យុទ្ធសាស្ត្របញ្ចកោណដំណាក់កាលទី១ ដែលចេញដោយរដ្ឋាភិបាលអាណត្តិទី៧នេះ បានគិត​គូរច្រើនទៅលើបញ្ហានានា សំដៅធ្វើយ៉ាងណាកែប្រែ និងពង្រឹងសេដ្ឋកិច្ចកម្ពុជាជារួម ឱ្យសម្រេច​បាននូវគោលដៅក្លាយជាប្រទេសមានចំណូលកម្រិតខ្ពស់នៅឆ្នាំ២០៥០។

ទន្ទឹមនឹងការជំរុញសេដ្ឋកិច្ច រាជរដ្ឋាភិបាលក៏បានគិតគូរដល់បញ្ហាបរិស្ថាន ដែលជានិន្នាការរួមរបស់ពិភព​លោកផងដែរ។ នៅត្រង់ចំណុចនេះដែរ រដ្ឋាភិបាលបានដាក់គោលដៅក្នុងការបង្កើនកិច្ចសហប្រតិបត្តិការគ្នា ដោយផ្ដោតលើវិធានការកាត់បន្ថយការបញ្ចេញឧស្ម័នផ្ទះកញ្ចក់ និងការបន្សុំានឹងការប្រែប្រួលអាកាសធាតុ។

ក្នុងនោះ ផ្លាស្ទីកក៏ជាបញ្ហាដែលរួមចំណែកធំទៅលើការប្រែប្រួលអាកាសធាតុផងដែរ ដោយជាធម្មតា វត្ថុធ្វើពីផ្លាស្ទិកត្រូវចំណាយពេលពី ២០ឆ្នាំ ទៅ ៥០០ឆ្នាំ ដើម្បីរលាយ។ ដបប្លាស្ទីកដែលគេប្រើជា ប្រចាំថ្ងៃនោះ ទាមទាររយៈពេល ៤៥០ឆ្នាំឯណោះក្នុងការរលាយ។

ហេតុដូច្នេះហើយ ការលើកកម្ពស់ការយល់ដឹង ការគៀរគការចូលរួមរបស់ប្រជាពលរដ្ឋ​ក្នុងការ​ផ្លាស់ប្ដូរ​ឥរិយាបទ និងទម្លាប់ការរស់នៅរបស់ពួកគេក្នុងការរស់នៅស្អាត បរិស្ថានបៃតង និងអព្យា​ក្រឹត្យកាបូន គឺជាការងារអទិភាពរបស់ក្រសួងបរិស្ថាន។ ឆ្លើយតបនឹងគោលដៅអាទិភាពនេះ ក្រសួងបរិស្ថានបាននិងកំពុងអនុវត្តនូវយុទ្ធនាការ «ថ្ងៃនេះខ្ញុំមិន ប្រើថង់ប្លាស្ទិកទេ» នៅតាមគ្រិះស្ថានអប់រំនានា ទាំងបណ្ដាខេត្ត និងរាជធានីភ្នំពេញ។

ឯកឧត្តមបណ្ឌិត អ៊ាង សុផល្លែត រដ្ឋមន្ត្រីក្រសួងបរិស្ថានបានមានប្រសាសន៍ថា គោលដៅនៃការអប់រំ និងការផ្លាស់ប្តូរទម្លាប់នៃការរស់នៅជាចំបង គឺផ្តោតលើការអប់រំសិស្សានុសិស្សនៅតាម​សាលា​ចំណេះ​ដឹងទូទៅមុនគេ ដែលពួកគេជាកោសិកាថ្មីរបស់សង្គម ហើយមានលទ្ធភាពក្នុងការជួយ​ពង្រីកការអប់រំដល់សមាជិកគ្រួសារ និងសង្គមផងដែរ។

ដូច្នេះហើយបានជាក្រសួងបរិស្ថានកំណត់យកថ្ងៃ ១ កញ្ញា ជាថ្ងៃចាប់ផ្តើមយុទ្ធនាការកាត់បន្ថយការ​ប្រើ​ប្រាស់ប្លាស្ទិក ក្រោមប្រធានបទ «ថ្ងៃនេះ ខ្ញុំមិនប្រើថង់ប្លាស្ទិកទេ» ដែលផ្តើមចេញពីសិស្សា​នុសិស្ស រួមទាំងលោកគ្រូ អ្នកគ្រូ ចំនួនជាង ១៨ ៧០០នាក់ នៃសាលារៀនទាំង៤៤ ក្នុងស្រុកអូររាំងឪ ខេត្តត្បូងឃ្មុំ ដោយចាប់ផ្តើមពីការមិនប្រើប្រាស់ថង់ប្លាស្ទិកយ៉ាងតិច១ថ្ងៃ ក្នុង១សប្តាហ៍ ឈានទៅ​២ថ្ងៃ ៣ថ្ងៃ ឬ ៤ថ្ងៃ ក្នុង១សប្តាហ៍ ដើម្បីរួមចំណែកក្នុងការកាត់បន្ថយការបង្កើត និងការចោលសំរាម​តាមសាលារៀន តាមលំនៅស្ថាន និងនៅក្នុងភូមិ ឃុំរបស់ពួកគេ រហូតដល់បានផ្លាស់ប្តូរទម្លាប់​ពីការ​ប្រើប្រាស់ ថង់ប្លាស្ទិកទាំងស្រុងនាពេលអនាគត។

យ៉ាងណាមិញ យុទ្ធនាការកាត់បន្ថយការប្រើប្រាស់ថង់ប្លាស្ទិកនេះទទួលការគាំទ្រ និងការចូលរួម​អនុវត្ត​ពីគណៈគ្រប់គ្រងសាលា លោកគ្រូ អ្នកគ្រូ និងសិស្សានុសិស្សនៅតាមគ្រឹះស្ថាន​សិក្សា​ចំណេះទូទៅ នៃរាជធានីខេត្តមួយចំនួនជាបន្តបន្ទាប់។ ជាក់ស្តែង ក្នុងរយៈពេលជិត១ខែនេះ គឺមានសិស្សានុសិស្សចំនួន១លាន២សែន៧ម៉ឺននាក់ នៃសាលារៀនចំនួនជាង ៩០០០ នៅរាជធានី-ខេត្តចំនួន២០ បានស្ម័គ្រចិត្តចូលរួមអនុវត្តយុទ្ធនាការនេះ។

ជាមួយគ្នានេះដែរ ចាប់ពីថ្ងៃទី២៣ ខែកញ្ញា វិស័យឯកជនមួយចំនួន ជាពិសេស រោងចក្រកាត់ដេរ​សម្លៀកបំពាក់ចំនួន១៥ ក្នុងរាជធានីភ្នំពេញ ខេត្តកណ្តាល និងខេត្តស្វាយរៀង ដែលមានកម្មករជាង ៧៥០០ នាក់ ក៏បានចាប់ផ្តើមស្ម័គ្រចិត្តចូលរួមជាមួយក្រសួងបរិស្ថាន ក្នុងការអនុវត្តយុទ្ធនាការមិន​ប្រើប្រាស់ថង់ប្លាស្ទិក យ៉ាងតិច១ថ្ងៃ ក្នុង១សប្តាហ៍។

សូមបញ្ជាក់ថា ប្រសិនបើសិស្សានុសិស្សនៅទូទាំងប្រទេសមានចំនួន សរុបប្រមាណជាង ៣,៧លាននាក់ បើយើងអាចកាត់បន្ថយការប្រើប្រាស់ ក៏ដូចបញ្ឈប់ការបង្កើតសំណល់ថង់ប្លាស្ទិកក្នុង ១ថ្ងៃ បានចំនួនប្រមាណ ១៥លានថង់៕