ភ្នំពេញ ៖ ឧបនាយករដ្ឋមន្ត្រី និងជាអនុប្រធានទី១ក្រុមប្រឹក្សាអភិវឌ្ឍន៍កម្ពុជា ឯកឧត្តម ស៊ុន ចាន់ថុល បានផ្តួចផ្តើមគំនិតឱ្យមានការរៀបចំការជិះកង់នៅក្នុងខេត្តសៀមរាប ដើម្បីផ្សព្វផ្សាយក្រុមហ៊ុន ផលិតកង់ XDS Bicycle  និងជំរុញវិស័យទេសចរណ៍នៅប្រទេសកម្ពុជាឱ្យមានការរីកចម្រើន និងស្របពេលដែលកម្ពុជាទទួលបានជ័យលាភីចំនួន ២ នៅក្នុងក្របខ័ណ្ឌពានរង្វាន់នៃការធ្វើដំណើរពិភពលោកសម្រាប់ឆ្នាំ២០២៣ (World Travel Awards 2023)។

ឯកឧត្តម ស៊ុន ចាន់ថុល មានគំនិតសុទិដ្ឋិនិយមបែបនេះ ក្នុងទស្សនកិច្ចថែទាំវិនិយោគិន បង្ហាញជូនឱកាសវិនិយោគថ្មីៗ និងពិភាក្សាការងារជាមួយលោកស្រី Chuqiao Li អនុប្រធានក្រុមហ៊ុន SHENZHEN XIDE​SHE​NG ​Bicycle Co., Ltd. (XDS) និងលោក Jianlin Bao អនុប្រធានក្រុមហ៊ុន Huawei Technologies Co., Ltd កាលពីពេលថ្មីៗនេះ ។

ឯកឧត្តមឧបនាយករដ្ឋមន្ត្រី ស៊ុន ចាន់ថុល ក៏បានថ្លែងអំណរគុណដល់ក្រុមហ៊ុន XDS Bicycle ដែលសម្រេចចិត្តចូលមកវិនិយោគបង្កើតរោងចក្រនៅកម្ពុជា រហូតបច្ចុប្បន្ននេះបានផ្តល់ឱកាសការងារដល់ប្រជាពលរដ្ឋប្រមាណ ១៤០០នាក់រួចមកហើយ។

ឯកឧត្តមឧបនាយករដ្ឋមន្ត្រីបានឆ្លៀតយកឱកាសនេះផ្តួចផ្តើមគំនិតឱ្យមានការរៀបចំការជិះកង់របស់ក្រុមហ៊ុនផ្ទាល់ (XDS Bike Tour) នៅក្នុងខេត្តសៀមរាប ដើម្បីគោលដៅសំខាន់ៗចំនួន ៤ រួមមាន៖១-ផ្សព្វផ្សាយអំពីការវិនិយោគរបស់ក្រុមហ៊ុន XDS នៅកម្ពុជា ២-ផ្សព្វផ្សាយអំពីវិស័យទេសចរណ៍នៅប្រទេសកម្ពុជា ៣-ផ្សព្វផ្សាយផលិតផលរបស់ក្រុមហ៊ុន និង៤-រៃអង្គាសថវិកាជូនដល់មន្ទីរពេទ្យកុមារអង្គរ។

សូមបញ្ជាក់ថា ដំណើរទស្សនកិច្ចនេះ គឺជាបេសកកម្មលើកទី១ របស់ថ្នាក់ដឹកនាំក្រុមប្រឹក្សាអភិវឌ្ឍន៍កម្ពុជា ក្នុងនីតិកាលទី៧ ដើម្បីបង្ហាញការយកចិត្តទុកដាក់របស់រាជរដ្ឋាភិបាលកម្ពុជាដល់វិនិយោគិនក្រៅប្រទេស ដែលបានចូលមកវិនិយោគនៅកម្ពុជា តាមរយៈការសួរសុខទុក្ខវិនិយោគិនដោយផ្ទាល់ និងជម្រាបជូនអំពីឱកាសវិនិយោគថ្មីៗនៅកម្ពុជា ដល់ទីស្នាក់ការកណ្តាលរបស់ក្រុមហ៊ុន។

ជាមួយគ្នានេះផងដែរ ប្រទេសកម្ពុជាទទួលបានអបអរសាទរនូវជ័យលាភីចំនួន ២ នៅក្នុងក្របខ័ណ្ឌពានរង្វាន់នៃការធ្វើដំណើរពិភពលោកសម្រាប់ឆ្នាំ២០២៣ (World Travel Awards 2023)។ ជ័យលាភីទី១ គឺកម្ពុជាបានឈ្នះពានរង្វាន់ជាគោលដៅទេសចរណ៍វប្បធម៌ឈានមុខគេនៅតំបន់អាស៊ី (Asia’s Leading Cultural Des​ti​nation) និងជ័យលាភីទី២ គឺកម្ពុជាឈ្នះពានរង្វាន់ជាគោលដៅទេសចរណ៍យុវជនឈានមុខគេនៅតំបន់អាស៊ី (Asia’s Leading Youth Travel Destination)។ នេះបើយោងតាមការចេញផ្សាយពីគេហទំព័រ World Travel Awards កាលពីពេលថ្មីៗនេះ។

តាមការចេញផ្សាយ បានបញ្ជាក់បន្ថែមថា នៅទូទាំងអាស៊ី កម្ពុជាបានជាប់ចំណាត់ថ្នាក់លេខ ១ លើប្រធានបទ «ទិសដៅវប្បធម៌ឈានមុខគេនៅអាស៊ី» នៅឆ្នាំ២០២៣នេះ ខណៈលេខ២ បានទៅលើប្រទេសឥណ្ឌា ជប៉ុន ណេប៉ាល់ ស្រីលង្កា ថៃ និងវៀតណាម។

ដោយឡែក សម្រាប់ប្រធានបទ «គោលដៅទេសចរណ៍យុវជនឈានមុខគេនៅអាស៊ី» នៅឆ្នាំ២០២៣នេះ កម្ពុជា ក៏ទទួលបានចំណាត់ថ្នាក់លេខ ១ ផងដែរ ខណៈចំណាត់ថ្នាក់លេខ ២ បានទៅលើប្រទេស ឡាវ ថៃ និងវៀតណាម។

រាជរដ្ឋាភិបាលកម្ពុជា បានចាត់ទុកវិស័យទេសចរណ៍ គឺជាសសរស្តម្ភមួយក្នុងចំណោមសសរស្តម្ភទាំងបួន ដែលជួយទ្រទ្រង់ដល់កំណើនសេដ្ឋកិច្ចកម្ពុជា បន្ថែមពីលើការនាំចេញសម្លៀកបំពាក់ កសិកម្ម និងសំណង់ និងអចលនទ្រព្យ។ ព្រះរាជាណាចក្រកម្ពុជាក៏ធ្លាប់បានដណ្តើមយកពានរង្វាន់ដ៏សំខាន់ចំនួនពីរនេះផងដែរ នៅឆ្នាំ២០២២កន្លងទៅ។

ឯកឧត្តម តុប សុភ័គ រដ្ឋលេខាធិការ និងជាអ្នកនាំពាក្យក្រសួងទេសចរណ៍ បានប្រាប់បណ្តាញព័ត៌មានថា កម្ពុជាជាគោលដៅទេសចរណ៍វប្បធម៌ និងអេកូឡូស៊ី។ គេបានស្គាល់កម្ពុជាយ៉ាងច្បាស់ តាមរយៈឧទ្យានបុរាណអង្គរ ដែលស្ថិតនៅក្នុងខេត្តសៀមរាប និងជាឆ្នេរសមុទ្រ​ ដ៏ស្រស់ស្អាត នៅភាគនិរតីនៃខេត្តព្រះសីហនុ។

យោងតាមក្រសួងទេសចរណ៍បានបញ្ជាក់ថា ក្នុងរយៈពេល ៨ ខែដំបូងនៃឆ្នាំ២០២៣ កម្ពុជា ទទួលបានភ្ញៀវទេសចរអន្តរជាតិប្រមាណ ៣.៥ លាននាក់ កើនឡើងជាង ២៥០.៨ ភាគរយ បើប្រៀបធៀបរយៈពេលដូចគ្នាកាលពីឆ្នាំមុន៕