ភ្នំពេញ៖ ចំការកំពង់ល្ពៅ ស្ថិតនៅស្រុកសំឡូត ខេត្តបាត់ដំបង នឹងផលិតផ្លែត្រសក់ផ្អែមប្រមាណ ៣០០តោនក្នុងមួយឆ្នាំ ដើម្បី​ផ្គត់ផ្គង់ឲ្យគម្រោង Local Proud សម្រាប់នាំចេញទៅទីផ្សារបរទេស។ នេះបើយោងតាមកិច្ចសន្យាផលិតកម្មសម្រាប់ឆ្នាំ២០២៦ ស្ដីពីការផលិត និងផ្គត់ផ្គង់ផលិតផលកសិកម្ម “ផ្លែត្រសក់ផ្អែម” ដែលត្រូវបានព្រមព្រៀងរួមគ្នាកាលពីពេលកន្លងទៅថ្មីៗនេះ។

យោងតាមសភាពាណិជ្ជកម្មកម្ពុជា កិច្ចព្រមព្រៀងនេះមានគោលបំណងផលិត និងផ្គត់ផ្គង់ផលិតផលកសិកម្ម “ផ្លែត្រសក់ផ្អែម” ដើម្បីនាំចេញទៅកាន់ទីផ្សារអន្តរជាតិ។ តាមរយៈកិច្ចសន្យានេះដែរ ចំការកំពង់ល្ពៅនឹងទទួលខុសត្រូវផលិតផ្លែត្រសក់ផ្អែមក្នុងបរិមាណ ៣០០ តោនក្នុងមួយឆ្នាំ ដែលមានគុណភាពស្របតាមស្ដង់ដារអន្តរជាតិ ដើម្បីផ្គត់ផ្គង់ឲ្យគម្រោង Local Proud (LP) ដឹកចេញទៅកាន់ទីផ្សារបរទេស។

គម្រោង Local Proud (LP) មានបំណងជំរុញការអភិវឌ្ឍន៍វិស័យកសិកម្មនៅកម្ពុជា តាមរយៈការចូលរួមជាមួយកសិករ និងចម្ការដំណាំក្នុងស្រុក ដើម្បីបង្កើនគុណភាពផលិតផល ការធានាតម្លៃទីផ្សារ និងការបង្កើតអត្ថប្រយោជន៍សេដ្ឋកិច្ចដល់សហគមន៍ជនជាតិខ្មែរ។ ការចុះកិច្ចសន្យានេះ ជាជំហានសំខាន់មួយក្នុងការលើកកម្ពស់ផលិតផលកសិកម្មខ្មែរ ឲ្យមានសមត្ថភាពប្រកួតប្រជែងលើទីផ្សារអន្តរជាតិ និងជួយលើកតម្កើងកេរ្ដិ៍ឈ្មោះ “ផលិតផលកម្ពុជា- Made in Cambodia” ឲ្យកាន់តែមានឥទ្ធិពលនៅលើទីផ្សារពាណិជ្ជកម្មពិភពលោក។

លោក ស្រី សំបាន អ្នកគ្រប់គ្រងកសិដ្ឋាននៃចំការកំពង់ល្ពៅ បានប្រាប់ AMS Economy  ថា៖ ត្រសក់ផ្អែមនេះ ដាំដុះនៅក្នុងផ្ទះសំណាញ់ជាង ៣០០ខ្នង ក្នុងទំហំដីប៉ាន់ស្មានប្រហែល ​៧ ទៅ ៨ហិកតា សម្រាប់ផ្គត់ផ្គង់ឱ្យតែគម្រោង Local Proud ប៉ុណ្ណោះ។

លោកស្រី ប៉ាន់ អម្រឹតធីតា ប្រធានក្រុមប្រឹក្សាភិបាល ក្រុមហ៊ុន ជីជីអេ អ៊ែតវ៉ាយហ្សឺរី ឯ.ក និងជានាយិកាគម្រោង LOCAL PROUD (LP) បានប្រាប់ AMS Economy ថា ៖ ចំការកំពង់ល្ពៅ មានការដាំដុះតាមបច្ចេកទេសស្តង់ដារ និងមានពូជល្អ ហើយមានរសជាតិផ្អែមឆ្អាញ់ និងមានលក្ខណៈពិសេសមួយ គឺស្រួយ ដែលអាចប្រកួតប្រជែងលើទីផ្សារបាន និងជំនួសផលិតផលនាំចូល។

លោកស្រីបានបន្ថែមថា៖

«បច្ចុប្បន្ន យើងទទួលបានការកក់ទុកមុនជាបណ្តើរៗសម្រាប់រដូវប្រមូលផលឆ្នាំក្រោយ និងកំពុងពង្រីកទីផ្សារទៅក្រៅប្រទេសថែមទៀត ជាពិសេស នៅខែវិច្ឆិកានេះ នឹងយកត្រសក់ផ្អែមរបស់ខ្មែរយើងទៅឱ្យគេសាករសជាតិ»។

សូមជម្រាបដែរថា Local Proud បានបង្កើតឡើងនៅក្នុងអំឡុងខែមីនា ឆ្នាំ២០២៥ ក្នុងនាមជាអាជីវកម្ម ESG (អាជីវកម្មដែលផ្តោតលើបរិស្ថាន សង្គម និងអភិបាលកិច្ច) ជាមួយនឹងចក្ខុវិស័យក្នុងការជំរុញវិស័យកសិកម្មរបស់ប្រទេសកម្ពុជាឱ្យកាន់តែរីកចម្រើន ជាពិសេសផ្គត់ផ្គង់បានទាំងនៅក្នុងស្រុក និងទីផ្សារអន្តរជាតិ៕