ភ្នំពេញ ៖ វេទិកាផ្គូផ្គងរវាងអ្នកផលិត និងអ្នកទិញ គឺជាវេទិកាមួយដែលប្រមូលផ្ដុំម្ចាស់សហគ្រាសក្នុងស្រុកឱ្យទៅជួបជុំជាមួយអ្នកទិញ ដើម្បីពិភាក្សាគ្នាអំពីតម្រូវការជាក់ស្ដែង។ វេទិកានេះតែងតែធ្វើដំណើរពី ខេត្តមួយទៅខេត្តមួយទៀត ដោយពាំនាំនូវផលិតផលក្នុងស្រុកចម្រុះទៅជាមួយផងដែរ។

ឯកឧត្តមបណ្ឌិត សួង ណយ អនុប្រធានគណៈកម្មាធិការជាតិជំរុញចលនាភូមិមួយ ផលិតផល​មួយ នៃទីស្ដីការគណៈរដ្ឋមន្ត្រី ដែលជាអ្នកដឹកនាំរៀបចំវេទិកានេះបានឱ្យដឹងថា កន្លងមកវេទិកាផ្គូផ្គងអ្នក ផលិត និងអ្នកទិញ តែងប្រព្រឹត្តទៅដោយរលូន និងទទួលបានផ្លែផ្កាលើសការរំពឹងទុក។ ក្នុងនោះ តម្រូវឱ្យអ្នកផលិតឡើងធ្វើបទបង្ហាញម្នាក់ម្ដងៗ អំពីផលិតផល ឬសេវាកម្មរបស់ពួកគេ។ នៅក្នុងបទបង្ហាញផងដែរ ម្ចាស់សហគ្រាសត្រូវតែបង្ហាញនូវព័ត៌មានសំខាន់ៗដូចជា បរិមាណនៃការផលិតក្នុងមួយថ្ងៃ មួយសប្ដាហ៍ ឬមួយឆ្នាំ មាននូវតារាងតម្លៃសម្រាប់ការលក់បោះដុំ និងរាយ ប្រសិនបើអតិថិជនទៅទិញដល់កន្លែងតម្លៃប៉ុន្មាន? ដឹកដល់កន្លែងតម្លៃប៉ុន្មាន?

បន្ថែមពីនេះ ប្រសិនបើផលិតផលនោះផលិតចេញពីសហគមន៍ ក៏ត្រូវបង្ហាញផងដែរថាសហគមន៍មានសមាជិកប៉ុន្មានគ្រួសារ បើជាសិប្បកម្មតើមានបុគ្គលិកប៉ុន្មាននាក់ជាដើម។ ជំហានចុងក្រោយគឺយកផលិតផលឱ្យគេឃើញ ឱ្យគេបានប៉ះ បានភ្លក់ ដើម្បីឱ្យអ្នកទិញមានការ​ជឿទុកចិត្តលើផលិតផលក្នុងស្រុកកាន់តែខ្លាំង។ ដោយឡែកសម្រាប់អ្នកទិញវិញ ក៏អាចលើកឡើងពីតម្រូវការដែលគេចង់បានផងដែរ។

បើតាមការឱ្យដឹងពីឯកឧត្តម សួង ណយ អ្នកទិញអាចបង្ហាញរូបភាពផលិតផលដែលគេចង់បាន និងបញ្ជាក់ពីបរិមាណដែលខ្លួនត្រូវការ ហើយនឹងអាចឈានដល់ការចចាតម្លៃគ្នានៅក្នុងវេទិកានោះតែម្ដង។ ជាក់ស្ដែង ប្រសិនបើអតិថិជនគឺជាឈ្មួញកណ្ដាល ដែលចង់ស្វែងរកគ្រាប់ស្វាយចន្ទីកែច្នៃ សម្រាប់​យកទៅលក់បន្ត ពួកគាត់អាចបង្ហាញរូបទៅអ្នកផលិតថា គ្រាប់ស្វាយចន្ទីប្រភេទណាដែលគាត់ត្រូវ​ការ ហើយត្រូវការក្នុងចំនួនប៉ុន្មាន?

បើតាមឯកឧត្តម សួង ណយ បានឱ្យដឹងថា៖

«វេទិកានេះ មិនមែនជាវេទិកាឈ្លោះប្រកែកគ្នាទេ ប៉ុន្តែជាវេទិកាដែលនិយាយគ្នាត្រង់ៗ ទៅលើបញ្ហាដែលអ្នកផលិត និងអ្នកទិញជួបប្រទះ។ នកទិញច្រើនតែត្អូញត្អែរថា ផលិតផលក្នុងស្រុកមានតម្លៃថ្លៃ ដូច្នេះ វេទិកានេះឱ្យសិទ្ធិ​​ទៅអ្នកផលិតក្នុងការបកស្រាយ និងតេស្តជាក់ស្ដែងថា មូលហេតុអ្វីដែលនាំឱ្យផលិតផលមួយមានតម្លៃខ្ពស់ ហើយប្រសិនបើមានកង្វះខាត ក៏នឹងប្រើប្រាស់វេទិកានេះដើម្បីបន្តដោះស្រាយដូចគ្នា»។

មិនត្រឹមតែប៉ុណ្ណោះ រាល់វេទិកានីមួយៗ តែងតែមានការចូលរួមពីមន្ត្រីពាក់ព័ន្ធ ឬអាជ្ញាធរក្នុងតំបន់ ក្នុងករណីថា អ្នកផលិតមានចម្ងល់ពាក់ព័ន្ធនឹងការរត់ឯកសារ ការបង្កើតកូដផលិតផល និងការ​ចុះបញ្ជីផលិតផលជាដើម គឺមានអ្នកដែលអាចឆ្លើយបានភ្លាមៗតែម្ដង។

បើតាមការសង្កេតរបស់ឯកឧត្តម បន្ទាប់ពីវេទិកានីមួយៗ អ្នកផលិត​ទទួលបានអតិថិជន​ច្រើន​ជាងមុន ស្ទើរតែ​ច្រើនជាងការរំពឹងទុកទៀតផង ដោយសារតែក្រោយ​វេទិកានីមួយៗ គឺតែងមាន​ការស្ទង់មតិ ហើយឃើញថាអ្នកលក់ចេះតែចង់បន្តទៅវេទិកាផ្សេងៗ​ទៀត ព្រោះទៅម្ដងៗ ពួកគេអាចលក់បានច្រើន។

ឯកឧត្តម បណ្ឌិត សួង ណយ បានសង្កត់ធ្ងន់ថា៖

«ការទិញផលិផលក្នុងស្រុកគឺឈ្នះៗ កាលណាផលិតផល​ក្នុងស្រុកយើងផលិតទៅមានអ្នកទិញ គាត់អាចបង្កើនការផលិត និងអាចផ្ទេរចំណេះដឹង ទៅកាន់​អ្នកជំនាន់ក្រោយទៀត ហើយសំខាន់បំផុតគឺអាចកាត់បន្ថយថ្លៃដើម ដែលធ្វើឱ្យទំនិញកាន់ តែមាន​តម្លៃប្រកួតប្រជែង»៕