ភ្នំពេញ ៖ ដោយគិតទាំងបំណុលមរតក, ត្រឹមដំណាច់ឆ្នាំ២០២៤ កម្ពុជាមានសន្និធិបំណុលសាធារណៈសរុបមានចំនួន ១២,០៣ ប៊ីលានដុល្លារអាម៉េរិក ក្នុងនោះ៖ ៩៩% ត្រូវនឹងប្រមាណ ១១,៩២ ប៊ីលានដុល្លារអាម៉េរិក ជាបំណុលសាធារណៈក្រៅប្រទេស (ក្របខ័ណ្ឌទ្វេភាគីប្រមាណ ៦២% និងក្របខ័ណ្ឌ ពហុភាគីប្រមាណ ៣៨%) និង ១% ត្រូវនឹងប្រមាណ ១១៥ លានដុល្លារអាម៉េរិក ជាបំណុលសាធារណៈក្នុងប្រទេស។ សមាសភាគបំណុលសាធារណៈទាំងនេះរួមមាន៖ ៤៩% ជា ដុល្លារអាម៉េរិក, ១៨% ជាអេសដេអ៊ែ, ១០% ជាយេនជប៉ុន, ១០% ជាយ័នចិន, ៨% ជាអឺរ៉ូ, និង ៥% ទៀត ជារូបិយវត្ថុជាតិ និងរូបិយប័ណ្ណផ្សេងៗ។

ការចុះកិច្ចព្រមព្រៀងឥណទាន

នៅក្នុងត្រីមាសទី៤ ឆ្នាំ២០២៤ នេះ រាជរដ្ឋាភិបាល បានចុះកិច្ចព្រមព្រៀងឥណទានសម្បទានថ្មីជាមួយដៃគូ អភិវឌ្ឍនានាសរុបមានចំនួន ៧៦៣,៨៣ លានដុល្លារអាម៉េរិក សមមូលនឹង ៥៨២,៧៧ លានអេសដេអ៊ែ។ ជារួម នៅក្នុងឆ្នាំ ២០២៤ នេះ រាជរដ្ឋាភិបាលបានចុះកិច្ចព្រមព្រៀងឥណទានថ្មី ជាមួយដៃគូអភិវឌ្ឍនានាសរុបមានចំនួន ១ ៧៩៥,៨៤ លាន ដុល្លារអាម៉េរិក សមមូលនឹង ១ ៣៧០,១៦ លានអេសដេអ៊ែ ស្មើនឹងប្រមាណ ៨១% នៃពិតានដែលច្បាប់អនុញ្ញាត (១ ៧០០ លានអេសដេអ៊ែ) ក្នុងនោះ ក្របខ័ណ្ឌទ្វេភាគី ៣៩% និង ក្របខ័ណ្ឌពហុភាគី ៦១%។ បើធៀបនឹងឆ្នាំ២០២៣ ការចុះ កិច្ចព្រមព្រៀងឥណទានសម្បទានថ្មី នៅក្នុងឆ្នាំ២០២៤ នេះ មានការកើនឡើងប្រមាណ ២%។ ឥណទានទាំងនេះ សុទ្ធសឹងជាឥណទានមានកម្រិត សម្បទានខ្ពស់ ដោយមានធាតុអំណោយជាមធ្យមប្រមាណ ៤៥%។ គោលដៅនៃការចុះកិច្ចព្រមព្រៀងឥណទានថ្មីទាំងនេះគឺសម្រាប់បំពេញតម្រូវការហិរញ្ញប្បទានក្នុងវិស័យអាទិភាពរបស់ រាជរដ្ឋាភិបាល សំដៅរួមចំណែកទ្រទ្រង់ចីរភាពនៃកំណើនរយៈ ពេលវែង និងបង្កើនផលិតភាព សេដ្ឋកិច្ច ឬផលិតភាពផលិតកម្ម។

ការបោះផ្សាយលក់មូលបត្ររដ្ឋ

នៅក្នុងត្រីមាសទី៤ ឆ្នាំ២០២៤ នេះ រាជរដ្ឋាភិបាល បានបោះផ្សាយលក់មូលបត្ររដ្ឋ សរុបមានចំនួន ១៦ ប៊ីលាន រៀល ត្រូវនឹងប្រមាណ ៣,៩៨ លានដុល្លារអាម៉េរិក។ ជារួម, នៅក្នុងឆ្នាំ២០២៤ នេះ រាជរដ្ឋាភិបាលបានបោះ ផ្សាយលក់មូលបត្ររដ្ឋ សរុបមានចំនួន ៣០១,៣០ ប៊ីលានរៀល សមមូលនឹង ៧៤,៨៦ លានដុល្លារអាម៉េរិក ត្រូវនឹងប្រមាណ ៦៨% នៃទំហំសរុបដែលច្បាប់អនុញ្ញាត (៤៤០ ប៊ីលាន រៀល) ដើម្បីធ្វើហិរញ្ញប្បទានគាំទ្រ គម្រោងវិនិយោគសាធារណៈសំដៅ លើកស្ទួយកំណើន និងផលិតភាពសេដ្ឋកិច្ច។

ការដកសាច់ប្រាក់

នៅក្នុងត្រីមាសទី៤ ឆ្នាំ២០២៤ រាជរដ្ឋាភិបាលបានដក សាច់ប្រាក់ពីឥណទានសម្បទាន ដែលបានចុះកិច្ចព្រមព្រៀង កន្លងមក សរុបមានចំនួន ៦៦៨,៦៩ លានដុល្លារអាម៉េរិក។ ជារួម, នៅក្នុងឆ្នាំ២០២៤ រាជរដ្ឋាភិបាលបានដកសាច់ប្រាក់សរុប មានចំនួន ១,៥១ ប៊ីលានដុល្លារអាម៉េរិក ក្នុងនោះ៖ ក្របខ័ណ្ឌ ទ្វេភាគី មានប្រមាណ ៤៩% និងក្របខ័ណ្ឌពហុភាគីមានប្រមាណ ៥១%។ សាច់ប្រាក់ទាំងនេះ ត្រូវបានប្រើប្រាស់ជាក់ស្តែង ទៅលើ វិស័យហេដ្ឋារចនាសម្ព័ន្ធ ៦៧% និងវិស័យអាទិភាពចំពោះមុខ ផ្សេងទៀត (មិនមែនហេដ្ឋារចនាសម្ព័ន្ធ) ៣៣%។ ដោយឡែក, បើធៀបនឹងឆ្នាំ២០២៣ ការដកសាច់ប្រាក់ ជាក់ស្តែងនៅក្នុងឆ្នាំ២០២៤ នេះ មានការថយចុះប្រមាណ ១%។

ការទូទាត់សេវាបំណុល

នៅក្នុងត្រីមាសទី៤ ឆ្នាំ២០២៤ នេះដូចគ្នា រាជរដ្ឋាភិបាលបាន ទូទាត់សេវាបំណុលសរុបមានចំនួន ៩១,៩៩ លានដុល្លារ អាម៉េរិក។ ជារួម, នៅក្នុងឆ្នាំ២០២៤ រាជរដ្ឋាភិបាលបានទូទាត់ សេវាបំណុល សរុបមានចំនួន ៥៥៨,៧៧ លានដុល្លារអាម៉េរិក រួមមាន៖ ១) ក្របខ័ណ្ឌបំណុលសាធារណៈក្រៅប្រទេសមានចំនួនប្រមាណ ៥៤២,៧៩ លានដុល្លារអាម៉េរិក ក្នុងនោះ៖ ប្រាក់ ដើម ៤១៩,១៤ លានដុល្លារអាម៉េរិកនិង ការប្រាក់និងកម្រៃ ផ្សេងៗ ១២៣,៦៥ លានដុល្លារអាម៉េរិក, និង ២) ក្របខ័ណ្ឌ បំណុលសាធារណៈក្នុងប្រទេស មានចំនួនប្រមាណ ១៥,៩៨ លានដុល្លារអាម៉េរិក ក្នុងនោះ៖ ប្រាក់ដើម ១២,៧២ លានដុល្លារ អាម៉េរិក និងការប្រាក់ ៣,២៧ លានដុល្លារអាម៉េរិក។ ដោយឡែក, បើធៀបនឹងឆ្នាំ២០២៣ ការទូទាត់សេវា បំណុលសរុបនៅក្នុងឆ្នាំ២០២៤នេះ មានកំណើនប្រមាណ ៨%។

សូចនាករបំណុលគន្លឹះ

ផ្អែកតាមលទ្ធផលបឋមនៃការវិភាគចីរភាពបំណុលតាម មូលដ្ឋានទិន្នន័យប៉ាន់ស្មានឆ្នាំ២០២៤ បង្ហាញថា ស្ថានភាព បំណុលសាធារណៈកម្ពុជា បន្តរក្សានូវ «ចីរភាព» និង «ហានិភ័យ កម្រិតទាប» ដដែល ដោយរាល់សូចនាករបំណុលគន្លឹះៗ ទាំងអស់ សុទ្ធតែស្ថិតក្រោមអនុបាតគោល ក្នុងនោះ អនុបាតតម្លៃ បច្ចុប្បន្ន នៃបំណុលសាធារណៈសរុបធៀបនឹង ផសស មានត្រឹម កម្រិត ១៩,៣% ធៀបនឹងអនុបាតគោល ៥៥% និងអនុបាត តម្លៃបច្ចុប្បន្ននៃបំណុលសាធារណៈក្រៅប្រទេសធៀបនឹង ផសស មានត្រឹមកម្រិត ១៩% ធៀបនឹងអនុបាតគោល ៤០%៕