សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
កំពត ៖ សហគមន៍ត្រពាំងសង្កែ ស្ថិតនៅក្នុងស្រុកទឹកឈូ ខេត្តកំពត ត្រូវបានរាជរដ្ឋាភិបាលផ្ដោតការយកចិត្តទុកដាក់អភិវឌ្ឍន៍ហេដ្ឋារចនាសម្ព័ន្ធសេវាទេសចរណ៍ និងនេសាទដោយបានប្រែក្លាយសហគមន៍នេះពីគម្រោងបែងចែកដីសម្បទានសង្គមកិច្ច (LASED) មកជាគម្រោងសម្បទានដើម្បីសង្គម និងសេដ្ឋកិច្ច ហើយបានធ្វើឱ្យសហគមន៍ត្រពាំងសង្កែក្លាយជាគំរូមួយសម្រាប់រៀបចំគម្រោងអភិវឌ្ឍន៍សហគមន៍ជាច្រើនទៀតនៅក្នុងខេត្តកំពត ។
បើតាមសេចក្ដីប្រកាសព័ត៌មានរបស់ក្រសួងរៀបចំដែនដី នគរូបនីយកម្ម និងសំណង់ បានឱ្យដឹងថា ក្រសួង បានប្រែក្លាយគម្រោងបែងចែកដីសម្បទានសង្គមកិច្ច(LASED) មកជាគម្រោងសម្បទានដើម្បីសង្គម និងសេដ្ឋកិច្ច ក្នុងនោះក្រសួងបានផ្តួចផ្តើម និងជ្រើសយកសហគមន៍ត្រពាំងសង្កែជាសហគមន៍គំរូក្នុងការរៀបចំក្រុង ដោយធ្វើការរៀបចំកសាងហេដ្ឋារចនាសម្ព័ន្ធគាំទ្រដល់សេវាទេសចរណ៍ និងនេសាទ ឱ្យមានផាសុកភាព សោភ័ណភាព និងស្របតាមយុទ្ធសាស្ត្ររបស់គណកម្មាធិការជាតិគ្រប់គ្រង និងអភិវឌ្ឍន៍តំបន់ឆ្នេរសមុទ្រកម្ពុជា មុននឹងឈានទៅរៀបចំសហគមន៍ទាំងអស់នៅតំបន់ឆ្នេរ និងសហគមន៍ដទៃទៀតនៅកម្ពុជា ដើម្បីលើកស្ទួយជីវភាពរស់នៅរបស់ប្រជាពលរដ្ឋឱ្យកាន់តែប្រសើរឡើង។ ជាលទ្ធផលក្រោយការចាប់ផ្តើមរៀបចំ ហើយរហូតមកដល់ពេលនេះ សហគមន៍ត្រពាំងសង្កែបានប្រែមុខមាត់ និងទាក់ទាញភ្ញៀវទេសចរមកកំសាន្តប្រមាណ ១០០០នាក់ក្នុងមួយសប្តាហ៍ ដែលបានជួយលើកស្ទួយជីវភាពពលរដ្ឋ និងសហគមន៍បានប្រសើរឡើងមួយកម្រិតធំ ។
ក្នុងកិច្ចប្រជុំអន្តរក្រសួងពិភាក្សាស្ដីពីលទ្ធផលនៃការកសាងហេដ្ឋារចនាសម្ព័ន្ធគាំទ្រសេវាទេសចរណ៍ និងនេសាទលើជីវភាពរស់នៅរបស់សហគមន៍ត្រពាំងសង្កែ ស្រុកទឹកឈូ ខេត្តកំពត កាលពីព្រឹកថ្ងៃទី១៣ ខែកក្កដា ឆ្នាំ២០២៥ ឯកឧត្តម សាយ សំអាល់ ឧបនាយករដ្ឋមន្ត្រី រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ បានបញ្ជាក់ថា ៖
«ផ្តើមចេញពីគម្រោងដំបូងតូចមួយនៅទីនេះ យើងបានកសាងហេដ្ឋារចនាសម្ព័ន្ធគាំទ្រសេវាទេសចរណ៍ និងនេសាទសម្រាប់សហគមន៍ត្រពាំងសង្កែ ស្រុកទឹកឈូ ក្នុងនោះបានកសាងផ្លូវបេតុង, ចំណតរថយន្ត និងបន្ទប់ទឹក ដោយបច្ចុប្បន្នយើងឃើញថា គម្រោងនេះបានដំណើរការយ៉ាងល្អ និងអាចក្លាយជាគំរូមួយសម្រាប់សហគមន៍ដទៃទៀត»។
ដោយទទួលបានជោគជ័យលើគម្រោងសម្រាប់សហគមន៍នេសាទត្រពាំងសង្កែនេះហើយ ឯកឧត្តមឧបនាយករដ្ឋមន្ត្រី ក៏បានបន្តស្នើសុំកិច្ចសហការពីក្រសួងអភិវឌ្ឍន៍ជនបទ ក្រសួងទេសចរណ៍ និងអភិបាលខេត្តកំពត ដើម្បីរៀបចំគម្រោងកសាងហេដ្ឋារចនាសម្ព័ន្ធគាំទ្រសម្រាប់សហគមន៍ដទៃជាច្រើនទៀតក្នុងខេត្តនេះផងដែរ ។
ផ្ដើមចេញពីនេះ ឯកឧត្តមឧបនាយករដ្ឋមន្ត្រី សាយ សំអាល់ មានបំណងចង់ស្នើសុំក្រសួងសេដ្ឋកិច្ច និងហិរញ្ញវត្ថុ ដើម្បីកែប្រែគម្រោង LASED ដោយកាលពីមុនគម្រោងនេះសំដៅត្រឹមតែចែកដីដល់ប្រជាពលរដ្ឋខ្មែរដែលមិនមានដីប៉ុណ្ណោះ ប៉ុន្តែពេលនេះឯកឧត្តមស្នើសុំឱ្យមានការកែប្រែមួយផ្នែកនៃគម្រោងLASEDនេះ មកវិនិយោគលើហេដ្ឋារចនាសម្ព័ន្ធ ដូចជា ផ្លូវ, ចំណតរថយន្ត, បន្ទប់ទឹកនៅតាមបណ្ដាសហគមន៍ និងទីស្នាក់ការសហគមន៍ មានន័យថា មិនមែនផ្ដោតត្រឹមតែការចែកដីប៉ុណ្ណោះទេ ប៉ុន្តែថែមទាំងផ្ដោតលើការវិនិយោគហេដ្ឋារចនាសម្ព័ន្ធដែលសហគមន៍មិនមានលទ្ធភាពធ្វើដោយខ្លួនឯង ដូច្នេះ នេះគឺជាយុទ្ធសាស្ត្រដែលរដ្ឋវិនិយោគឱ្យទៅសហគមន៍ដើម្បីឱ្យសហគមន៍មានជីវិតដោយខ្លួនឯង គឺធ្វើយ៉ាងណាឱ្យសហគមន៍មានការងារធ្វើ និងមានប្រាក់ចំណូល ។
នៅក្នុងឱកាសជាមួយគ្នានេះ ឯកឧត្តម ឧបនាយករដ្ឋមន្ត្រី ក៏បានគូសបញ្ជាក់ដែរថា អ្វីដែលយើងខិតខំប្រឹងប្រែងធ្វើទាំងអស់នេះគឺដើម្បីឱ្យជីវភាពរបស់ប្រជាពលរដ្ឋក្នុងសហគមន៍មានភាពរីកចម្រើន, ហើយបំណុលឯកជនរបស់ប្រជាពលរដ្ឋក្នុងសហគមន៍និមួយៗក៏ត្រូវបានធ្លាក់ចុះជាបន្តបន្ទាប់ផងដែរ ៕
Account
Security
Favourite Content