ភ្នំពេញ៖ សម្តេចធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា បានប្រកាសពីការបន្ធូរបន្ថយ និងបន្តលើកលែងពន្ធសម្រាប់អាកាសចរណ៍កម្ពុជា និងអាជីវកម្មទេសចរណ៍ ដែលរាជរដ្ឋាភិបាល អាណត្តិទី៧រំពឹងថា ការបន្តសុពលភាពនៃការលើកលែងពន្ធនេះ អាចជួយសម្រាលបន្ទុកប្រតិបត្តិករក្នុងវិស័យទេសចរណ៍ ជាពិសេសការដឹកជញ្ជូនភ្ញៀវទេសចរមកកាន់កម្ពុជាកាន់តែច្រើន។

បច្ចុប្បន្ននេះ រាជរដ្ឋាភិបាលកម្ពុជា បាន និងកំពុងគិតគូរបន្តជួយជ្រោមជ្រែងដល់វិស័យអាកាសចរណ៍បន្ថែមទៀត តាមរយៈការអនុគ្រោះផ្សេងៗ រួមមានអនុគ្រោះពន្ធជាដើម ដើម្បីឱ្យក្រុមហ៊ុនអាកាសចរណ៍មានលទ្ធភាពហោះហើរដឹកជញ្ជូនអ្នកដំណើរមកកាន់កម្ពុជាបានកាន់តែច្រើន។

សម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា នៅក្នុងពិធីបើកសន្និសីទស្តីពី “ចក្ខុវិស័យប្រទេសកម្ពុជាឆ្នាំ២០២៥ «យុទ្ធសាស្ដ្រកំណើនថ្មីរបស់កម្ពុជា៖ អាទិភាពសម្រាប់ការអភិវឌ្ឍប្រកបដោយគុណភាព និងនិរន្ដរជាតិ» របស់វិទ្យាស្ថានបណ្ដុះបណ្ដាល និងស្រាវជ្រាវដើម្បីអភិវឌ្ឍន៍កម្ពុជា (CDRI) បានថ្លែងថា ៖

«ខ្ញុំបានជជែកជាមួយឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន អំពីក្រុមហ៊ុនអាកាចរណ៍របស់យើង យើងត្រូវថែមអ្វីទៀតជួយគាត់ ទម្លាក់ពន្ធកាត់ទុក ទម្លាក់អ្វីទៀត ដើម្បីជួយគាត់ក្នុងរយៈពេលមួយ ដើម្បីឱ្យគាត់ហោះបានប្រមូលទេសចរមក នេះយើងត្រូវជួបជាប្រចាំ ដើម្បីសម្រូលទិន្នន័យ មានបញ្ហាអីយើងដោះស្រាយ»។

សូមជម្រាបថា វិបត្តិនៃជំងឺកូវីដ-១៩ បានធ្វើឱ្យវិស័យអាកាសចរណ៍រងគ្រោះយ៉ាងខ្លាំង ដោយសារគ្មានការហោះហើរ។ ជាមួយគ្នានេះ ដើម្បីដោះស្រាយការលំបាកនេះ រាជរដ្ឋាភិបាលកម្ពុជា បានដាក់ចេញជាបន្តបន្ទាប់នូវការអនុគ្រោះផ្សេងៗ រួមទាំងផ្នែកពន្ធផងដែរ។ កាលពីខែកញ្ញា ឆ្នាំ២០២៤ រាជរដ្ឋាភិបាលកម្ពុជា បានប្រកាសបន្តអនុគ្រោះពន្ធកាត់ទុក និងអាករពិសេសចំពោះក្រុមហ៊ុនអាកាសចរណ៍រហូតដល់ឆ្នាំ២០២៧។

សូមជម្រាបថា ក្នុងគោលបំណងជួយសម្រាលបន្ទុករបស់ក្រុមហ៊ុនអាកាសចរណ៍ ចំពោះការជួលយន្តហោះពីក្រុមហ៊ុនក្រៅប្រទេស ក៏ដូចជាដើម្បីជួយសម្រាលបន្ទុករបស់ប្រជាពលរដ្ឋក្នុងការធ្វើដំណើរតាមផ្លូវអាកាស ក្រសួងសេដ្ឋកិច្ច និងហិរញ្ញវត្ថុ សូមធ្វើការណែនាំអំពីការអនុវត្តពន្ធកាត់ទុក និងអាករពិសេស ដូចខាងក្រោម៖

១- បន្ថយអត្រាពន្ធកាត់ទុកពី ១៤ភាគរយ មកត្រឹម១០ភាគរយ ចំពោះការជួលយន្តហោះពីក្រៅប្រទេសមកប្រកបអាជីវកម្មរបស់ក្រុមហ៊ុនអាកាសចរណ៍ក្នុងស្រុក។

២- បន្ថយអត្រាអាករពិសេសពី១០ភាគរយ មកត្រឹម៥ភាគរយ ចំពោះសេវាដឹកជញ្ជូនអ្នកដំណើរតាមផ្លូវអា​កាស ដោយពុំគិតថា ការដឹកជញ្ជូនអ្នកដំណើរធ្វើឡើងដោយក្រុមហ៊ុនអាកាសចរណ៍ក្នុងស្រុក ឬក្រុមហ៊ុនអាកាសចរណ៍បរទេសឡើយ។

៣- ការអនុគ្រោះដូចមានចែងក្នុងចំណុចទី១ និងចំណុចទី២ ខាងលើនេះ មានរយៈពេល ៣ឆ្នាំ គិតចាប់ពីថ្ងៃទី១ ខែមិថុនា ឆ្នាំ២០២៤ ដល់ ថ្ងៃទី៣១ ខែឧសភា ឆ្នាំ២០២៧៕

លោក ហូ វណ្ណឌី ទីប្រឹក្សាសមាគមទីភ្នាក់ងារទេសចរណ៍កម្ពុជា បានប្រាប់ AMS Economy ថា ដោយសារវិស័យទេសចរណ៍នេះ ជាសសរស្តម្ភមួយក្នុងចំណោមសសរស្តម្ភផ្សេងទៀតរបស់ប្រទេស បង្គំការវិនិយោគនៃវិស័យទេសចរណ៍ ជាការពូនផ្ដុំ វិស័យទេសចរណ៍ទាំងមូលទាំងអ្នកដឹកជញ្ជូន អ្នកដឹកទេសចរតាមរថយន្ត ឬក៏ជាសេវាទូកដរ និងរហូតដល់សេវាកម្មថ្នាក់មូលដ្ឋាន មានសណ្តាប់ធ្នាប់ អនាម័យ សុវត្ថិភាពចំណីអាហារជាដើម។

ទោះបីយ៉ាងណា លោកទីប្រឹក្សាសមាគមទីភ្នាក់ងារទេសចរណ៍កម្ពុជារូបនេះបានគូសបញ្ជាក់ថា ថ្នាក់ដឹកនាំ លោកតែងក្រើនរំលឹក និងតែងតែគិតគូរ ផ្តល់នូវចក្ខុវវិស័យ និងមាគ៌ាមួយឱ្យមានការរក្សា ក៏ដូចជាការបង្កើនវិស័យទេសចរណ៍ឱ្យមានភាពល្អប្រសើរឡើងវិញ ។

លោក ហូ វណ្ណឌី បានលើកឡើងថា ៖

«មុនពេលកូវីដ យើងមានរហូតទៅដល់ ៣០ ក្រុមហ៊ុនអាកាសចរណ៍ តែមកដល់ពេលនេះនៅមិនទាន់ដល់ចំនួនពីមុនកូវីដនៅឡើយទេ ដូច្នេះ អាកាសចរណ៍ ដែលមានហើយ យើងពង្រឹងគាត់ ហើយយើងទាញយកអាកាសចរណ៍ថ្មីៗ ។ ដូច្នេះ ទាំងការពង្រឹងវិស័យអាកាសចរណ៍ ទាំងការពង្រឹងទៅដល់អ្នកធ្វើសេវាកម្មពាក់ព័ន្ធដទៃទៀត គឺត្រូវយកចិត្តទុកដាក់ធ្វើឱ្យល្អប្រសើរដូចគ្នា»។

លោក ហូ វណ្ណឌី ក៏បានបញ្ជាក់ថា វិស័យឯកជនសូមគាំទ្រនូវចក្ខុវិស័យរបស់រាជរដ្ឋាភិបាល ព្រោះការខិតខំរបស់វិស័យឯកជនក៏មិនអាចសម្រេចទៅមុខរួចនោះទេប្រសិនបើមិនមានភ្លើងខៀវ ឬមិនមានការគាំទ្រពីស្ថាប័នសាធារណៈ ពិសេសថ្នាក់ដឹកនាំ ។ ដូច្នេះ ការចូលរួមដោះស្រាយពីសំណាក់ថ្នាក់ដឹកនាំ គឺជាកម្លាំងចិត្តមួយដ៏ធំដល់ផ្នែកពាក់ព័ន្ធ និងវិស័យឯកជនទាំងមូល៕