ភ្នំពេញ ៖ ការសន្សំប្រាក់នៅគ្រឹះស្ថានធនាគារ និងហិរញ្ញវត្ថុផ្លូវការមិនត្រឹមតែអាចជួយឱ្យប្រព័ន្ធហិរញ្ញវត្ថុរបស់លោកអ្នកកាន់តែរឹងមាំនោះទេ ថែមទាំងជួយឱ្យលោកអ្នកបង្កើតផែនការហិរញ្ញវត្ថុត្រឹមត្រូវ ពិសេសសម្រាប់គ្រួសាររបស់អ្នកនាពេលអនាគត ឬប្រើប្រាស់ចាំបាច់ក្នុងនាគ្រាអាសន្នណាមួយផងដែរ។

អ្នកជំនាញផ្នែកហិរញ្ញវត្ថុបានលើកឡើងថា ការសន្សំប្រាក់មិនត្រឹមតែជួយឱ្យមានបង្កើតប្រព័ន្ធហិរញ្ញវត្ថុរបស់បុគ្គលម្នាក់ៗឱ្យកាន់រឹងមាំនោះទេ លើសពីនេះ ការសន្សំនៅគ្រឹះស្ថានធនាគារ និងហិរញ្ញវត្ថុផ្លូវការនឹងរួមចំណែកជួយដល់ការអភិវឌ្ឍសង្គមសេដ្ឋកិច្ចផងដែរ។

លោកស្រី ម៉ា អមរ៉ា អនុប្រធាននាយកប្រតិបត្តិធនាគារ អេស៊ីលីដា ភីអិលស៊ី បានឱ្យដឹងថា ការសន្សំមានអត្ថប្រយោជន៍ខ្លាំងណាស់សម្រាប់ប្រជាពលរដ្ឋគ្រប់វ័យ ពិសេសជួយឱ្យសង្គមសេដ្ឋកិច្ចមានការរីកចម្រើនផងដែរ។ មនុស្សភាគច្រើនតែង​គិត​ថា ការសន្សំ​ប្រាក់ គឺ​ត្រូវ​តែ​ចាប់​ផ្តើម​ពី​ចំនួន​ដ៏​ច្រើនជាមុនសិន ប៉ុន្តែមិនដូច្នេះទេ។ បើទោះបីជា ការសន្សំដំបូងមានប្រាក់តែ ១០ ឬ២០ ម៉ឺនរៀលក្នុងមួយខែក៏ដោយ ហើយលោកអ្នកត្រូវសន្សំឱ្យបានទៀងទាត់ជារៀងរាល់ខែ យូរៗទៅ​ វានឹងក្លាយជាទម្លាប់សន្សំ។

លោកស្រី ម៉ា អមរ៉ា បានលើកឡើងថា ការសន្សំមិនចាំផ្តើមពីសន្សំធំៗនោះទេ លោកអ្នកអាចចាប់ផ្តើមពីការសន្សំតិចៗ ហើយនៅដែលលោកអ្នកអាចបង្កើតទម្លាប់សន្សំបានហើយ នោះលោកអ្នកនឹងកំណត់បានគោលដៅហិរញ្ញវត្ថុ ថាតើលោកអ្នកប្រើប្រាស់ប្រាក់សន្សំនោះ លើគោលបំណងអ្វី។ ឧទាហរណ៍ លោកអ្នកសន្សំដើម្បីប្រើប្រាស់លើការសិក្សារបស់កូនៗ ទិញលំនៅដ្ឋាន ឬត្រៀមសម្រាប់ការចូលនិវត្តន៍ជាដើម។

លោកស្រី ម៉ា អមរ៉ា បានថ្លែងដូច្នេះថា ៖

“ការសន្សំនឹងជួយលោកអ្នកសម្រេចបានគោលដៅហិរញ្ញវត្ថុនាពេលអនាគត ហើយថែមទាំងជួយឱ្យផ្លូវចិត្តរបស់លោកអ្នកមានលំនឹងផ្នែកហិរញ្ញវត្ថុ ព្រោះការសន្សំអ្នកជួយឱ្យលោកអ្នកស្ថិរភាពហិរញ្ញវត្ថុ។ នៅពេលដែលលោកអ្នកបង្កើតទម្លាប់សន្សំ នោះមានន័យថា លោកអ្នកបានរៀបចំការផែនការហិរញ្ញវត្ថុរួចរាល់ តាមរយៈការបែងចែកចំណូល ចំណាយ និងសន្សំរបស់អ្នកបានច្បាស់លាស់”។

លោកស្រីបានថ្លែងបន្តថា នៅពេលដែលលោកអ្នកបានដាក់សន្សំនៅគ្រឹះស្ថានធនាគារ និងហិរញ្ញវត្ថុផ្លូវការ នោះលោកអ្នកបានជួយដល់ការអភិវឌ្ឍសង្គមសេដ្ឋកិច្ច ព្រោះគ្រឹះស្ថានធនាគារ និងហិរញ្ញវត្ថុដើរតួជាអន្តរការី ក្នុងការប្រើប្រាស់ជាដើមទុន និងពាំនាំប្រាក់ពីការសន្សំ ដើម្បីបញ្ចេញជួយទៅដល់អាជីវករ ដែលមានតម្រូវការហិរញ្ញវត្ថុចាំបាច់ក្នុងការពង្រីកអាជីវកម្ម និងបង្កើតមុខរបរ។ កត្តានេះហើយដែលជួយដល់ការអភិវឌ្ឍសង្គម-សេដ្ឋកិច្ចឱ្យមានការរីកចម្រើន៕