ភ្នំពេញ ៖ សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា នៅព្រឹកថ្ងៃទី០៤ ខែមេសា ឆ្នាំ២០​២៣ បានដឹកនាំគណៈប្រតិភូជាន់ខ្ពស់ទៅចូលរួមកិច្ចប្រជុំកំពូលគណៈកម្មការទន្លេមេគង្គលើកទី៤ នៅទីក្រុងវៀងចន្ទន៍ ប្រទេសឡាវ ដោយប្រមុខដឹកនាំទន្លេមេគង្គនឹងមានកិច្ចពិភាក្សាជាច្រើន រួមមានទាំងផលប្រយោជន៍សេដ្ឋកិច្ចរបស់អ្នករស់នៅតាមដងទន្លេមេគង្គ ការថែទាំបរិស្ថាន ការថែទាំតុល្យភាពអេកូឡូស៊ី សិក្សាពីការទប់ទល់នឹងគ្រោះទឹកជំនន់ គ្រោះរាំងស្ងួត ការប្រើប្រាស់ទឹក និងធនធានទន្លេមេគង្គប្រកបដោយចីរភាព។

ក្រសួងការបរទេសកម្ពុជាបានឱ្យដឹងថា កិច្ចប្រជុំកំពូលគណៈកម្មការទន្លេ​មេគង្គ​លើក​ទី​៤ ដែលធ្វើឡើងនៅថ្ងៃទី០៥ ខែមេសា ឆ្នាំ២០២៣ នៅប្រទេសឡាវ នឹងធ្វើឡើងក្រោមមូលបទ «នវានុវត្តន៍ និងកិច្ចសហប្រតិបត្តិការសម្រាប់អាងទន្លេមេគង្គ ដែលមានសន្តិសុខទឹក និងប្រកបដោយចីរភាព»។

កិច្ចប្រជុំកំពូលខាងលើនឹងពិនិត្យឡើងវិញអំពីវឌ្ឍនភាព និងសមិទ្ធផលសំខាន់ៗ​ដែល​គណៈកម្មការទន្លេមេគង្គសម្រេចបានតាមរយៈការលើកកម្ពស់កិច្ចខិតខំប្រឹងប្រែងរួមគ្នា និងភាពជាដៃគូឆ្ពោះទៅសម្រេចបាននូវគោលដៅអភិវឌ្ឍន៍ប្រកបដោយចីរភាពក្នុងអាងទន្លេមេគង្គចាប់តាំងពីកិច្ចប្រជុំកំពូលគណៈកម្មការទន្លេមេគង្គលើកទី៣ កាលពីឆ្នាំ២០១៨ នៅប្រទេសកម្ពុជា។

កិច្ចប្រជុំក៏នឹងពិភាក្សាអំពីបញ្ហាប្រឈម​ដែលកំពុងកើតមាននៅ​ក្នុង​អាង​ទន្លេមេគង្គ និងកំណត់ទិសដៅយុទ្ធសាស្ត្រនាពេលអនាគត ដើម្បីរួមគ្នា​ដោះស្រាយ​បញ្ហា​ប្រឈមក្នុងអាងទន្លេមេគង្គឱ្យកាន់តែមានប្រសិទ្ធភាព ព្រមទាំងបន្តជំរុញ​កិច្ចសហ​ប្រតិបត្តិការ និងភាពជាដៃគូក្នុងតំបន់ សម្រាប់ចីរភាពទន្លេមេគង្គ។

ឯកឧត្តម ស្រ៊ី ថាមរ៉ុង្គ រដ្ឋមន្ត្រីប្រតិភូអមនាយករដ្ឋមន្ត្រីបានថ្លែងថា ធ្វើឡើងតបតាមការអញ្ជើញរបស់លោក សនសៃ ស៊ីផាន់ដន នាយករដ្ឋមន្ត្រីឡាវ ដែលកិច្ចប្រជុំនឹងមានការពិភាក្សាធ្វើយ៉ាងណា ដើម្បីថែរក្សាអាងទន្លេមេគង្គ ទឹកទន្លេមេគង្គ ដើម្បីផលប្រយោ​ជន៍ការរស់រានមានជីវិត អ្នកនៅតាមអាងដងទន្លេមេគង្គ ដែលអាចទទួលផលពីទន្លេមេគង្គ។ ទន្ទឹមនឹងនេះ ដោយសារតែការប្រែប្រួលអាកាសធាតុដែលមិនអាចទាញទុកជាមុនបាន ប្រមុខដឹកនាំទន្លេមេគង្គ ក៏នឹងចែករំលែកពីវិធានការរបស់ប្រទេសខ្លួន ដើម្បីបន្ស៉ាំខ្លួននឹងអាកាសធាតុទៀតផង។

សូមបញ្ជាក់ថា គណៈកម្មការទន្លេមេគង្គ (MRC) គឺជាស្ថាប័នអន្តររដ្ឋាភិបាលដែលបំពេញ​ការងារដើម្បីជួយសម្រួលដល់កិច្ចសហប្រតិបត្តិការជុំវិញការអភិវឌ្ឍ និងគ្រប់គ្រង​តំបន់​អាងទន្លេមេគង្គប្រកបដោយចីរភាព។ សមាជិករបស់គណៈកម្មការនេះ រួមមាន ប្រទេសកម្ពុជា ឡាវ ថៃ និងវៀតណាម។ គណៈ​កម្មការទន្លេមេគង្គបំពេញតួនាទីជាវេទិកាសម្រាប់ការទូតផ្នែកទឹក និងកិច្ចសហប្រតិ​បត្តិការ​ថ្នាក់តំបន់ ដែលតាមរយៈវេទិកានេះ ប្រទេសជាសមាជិកធ្វើការចែករំលែកអត្ថប្រយោជន៍ ដែលបានពីធនធានទឹករួម និងឆ្លើយតបចំពោះបញ្ហាប្រឈមឆ្លង​ដែននៅក្នុងតំបន់​អាង​ទន្លេ​នេះ បើទោះបីជាប្រទេសសមាជិកទាំងនេះមានផលប្រយោជន៍ជាតិខុសគ្នាយ៉ាង​ណាក៏​ដោយ​។

គណៈកម្មការនេះ ក៏បំពេញតួនាទីជាមជ្ឈមណ្ឌលចំណេះដឹងសម្រាប់ជំរុញឱ្យមានការ​តាក់​តែង​គោលនយោបាយផ្អែកតាមភស្តុតាងជាក់ស្ដែងផងដែរ។ គណៈកម្មការនេះ ផ្ដល់​ជំនួយ​បច្ចេកទេស និងបង្កើតជាឧបករណ៍ដើម្បីជួយឱ្យប្រទេសជាសមា​ជិកធ្វើការសម្រេច​ចិត្ត​ផ្អែក​តាមព័ត៌មានត្រឹមត្រូវ។

សូមបញ្ជាក់ថា គណៈកម្មការទន្លេមេគង្គត្រូវបានបង្កើតឡើងនៅពេលប្រទេសកម្ពុជា ឡាវ ថៃ និង​វៀត​ណាម​ ​ចុះហត្ថលេខាលើកិច្ចព្រមព្រៀង ស្ដីពីកិច្ចសហប្រតិបត្តិការ​សម្រាប់ការអភិវឌ្ឍ​ប្រកប​ដោយ​ចីរភាពនៅតំបន់អាងទន្លេ​មេគង្គ ដែលហៅកាត់ថា កិច្ចព្រមព្រៀងទន្លេមេគង្គកាលពីថ្ងៃទី៥ ខែមេសា ឆ្នាំ១៩៩៥ (1995 Mekong Agree​ment) ។

ប្រទេសជាសមាជិកបានឯកភាពសហការជាមួយគ្នាលើវិស័យជាច្រើន ដូចជា វិស័យ​នេ​សាទ ការគ្រប់គ្រងទឹកជំនន់ ធារាសាស្ដ្រ វារីអគ្គិសនី និងនាវាចរណ៍។ ប្រទេសចិន និង​មីយ៉ាន់ម៉ា ដែលស្ថិតនៅផ្នែកខាងលើបង្អស់នៃលំហូរទន្លេមេគង្គ គឺជាដៃគូសន្ទនារបស់ MRC ចាប់ពីតាំងពីឆ្នាំ១៩៩៦មក៕