មិនថាទោះជាការប្រកបមុខរបរ ឬអាជីវកម្មខ្នាតតូច-ធំនោះទេ ឱ្យតែមានភាពសុចរិត គឺសុទ្ធតែមានតម្លៃ ថ្លៃថ្នូរ ហើយអាចរកចំណូលសម្រាប់ផ្គត់ផ្គង់ជីវភាពគ្រួសារបានយ៉ាងប្រាកដ ជាពិសេសប្រសិនបើមានផែនការ និងគោលដៅត្រឹមត្រូវគេជឿថាអាចទទួលបានចំណូលសមរម្យជាមិនខាន។ ជាក់ស្ដែង ដូចជាអាជីវកម្មខ្នាតតូច លក្ខណៈគ្រួសារនៅខាងក្រោមនេះ ដ្បិតថាជាអាជីវកម្មក្រៅប្រព័ន្ធ ប៉ុន្តែយ៉ាងហោចណាស់ក៏អាចរកបានចំណូលសម្រាប់ផ្គត់ផ្គង់ជីវភាពគ្រួសារ និងផ្តល់ឱ្យកូនបានចូលសិក្សា​យ៉ាងប្រសើរ។

ប្រសិនបើបងប្អូនធ្វើដំណើរទៅលេងនៅកោះរាជបុត្រ ស្ថិតនៅខេត្តព្រះសីហនុ ដែលគេនិយមហៅថាជាតំបន់ស្ពានឈើដីសើម សម្រាប់ទេសចរជិះទូកកម្សាន្ត មើលទេសភាពព្រៃកោងកាងតាមដៃព្រែកសមុទ្រផងនោះ នោះនឹងងបានឃើញតូបលក់គ្រឿងទេស អាហារសម្រន់ និងភេសជ្ជៈច្រើនមុខ ដោយមានអ្នកលក់ពូកែសម្ដីវោហារក់ទឹកមិនលិចជាមិនខាន នោះគឺលោក ផាន ផានិត។

តាមការបង្ហើបប្រាប់អ្នកយកព័ត៌មាន AMS Economy បានឱ្យដឹងថា បើទោះបីអាជីវកម្មរបស់លោកមួយនេះមិនមានទ្រង់ទ្រាយធំ ប៉ុន្តែយ៉ាងហោចណាស់ក៏អាចរកចំណូលបានគួរសមអាចផ្គត់ផ្គង់គ្រួសារបានខ្លះ និងឱ្យកូនចូលរៀនបានគ្រប់គ្រាន់ ហើយប្រសិនបើថ្ងៃឈប់សម្រាកបុណ្យទានវិញ អាចរកបានចំណូលច្រើនជាងថ្ងៃធម្មតា ព្រោះមានទេសចរមកកម្សាន្តច្រើន។

លោកបន្តថា នៅក្នុងតូបរបស់លោកមានលក់ភេសជ្ជៈច្រើនមុខ រួមមានដូចជា កាហ្វេ ដូងខ្ចី ទឹកក្រូចច្របាច់ ទឹកអំពៅ និងគ្រឿងភេសជ្ជៈកំប៉ុងផ្សេងៗទៀត ហើយក្រៅពីនេះក៏មានលក់ចាហួយដូងក្រអូប ម្នាស់ទឹកឃ្មុំ សាច់អាំងបាយដំណើប មាន់អាំង កង្កែបបោប និងត្រីអាំងជាដើម ដោយជាធម្មតាលោកចាប់ផ្ដើមបើកលក់ពីម៉ោង ៨ព្រឹក ដល់ម៉ោង ៩យប់ អាស្រ័យទៅតាមថ្ងៃដែលមានភ្ញៀវច្រើន ឬតិច។

ដោយឡែក សម្រាប់អតិថិជនវិញ មួយផ្នែកធំជាភ្ញៀវទេសចរជាតិ និងអន្តរជាតិ ដែលមកលេងកម្សាន្តតំបន់នោះ ហើយក្រៅពីនេះ មានដូចជាបុគ្គលិកដែលបម្រើការងារនៅក្នុងតំបន់កម្សាន្ត អ្នកដំណើរឆ្លងកាត់ និងកម្មករនៅជិតៗនោះផងដែរ។ យ៉ាងណាក៏ដោយ លោកក៏បានបង្ហើបឱ្យដឹងផងដែរថា អាជីវកម្មខ្នាតតូចមួយនេះអាចរកចំណូលបានច្រើននៅក្នុងខែប្រាំងដែលមានទេសចរមកជិះទូកកម្សាន្តច្រើន ប៉ុន្តែសម្រាប់រដូវវស្សាដែលឧស្សាហ៍មានភ្លៀងធ្លាក់មិនសូវសម្បូរទេសចរមកនោះទេ ហើយចំណូលក៏ធ្លាក់ចុះបន្តិចដែរ។

ចុងក្រោយ លោក ផានិត ក៏សូមអំពាវនាវឱ្យបងប្អូនដែលបានទៅលេងនៅតំបន់ស្ពានឈើដីសើម កុំភ្លេចចូលទិញភេសជ្ជៈ និងចំណីអាហារដែលមានដាក់លក់នៅក្នុងតូបរបស់លោកផង ក៏ដូចជាបងប្អូនអាជីករដទៃទៀត ដើម្បីចូលរួមជួយសម្រួលដល់កម្រិតជីវភាពប្រជាសហគមន៍៕