សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
បើគិតពីជញ្ជ្រាំងក្នុងស្រែ ដែលនៅសេសសល់ពីការប្រមូលផលស្រូវរួច បងប្អូនប្រជាកសិកររបស់យើងប្រហែលជាមិនសូវខ្វល់ខ្វាយច្រើននោះទេ ព្រោះគ្រាន់តែជាកាកសំណល់ ហើយខ្លះក៏ដុតចោលតែម្ដងក៏មាន ក៏ប៉ុន្តែ បើតាមការសាកល្បងរបស់កសិករមួយចំនួន សំណល់ជញ្ជ្រាំងដែលសល់ក្នុងស្រែនេះ គេក៏អាចទាញយកជាប្រយោជន៍តាមរយៈវិធីសាស្ត្រកសិកម្មផ្សេងៗទៀតបានដែរ។
យោងតាមឯកសារផ្សព្វផ្សាយរបស់ក្រសួងកសិកម្ម រុក្ខាប្រមាញ់ និងនេសាទ ដែលបានធ្វើការពិសោធដោយផ្ទាល់អំពីការផ្អាប់គល់ជញ្ជ្រាំងទៅលើស្រែរបស់កសិករនៅខេត្តឧត្ដរមានជ័យ បានបង្ហាញថា ការរក្សាគល់ជញ្ជ្រាំងក្នុងស្រែ អាចជួយឱ្យដីស្រែមានជីជាតិ ដំណាំលូតលាស់បានល្អ ទិន្នផលកើនឡើង កាត់បន្ថយការប្រើប្រាស់ជីគីមី ការពារដីមិនឱ្យសឹករិករឹល និងរួមចំណែកក្នុងការកាត់បន្ថយការប្រែប្រួលអាកាសធាតុ។
ផ្អែកតាមការពិសោធ គេសាកល្បងផ្អាប់គល់ជញ្ជ្រាំងលើផ្ទៃដី ១ម៉ែត្រការ៉េ ដែលមានជញ្ជ្រាំងជាមធ្យម ១.១៣kg/m2 នៅក្នុងរយៈពេល ៥ខែ គេអាចទទួលបានកំប៉ុស្តិ៍ទម្ងន់ ០.៤៦គីឡូក្រាម។ បើគេគណនាសារធាតុចិញ្ចឹមក្នុងជីកំប៉ុស្តិ៍នេះលើផ្ទៃដីស្រែ១ហិកតា គេអាចទទួលបានអាសូត ២៧គីឡូក្រាម ផូស័រ ២៧គីឡូក្រាម និង បូតាស្យូម ដល់ទៅ ៨៤គីឡូក្រាម។
ចំណែកគល់ជញ្ជ្រាំងដែលបានពុកផុយក្លាយជាកំប៉ុស្តិ៍នៅក្នុងស្រែ ក៏អាចជួយឱ្យដីស្រែធូរល្អ សម្បូរសារធាតុចិញ្ចឹម និងជាគម្រកដ៏ល្អសម្រាប់ការពារដី ហើយក្រៅពីសារធាតុចិញ្ចឹមដូចជា អាសូត ផូស្វ័រ និងប៉ូតាស្យូម វាក៏មាននូវសារធាតុដទៃទៀតដូចចា ស្ពាន់ធ័រ ស៊ីលីស្យូម និងស័ង្កសីផងដែរ។
ផ្ទុយទៅវិញ បើកសិករមិនកែច្នៃកាកសំណល់ជញ្ជ្រាំងនេះ វាអាចហុចឱ្យនូវគុណវិបត្តិមួយចំនួនដូចជា ការដុតគល់ជញ្ជ្រាំងចោល ទោះបីចេតនា ឬអចេតនា អាចផ្ដល់នូវហានិភ័យ និងផលប៉ះពាល់ដូចជា បាត់បង់សារធាតុសរីរាង្គដែលជំនួយដល់ដី បង្កើនឧស្ម័នពុល CO2 បំពុលបរិយាកាស បម្រែបម្រួលអាកាសធាតុ បាត់បង់គម្របការពារដី ខាតថវិកា និងចំណាយច្រើនលើការទិញជី៕
Account
Security
Favourite Content