ភ្នំពេញ ៖ ចិញ្ចឹមជ្រូក ជារបរមួយដែលបងប្អូនរស់នៅតាមតំបន់ជនបទនិយមចិញ្ចឹមជាលក្ខណៈគ្រួសារ ឬក្នុងទ្រង់ទ្រាយធំបើកជាកសិដ្ឋាន ដើម្បីអាចទទួលបានចំណូលក្រោយពេលលក់ទៅលើទីផ្សារ ប៉ុន្តែអ្វីដែលសំខាន់ និងជាបញ្ហាដែលតែងកើតមានគឺមានក្លិនស្អុយប៉ះពាល់ដល់អ្នកជិតខាង។ ចំពោះបញ្ហាមួយនេះ មានកសិករម្នាក់បានជ្រើសរើសយកវិធីចិញ្ចឹមជ្រូកក្នុងរណ្ដៅលើអង្កាមដែលកាត់បន្ថយក្លិនស្អុយ ជ្រូកមានសុខភាពល្អមិនងាយឈឺ និងផ្ដល់សាច់មានគុណភាព។  

លោក ហៀង សាវុធ ម្ចាស់កសិដ្ឋានចិញ្ចឹមជ្រូកនៅស្រុកមោងឫស្សី ខេត្តបាត់ដំបង បានរៀបរាប់ថា៖

«មូលហេតុដែលខ្ញុំចិញ្ចឹមជ្រូកនេះដោយសារខ្ញុំធ្លាប់ទៅធ្វើការនៅប្រទេសជិតខាង ហើយបានឃើញបច្ចេកទេសចិញ្ចឹមជ្រូកក្នុងរណ្ដៅលើអង្កាម ក៏បានរៀនសូត្រពីគេ និងយកមកចិញ្ចឹមនៅប្រទេសយើងវិញ ឃើញថាគ្មានក្លិនស្អុយ ហើយជ្រូកមិនងាយឈឺ និងមិនសូវចំណាយកម្លាំងច្រើន»។

លោកបន្តថា៖

«ពាក់ព័ន្ធនឹងបច្ចេកទេសការចិញ្ចឹមជ្រូកលើអង្កាមនេះដែរ អ្នកចិញ្ចឹមចុះដើមតិចជាងការចិញ្ចឹមលើស៊ីម៉ង់ ដោយសារយើងមិនបាច់ចំណាយថ្លៃទឹកភ្លើងច្រើន ចំណេញកម្លាំងពលកម្ម ពោលគឺអស់តែថ្លៃទិញអង្កាម និងបាញ់ថ្នាំបំបាត់ក្លិនតិចតួច។ ដោយឡែកសម្រាប់ថ្នាំនេះទៀតសោត គេអាចច្នៃចេញពីម្នាស់លាយជាមួយស្កររងូ ដែលចំណាយតិចតួច អាចបំបាត់ក្លិនស្អុយ និងបន្សាបហ្គាសនៅក្នុងលាមកជ្រូកថែមទៀតផង»។  

ទាក់ទងនឹងការការចិញ្ចឹមខាងលើនេះ លោកបញ្ជាក់ថា ៖

«ការចិញ្ចឹមបែបនេះ គឺមិនបាច់កើប ឬសម្អាតលាមកជ្រូកជាប្រចាំនោះទេ ដោយមួយឆ្នាំយើងកើបអង្កាមចេញម្ដងប៉ុណ្ណោះ ហើយវាក៏មិនបានបង្ករជាជំងឺឬមេរោគអ្វីនោះទេ ដោយសារយើងបានប្រើថ្នាំបាញ់បំបាត់ក្លិន និងមេរោគ ទោះរុយពងដាក់ក៏មិនអាចញាស់បានដែរ។ ការចិញ្ចឹមបែបនេះក៏មិនអាចឆ្លងជំងឺនោះដែរ ព្រោះជាធម្មតាការឆ្លងជំងឺបានតាមរយៈផ្លូវដង្ហើម និងក្រចកជើងជ្រូក តែយើងមានថ្នាំបាញ់បំបាត់ក្លិន ហើយការចិញ្ចឹមលើអង្កាមបែបនេះក្រចកជើងជ្រូកនៅស្អាតល្អ មិនប្រេះ ទើបមិនអាចឆ្លងបានឡើយ»។

ទាក់ទងទៅនឹងបច្ចេកទេសក្នុងការចិញ្ចឹមត្រូវបានលោកបញ្ជាក់ថា ៖ សម្រាប់ជ្រូកមេគេអាចធ្វើទ្រុងទំហំ ២x៣ម៉ែត្រ កម្ពស់ ១.៥ម៉ែត្រ ត្រូវប្រើអង្កាម ១២បាវ រួចបាចអំបិលលាយ ៣-៥គីឡូក្រាម ទើបប្រើទឹកថ្នាំធម្មជាតិដែលលាយជាមួយទឹកម្នាស់ ទឹកខ្មេះ ស្កររងូ ស្រាស លាយចូលគ្នាឱ្យសព្វ ប្រើចំណុះទឹក១០លីត្រ បាញ់នៅតាមទ្រុងដែលអាចជួយបំបាត់រុយ និងដង្កូវ។ ចំណែកឯការចាក់អង្កាមក្រាលបាតនេះផងដែរ គេត្រូវចាក់នៅលើដីផ្ទាល់ ចៀសវាងមានក្រាលបាតជាស៊ីម៉ង់ត៍ ព្រោះវាត្រូវការជ្រាបទើបមិនមានក្លិន។

ចំពោះរយៈពេលចិញ្ចឹមបើធៀបនឹងការចិញ្ចឹមធម្មតា ជ្រូកមេត្រូវការយៈពេលប្រហែលគ្នា ប៉ុន្តែសម្រាប់ជ្រូកសាច់អាចយឺតជាងគេ ១៥-២០ថ្ងៃ ព្រោះការលាយចំណីខ្លួនឯង និងពុំមានថ្នាំបំប៉ន។ នេះជាអ្វីដែលម្ចាស់កសិដ្ឋានខាងលើបានលើកឡើង។  

គួរបញ្ជាក់ដែរថា លោក សាវុធ បានរៀនបច្ចេកទេសពីប្រទេសជិតខាង និងចាប់ផ្ដើមដំបូងដោយផ្ដោតលើការចិញ្ចឹមមេជ្រូកយកកូនលក់ ដោយដាក់ដំបូង ៤០ក្បាល និងពង្រីកដល់ការចិញ្ចឹមជ្រូកសាច់រហូតដូចបច្ចុប្បន្ន។ ជាចុងក្រោយ លោក សាវុធ ក៏សូមលើកទឹកចិត្តឱ្យកសិករចិញ្ចឹមជ្រូកតាមបែបធម្មជាតិ ជាពិសេសការចិញ្ចឹមលើដីនេះវិញ ព្រោះវាគ្មានហានិភ័យ ជ្រូកមិនមានជំងឺ ចំណាយដើមតិច ៕