ភ្នំពេញ ៖ សប្ដាហ៍ថាមពលស្អាត (Clean Energy Week – CEW) ឆ្នាំ២០២៥ ដែលជាព្រឹត្តិការណ៍ធំបំផុត និងមានឥទ្ធិពលខ្លាំងសម្រាប់វិស័យថាមពលស្អាតនៅកម្ពុជា បានបញ្ចប់នៅថ្ងៃនេះ ដោយមានកម្មវិធី Toast to Clean Energy និងពិធីប្រគល់ពានរង្វាន់ថាមពលស្អាត (Clean Energy Awards) ។ ក្នុងការប្រារព្ធលើកទី៨នេះ សប្ដាហ៍ថាមពលស្អាតឆ្នាំ២០២៥ បានបង្ហាញពីវឌ្ឍនភាពរបស់កម្ពុជាក្នុងការអភិវឌ្ឍន៍ថាមពលកកើតឡើងវិញបង្ហាញពីកិច្ចខិតខំប្រឹងប្រែងទាំងឡាយដែលនាំមកនូវអត្ថប្រយោជន៍ជាច្រើនសម្រាប់ប្រទេស និងជួយឱ្យកម្ពុជាក្លាយជាអ្នកដឹកនាំថ្មីក្នុងអន្តរកាលថាមពលនៅអាស៊ីអាគ្នេយ៍។

កម្មវិធីពេញមួយសប្ដាហ៍នេះបានផ្តោតលើរបៀបដែលថាមពលស្អាតអាចពង្រឹងឧស្សាហកម្មដែលមានស្រាប់របស់កម្ពុជាដូចជាវិស័វាយនភណ្ឌ និងវិស័យទេសចរណ៍ ខណៈពេលដែលទាក់ទាញការវិនិយោគថ្មីរាប់លានដុល្លារនៅក្នុងឧស្សាហកម្មដែលមានតម្រូវការប្រើប្រាស់ថាមពលច្រើន និងបច្ចេកវិទ្យាដែលដំណើរការដោយថាមពលស្អាត។ បន្ថែមពីលើនេះ សប្ដាហ៍ថាមពលស្អាតក៏បានរៀបចំកម្មវិធីដែលប្រមូលផ្ដុំសាធារណជនរួមមានការចាក់បញ្ចាំងយន្តឯកសារខ្លីដែលត្រូវបានផលិតឡើងដោយនិស្សិតកម្ពុជា រៀបរាប់ពីរឿងរ៉ាវនៃការច្នៃប្រឌិត និងភាពជោគជ័យនៃការប្រើប្រាស់ថាមពលស្អាត បូករួមនឹងការតាំងពិព័រណ៍ស្នាដៃសិល្បៈ Solarpunk របស់សិល្បៈករកម្ពុជា និងស្នាដៃឌីជីថលដោយសិល្បករមកពីទូទាំងអាស៊ីអាគ្នេយ៍។

ដោយគូសបញ្ជាក់ពីសារៈសំខាន់នៃអន្តរកាលថាមពលស្អាតចំពោះការអភិវឌ្ឍន៍សង្គម និងសេដ្ឋកិច្ចរបស់កម្ពុជា លោក ង៉ោ សឺន ណត្តារុណ នាយកប្រចាំតំបន់របស់អង្គការអេននីជីឡេបអាស៊ី បានលើកឡើងថា៖ «ឆ្នាំនេះ យើងកំណត់ផ្លូវថ្មីមួយ ដើម្បីបង្ហាញថាថាមពលស្អាតមិនមែនគ្រាន់តែជាកត្តាលិករសម្រាប់ដោះស្រាយបញ្ហាបម្រែបម្រួលអាកាសធាតុដ៏រឹងមាំប៉ុណ្ណោះទេ ប៉ុន្តែជាកត្តាជំរុញសេដ្ឋកិច្ចដ៏មានឥទ្ធិពលមួយផងដែរ។ ថាមពលស្អាតនឹងជួយកម្ពុជាការពារឧស្សាហកម្មដែលមានស្រាប់ ទន្ទឹមនឹងការទាក់ទាញឧស្សាហកម្មថ្មីៗ។វានឹងជួយកម្ពុជាឱ្យសម្របខ្លួនបានកាន់តែលឿនទៅនឹងការផ្លាស់ប្តូរច្បាប់ពាណិជ្ជកម្ម និងការបង្កើនពន្ធ ខណៈពេលដែលការបង្កើនភាពប្រកួតប្រជែង»។

ឆ្លុះបញ្ចាំងពីភាពជោគជ័យក្នុងសប្តាហ៍នេះ ឯកអគ្គរដ្ឋទូតអូស្ត្រាលីប្រចាំកម្ពុជា ឯកឧត្តម ដេរិក យីប មានប្រសាសន៍ថា «ក្នុងនាមជាដៃគូស្ថាបនិកមួយនៃសប្តាហ៍ថាមពលស្អាត អូស្ត្រាលីរីករាយក្នុងការបន្តគាំទ្រអន្តរកាលថាមពលស្អាតរបស់កម្ពុជា។ សប្តាហ៍ថាមពលស្អាតគឺជាឱកាសមួយដើម្បីអបអរសាទរភាពរីកចម្រើនរបស់ប្រទេសកម្ពុជាក្នុងការពង្រីកលទ្ធភាពក្នុងការប្រើប្រាស់ថាមពលកកើតឡើងវិញ និងពិភាក្សាអំពីឱកាស និងបញ្ហាប្រឈមនៃអន្តរកាលថាមពលស្អាត»។

ចំណុចពិសេសនៃ សប្តាហ៍ថាមពលស្អាតឆ្នាំ ២០២៥ គឺពិធីប្រគល់ពានរង្វាន់ថាមពលស្អាត ដោយពានរង្វាន់នេះទទួលស្គាល់ការរួមចំណែកឆ្នើមពីបុគ្គល ស្ថាប័ន និងគំនិតផ្តួចផ្តើមនានា ដែលជំរុញការអភិវឌ្ឍថាមពលស្អាតនៅកម្ពុជា។ ពានរង្វាន់នេះបានអបអរសាទរកិច្ចខិតខំប្រឹងប្រែងដ៏ឆ្នើមក្នុងនោះរួមមាន ពានរង្វាន់ជើងឯកថាមពលស្អាត (ដែលត្រូវបានឈ្នះដោយបណ្ឌិត គីនណាឡេត វង់ចន្ទ) ពានរង្វាន់គម្រោងថាមពលស្អាតសម្រាប់សហគមន៍ដែលមានឥទ្ធិពល (ដែលត្រូវបានឈ្នះដោយ ក្រុមហ៊ុន សិលាផិបភើរ ខូអិលធីឌី) និងពានរង្វាន់ប្រសិទ្ធភាពថាមពល (ដែលត្រូវបានឈ្នះដោយ យូនីសេហ្វប្រចាំកម្ពុជា)។

សប្ដាហ៍ថាមពលស្អាតត្រូវបានបិទបញ្ចប់ដោយកម្មវិធី Toast to Clean Energy ដែលជាកិច្ចអបអរសាទរមួយដើម្បីទទួលស្គាល់កិច្ចខិតខំប្រឹងប្រែងរួម និងភាពជាដៃគូដែលជំរុញរបៀបវារៈថាមពលស្អាតរបស់កម្ពុជា។ ការប្រារព្ធពិធីបិទនេះ បានឆ្លុះបញ្ចាំងពីការប្តេជ្ញាចិត្តដ៏មុតមាំរបស់រាជរដ្ឋាភិបាលកម្ពុជាដែលកំពុងដាក់ប្រទេសកម្ពុជានៅលើផ្លូវប្រកបដោយនិរន្តរភាព និងធន់។

សប្ដាហ៍ថាមពលស្អាតជាព្រឹត្តិការណ៍ដ៏សំខាន់របស់ប្រទេសកម្ពុជា ដែលផ្តោតលើការជំរុញដំណោះស្រាយថាមពលស្អាត។ ព្រឹត្តិការណ៍នេះជាវេទិកាសម្រាប់ចែករំលែកចំណេះដឹង កិច្ចសហការ និងការអភិវឌ្ឍន៍គោលនយោបាយដើម្បីពន្លឿនអន្តរកាលថាមពលស្អាតនៅកម្ពុជា។ ព្រឹត្តិការណ៍នេះត្រូវរៀបចំដោយអង្គការអេននីជីឡេបអាស៊ី ក្រោមភាពជាដៃគូជាមួយរាជរដ្ឋាភិបាលកម្ពុជា និងសហស្ថាបនិកអូស្រ្តាលី និងកម្មវិធីអភិវឌ្ឍន៍សហប្រជាជាតិ (យូអិនឌីភី)។

យូអិនឌីភីបានជំរុញកិច្ចសន្ទនាស្តីពីការនវានុវត្ត និងដំណោះស្រាយគោលនយោបាយ រួមទាំងហិរញ្ញប្បទានបៃតង និងការកាត់បន្ថយហានិភ័យ ដើម្បីពន្លឿនការផ្លាស់ប្តូររបស់កម្ពុជាឆ្ពោះទៅអនាគតថាមពលប្រកបដោយនិរន្តរភាព។ យូអិនឌីភីត្រៀមខ្លួនជាស្រេចក្នុងការធ្វើការជាមួយរាជរដ្ឋាភិបាលកម្ពុជា ដើម្បីជំរុញយន្តការហិរញ្ញប្បទានប្រកបដោយភាពច្នៃប្រឌិត និងបង្កើតលក្ខខណ្ឌដែលអាចជំរុញអន្តរកាលថាមពលកាបូនទាប។

ឯកឧត្តមបណ្ឌិត អ៊ាង សុផល្លែត រដ្ឋមន្ត្រីក្រសួងបរិស្ថានបានសង្កត់ធ្ងន់ថា «រាជរដ្ឋាភិបាលកម្ពុជាបានកំណត់មហិច្ឆិតាក្នុងការធ្វើពិពិធកម្មវិស័យថាមពលរបស់យើង

កាត់បន្ថយការពឹងផ្អែកលើឥន្ធនៈហ្វូស៊ីល និងការពន្លឿនប្រភពថាមពលស្អាត និងកកើតឡើងវិញ។ កម្ពុជាមានវឌ្ឍនភាពគួរឱ្យកត់សម្គាល់ក្នុងការលើកកម្ពស់និរន្តរភាពបរិស្ថាន ទន្ទឹមនឹងការពង្រីកលទ្ធភាពប្រើប្រាស់អគ្គិសនី និងការបង្កើនចំណែកនៃថាមពលកកើតឡើងវិញ ដែលបានកើនឡើងពី ០.៣% ក្នុងឆ្នាំ២០១៤ ដល់ជាង ៥០% ក្នុងឆ្នាំ ២០២៤ ។ លើសពីនេះ ផែនការជាតិរួមចំណែកឆ្លើយតបនឹងការប្រែប្រួលអាកាសធាតុនៅកម្ពុជា ដំណាក់កាលទី៣ (NDC 3.0) បានបង្ហាញផ្លូវច្បាស់លាស់ក្នុងការកាត់បន្ថយឧស្ម័នផ្ទះកញ្ចក់ពីវិស័យចំនួនប្រាំ។ វិស័យថាមពល រួមទាំងការដឹកជញ្ជូនថាមពល ការផលិត និងការសាងសង់ គឺជាចំណុចសំខាន់មួយក្នុងការកាត់បន្ថយឧស្ម័នផ្ទះកញ្ចក់ និងលើកកម្ពស់ការងារបៃតង និងបរិយាបន្នសង្គម។

សម្រាប់ការសាកសួរព័ត៌មាន សូមទាក់ទង៖

ស្ថានទូតអូស្ត្រាលីប្រចាំកម្ពុជា

Media.Cambodia@dfat.gov.au

អង្គការអេននីជីឡេបអាស៊ី

កញ្ញា ញាណ វិភាវី

ប្រធានផ្នែកទំនាក់ទំនង

vipheavy@energylab.asia