ដែលជាសេដ្ឋកិច្ចធំបំផុតរបស់សហភាពអឺរ៉ុបបានធ្លាក់ចុះពី ៧,៨ ភាគរយ នៅខែមីនា មកនៅត្រឹម ៧,៦ ភាគរយ។
មួយវិញទៀត តួលេខចុងក្រោយបំផុតទាំងនេះរបស់អឺរ៉ុបធ្វើឱ្យអ្នកសេដ្ឋកិច្ចមានការព្រួយបារម្ភ បន្ទាប់ពីធនាគារកណ្តាលអឺរ៉ុប ECB មិនមានការប្តេជ្ញាចិត្តចំពោះការដំឡើងអត្រាការប្រាក់ថ្មី ខណៈដែលអត្រាប្រាក់បញ្ញើសំខាន់នៅក្នុងតំបន់ចាយប្រាក់អឺរ៉ូមានចំនួន ៣ ភាគរយ។ នាពេលថ្មីៗនេះ មូលនិធិរូបិយវត្ថុអន្តរជាតិ (IMF) បាននិយាយថា ការទប់ទល់អតិផរណា និងការជៀសវាងពីវិបត្តិសេដ្ឋកិច្ចក្នុងពេលតែមួយ គឺជាបញ្ហាប្រឈមដ៏ធំបំផុត ដែលសហភាពអឺរ៉ុបនឹងត្រូវប្រឈមមុខក្នុងប៉ុន្មានខែខាងមុខ។
កាលពីថ្ងៃចន្ទកន្លងទៅនេះ ប្រធានសេដ្ឋវិទូរបស់ធនាគារកណ្តាលអឺរ៉ុបលោក Philip Lane បាននិយាយថា អតិផរណាតំបន់អឺរ៉ូអាចនឹងថយចុះនៅឆ្នាំនេះ ប៉ុន្តែសន្ទុះកំណើនតម្លៃឡើងថ្លៃនៅតែមានកម្រិតខ្ពស់សម្រាប់ពេលនេះ រួមទាំងទំនិញ និងសេវាកម្មមូលដ្ឋានផងដែរ។ ឆ្នាំនេះផងដែរ អាជីវកម្មត្រូវបានរំពឹងថា ប្រាក់ចំណេញនឹងធ្លាក់ចុះបន្តិច ពីព្រោះពួកគេអាចប្រឈមនឹងការកើនឡើងចំណាយថ្លៃដើម ការឡើងថ្លៃតម្លៃពលកម្ម ប៉ុន្តែពួកគេនឹងមិនអាចឡើងថ្លៃបានច្រើនទេ ដោយសារតម្រូវការកំពុងដំណើរការធម្មតា៕
Account
Security
Favourite Content