សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
បរទេស៖ យោងតាមប្រភពព័ត៌មានពី CNN បានរាយការណ៍ថា គោលនយោបាយពន្ធរបស់ Donald Trump កំពុងធ្វើឱ្យពិភពលោកមានកំណើនសេដ្ឋកិច្ចយឺត និងជំរុញតម្លៃទំនិញកាន់តែឡើងខ្ពស់ ដែលអាចប៉ះពាល់ដល់ជីវភាពរស់នៅរបស់មនុស្សេជាតិ។
កាលពីថ្ងៃចន្ទ សប្ដាហ៍នេះ អង្គការសម្រាប់កិច្ចសហប្រតិបត្តិការ និងអភិវឌ្ឍន៍សេដ្ឋកិច្ច (OECD) បានព្រមានថា គោលនយោបាយពន្ធរបស់ប្រធានាធិបតីសហរដ្ឋអាម៉េរិក Donald Trump កំពុងធ្វើឱ្យទាំងអាម៉េរិកខ្លួនឯង និងប្រទេសជុំវិញពិភពលោកមានកំណើនសេដ្ឋកិច្ចយឺត ជំរុញតម្លៃទំនិញកាន់តែឡើងថ្លៃ។ ប្រសិនបើពាណិជ្ជកម្មកាន់តែមានភាពតានតឹង នោះស្ថានភាពសេដ្ឋកិច្ចពិភពលោកនឹងកាន់តែអាក្រក់ដូចគ្នា ហើយនៅក្នុងរបាយការណ៍ប្រចាំត្រីមាសរបស់ OECD បានព្យាករណ៍ពីការខូចខាតសេដ្ឋកិច្ចរបស់អាមេរិក និងដៃគូពាណិជ្ជកម្មរបស់ខ្លួនដោយសារគោលនយោបាយរបស់ Trump ។
ការដាក់ពន្ធនាំចូលបន្ថែមដោយរដ្ឋបាល Trump លើទំនិញជាច្រើនមានប្រភេទពីបរទេស ត្រូវបានសងសឹកភ្លាមៗពីដៃគូពាណិជ្ជកម្មធំៗមួយចំនួនរបស់អាម៉េរិក។ OECD បាននិយាយថា ការគំរាមកំហែងនៃពន្ធគយ និងភាពមិនច្បាស់លាស់នៃពេលវេលាដាក់ពន្ធរបស់ Trump បាននាំឱ្យមានការកើនឡើងនូវភាពមិនច្បាស់លាស់សម្រាប់អាជីវកម្មជុំវិញពិភពលោកដូចគ្នា ដោយវាបានរារាំងពួកគេពីការវិនិយោគ ឬ ផ្អាកសកម្មភាពវិនិយោគជាបណ្តោះអាសន្ន។ ទន្ទឹមនឹងនេះ អ្នកប្រើប្រាស់បានកាត់បន្ថយការចំណាយ ដោយសារការភ័យខ្លាចនៃការស្ទុះងើបឡើងវិញនៃអតិផរណាដែលបង្កឡើងពីពន្ធគយ។ ជាលទ្ធផល ការធ្លាក់ចុះនៃការចំណាយរបស់អ្នកប្រើប្រាស់នឹងបង្អាក់កំណើនសេដ្ឋកិច្ចទាំងអាម៉េរិកខ្លួនឯង និងសកលោក។
OECD បន្ថែមថា ប្រសិនបើសកម្មភាពគោលនយោបាយពាណិជ្ជកម្មសងសឹកនៅតែបន្ត អត្រាពន្ធទ្វេភាគីនឹងប៉ះពាល់ដល់សកម្មភាពសេដ្ឋកិច្ច ទាំងប្រាក់ចំណូលពលរដ្ឋ និងចំណូលពន្ធរនស់រដ្ឋជាប្រចាំ។ បន្ថែមពីនេះ តម្លៃទំនិញនឹងកាន់តែថ្លៃ បង្ករផលលំបាកសម្រាប់អ្នកប្រើប្រាស់ ដោយសារអ្នកនាំចូលត្រូវបង់ពន្ធបន្ថែមទៀត និងជំរុញថ្លៃដើមកាន់តែខ្ពស់។ ទន្ទឹមនឹងនេះ OECD បានព្យាករណ៍ថា កំណើនសេដ្ឋកិច្ចរបស់សហរដ្ឋអាមេរិកនឹងធ្លាក់ចុះយ៉ាងខ្លាំង ២,២ ភាគរយនៅឆ្នាំនេះ និង១,៦ ភាគរយនៅឆ្នាំ២០២៦។ មិនត្រឹមតែប៉ុណ្ណោះ អតិផរណារបស់អាម៉េរិកនឹងកើនឡើងនៅឆ្នាំនេះ ជាមួយនឹងតម្លៃកើនឡើង ២,៨ ភាគរយ ដែលកើនឡើងពី ២,៥ ភាគរយក្នុងឆ្នាំ ២០២៤។ លើសពីនេះ កំណើនសេដ្ឋកិច្ចពិភពលោកនឹងមានអត្រា ៣,១ ភាគរយនៅឆ្នាំនេះ ដែលធ្លាក់ចុះពីកំណើន ៣,២ ភាគរយក្នុងឆ្នាំ ២០២៤៕
Account
Security
Favourite Content