សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ជាទម្លាប់នាពេលកន្លងមក ប្រជាជនដែលរស់នៅតាមតំបន់ការពារធម្មជាតិ ឬតាមព្រៃភ្នំ តែងចូលទៅក្នុងព្រៃដើម្បីរកឃ្មុំ។ ប៉ុន្តែវាក៏មិនស្រួលពេកដែរ ដោយវាទាមទាររយៈពេលយូរ ហើយកាន់តែសំខាន់ទៀតនោះ គឺទាមទារឱ្យអ្នកយកឃ្មុំត្រូវចេះយកតាមបច្ចេកទេសថ្មី ដោយធ្វើយ៉ាងណាឱ្យមាននិរន្តរភាព។ ប៉ុន្តែយ៉ាងណា បើផ្អែកតាមតម្រូវការទឹកឃ្មុំបច្ចុប្បន្នការដើររកពីព្រៃតែមួយមុខច្បាស់ជាមិនអាចផ្គត់ ផ្គង់គ្រប់គ្រាន់នោះទេ ដូច្នេះហើយបានជាក្រសួងបរិស្ថានជំរុញ និងលើកទឹកចិត្តឱ្យមានការចិញ្ចឹមឃ្មុំបន្ថែមទៀត។
ក្នុងឱកាសចូលរួមដាំកូនឈើនៅក្នុងសហគមន៍តាខេះមានជ័យ នាថ្ងៃទី ២០មិថុនាកន្លងទៅ ឯកឧត្តម នេត្រ ភក្ក្រា រដ្ឋលេខាធិការក្រសួងបរិស្ថានបានមានប្រសាសន៍ថា ៖
“ឃ្មុំមាន២ប្រភេទ ប្រភេទឃ្មុំព្រៃ ជាឃ្មុំដែលរស់នៅក្នុងតំបន់ការពារធម្មជាតិតែម្ដង និងមួយប្រភេទទៀតគឺឃ្មុំចិញ្ចឹម…ដោយសារតែតម្រូវការទឹកឃ្មុំខ្ពស់ ដូច្នេះការប្រមូលផលពីក្នុងព្រៃតែមួយមុខគឺមិនរួចទេ អីចឹងការចិញ្ចឹមឃ្មុំក៏ជាផ្នែកមួយសំខាន់ ហើយវាជាផ្នែកមួយនៃការការពារ ថែរក្សាពូជឃ្មុំផង និងការបង្កើនជីវភាពសម្រាប់ពួកគាត់ផង។”
ជាក់ស្ដែង សហគមន៍តាខេះមានជ័យដែលស្ថិតក្នុងស្រុកសំឡូត ខេត្តបាត់ដំបងនេះ ក៏ជាសហគមន៍ មួយដែលចិញ្ចឹមឃ្មុំផងដែរ។ ក្នុងការចិញ្ចឹមឃ្មុំនេះដែរ សហគមន៍ទទួលបានជំនួយបច្ចេកទេស និងការបណ្ដុះបណ្ដាលបច្ចេកទេសចិញ្ចឹមពីមូនិធិ ម៉ាដក្សជូលីភីត (Maddox Julie-Pitt) ដែលរហូតមកដល់ពេលនេះ សហគមន៍បានពង្រីករហូតដល់ជាង ១០០ធុងនៃឃ្មុំហើយ។
ផ្អែកលើភាពជោគជ័យនៃសហគមន៍មួយនេះ ឯកឧត្តម នេត្រ ភក្ក្រា បានលើកទឹកចិត្តដល់ ៖
“សហគមន៍ផ្សេងៗទៀត សូមឱ្យអនុវត្តទៅតាមវិធីសាស្ត្រគំរូដែលសហគមន៍នេះអនុវត្តបានជោគជ័យ ហើយបន្ថែមនូវមុខរបរនេះ ព្រោះថាការចិញ្ចឹមនេះយើងមានបច្ចេកទេស្រាប់ៗ។ សម្រាប់ក្រសួងបរិស្ថាន ការអភិរក្សសត្វឃ្មុំមិនត្រឹមតែធ្វើឡើងតាមរយៈការជំរុញប្រជាពលរដ្ឋឱ្យចិញ្ចឹម ប៉ុណ្ណោះទេ ប៉ុន្តែក្រសួងផ្ទាល់ក៏មានការរៀបចំផែនការអភិរក្សឃ្មុំឱ្យមាននិរន្តរភាពផងដែរ។”
ទាក់ទិននឹងការរៀបចំផែនការនេះ ឯកឧត្តម នេត្រ ភក្ក្រា បានរៀបរាប់ថា ៖
“ការរៀបចំផែនការ អភិរក្សឃ្មុំឱ្យមាននិរន្ដរភាពគឺ ទី១ដើម្បីធានានូវការផ្គត់ផ្គង់ទឹកឃ្មុំប្រើប្រាស់ ទី២គឺសត្វឃ្មុំនេះជាជីវៈចម្រុះ ហើយដែលយើងអាចយកទឹកវាមកប្រើប្រាស់បាន តែយើងត្រូវមើលថែឃ្មុំឱ្យលើសពីការផ្ដល់ទឹកឃ្មុំ ព្រោះវាដើរតួនាទីយ៉ាងសំខាន់ក្នុងការអភិរក្សប្រព័ន្ធអេកូឡូស៊ី។”
ឯកឧត្តមបន្តមានប្រសាសន៍ទៀតដែរថា កន្លងមកក្រុមការងាររបស់ក្រសួងបានចុះបង្រៀនប្រជាពលរដ្ឋឱ្យពួកគេយកឃ្មុំប្រកបដោយនិរន្ដរភាព តាមរយៈការយកទឹកឃ្មុំ តែមិនហូបសាច់ឃ្មុំ។ ម្យ៉ាងទៀត វិធីសាស្រ្តយកឃ្មុំដោយប្រើប្រាស់ផ្សែង នឹងអាចធ្វើឱ្យឃ្មុំរត់ចោលសំបុក ដែលធ្វើឱ្យពួកគេបាត់បង់ ចំណូលនៅថ្ងៃក្រោយទៀត៕
Account
Security
Favourite Content