ដូងក្រអូប ជាប្រភេទដូងម្យ៉ាងដែលមានក្លិនឈ្ងុយជាងដូងធម្មតា ទាំងទឹក និងសាច់ ដែលធ្វើឱ្យដូងប្រភេទនេះមានភាពពេញនិយមខ្លាំងសម្រាប់អ្នកចូលចិត្តទទួលទានដូង។ ក្នុងនោះ មានចំការដូងក្រអូបមួយកន្លែងនៅខេត្តបាត់ដំបង កំពុងផ្គត់ផ្គង់ទីផ្សារស្ទើរទូទាំងប្រទេស ពិសេសនៅតាមបណ្តាផ្សារទំនើបតែម្ដង។

កញ្ញា កង សុចន្ដា ម្ចាស់ចម្ការដូងក្រអូប Daling Farm មានទីតាំងស្ថិតនៅស្រុកសំពៅលូន ខេត្តបាត់ដំបង បានប្រាប់ឱ្យដឹងថា ៖ ការកកើតជាកសិដ្ឋានចម្ការដូងនេះ គឺផ្តើមចេញពីចំណូលចិត្តទទួលទានទឹកដូង និងសាច់ដូងក្រអូប ដោយដំបូងដាំជាលក្ខណៈគ្រួសារមិនទាន់មានទ្រង់ទ្រាយធំនោះទេ ប៉ុន្តែក្រោយមកទៀតដោយសារតែមើលឃើញពីតម្រូវការទីផ្សារ និងមានតម្លៃខ្ពស់ ជាពិសេសអាចប្រមូលផលបានយូរឆ្នាំក៏ពង្រីកចម្ការឱ្យចេញជាកសិដ្ឋានដូចបច្ចុប្បន្ន។

កញ្ញា សុចន្តា បានថ្លែងយ៉ាងដូច្នេះថា ៖

«មូលហេតុដែលយើងដាំដូងក្រអូបគឺដោយសារចូលចិត្តញ៉ាំដូងក្រអូបផង ហើយគិតថាដូងអាចប្រមូលផលបានពេញមួយឆ្នាំមិនប្រកាន់រដូវ ជាពិសេសទៅទៀតគឺអាចកែច្នៃបានច្រើនមុខ និងលក់ទៅកាន់ទីផ្សារបានច្រើន មិនថាក្នុងក្រុង ឬតាមបណ្ដាខេត្តនោះទេ»។

ពាក់ព័ន្ធនឹងទីផ្សារដូងក្រអូបនេះ កញ្ញា សុចន្តា បានបន្ថែមថា ៖

«ក្នុងស្រុកខ្មែរ ទីផ្សារដូងក្រអូបមិនពិបាករកទេ ឱ្យតែដូងយើងមានស្តង់ដារល្អ មានរសជាតិឆ្ងាញ់ ក្លិនឈ្ងុយ និងមាត្រដ្ឋានច្បាស់លាស់មិនចាញ់របស់នាំចូលនោះទេ អ្វីដែលសំខាន់គឺបងប្អូនយើងបានហូបដូងក្នុងស្រុក មានតម្លៃសមរម្យ មិនបាច់ទិញរបស់បរទេស»។

បច្ចុប្បន្ន ចំការដូងក្រអូបខាងលើមានទំហំប្រមាណ ៥ហិកតា ដោយអាចប្រមូលផលជាដំណាក់កាលលក់ទៅឱ្យឈ្មួញនៅតាមខេត្ត និងលក់នៅផ្សារទំនើប ដូចជា ផ្សារម៉ាក្រូគ្រប់សាខា និងខាងក្រុងប៉ោយប៉ែត ហើយកាលដែលគេអាចនាំចូលផ្សារទំនើបបានគឺអាស្រ័យលើការទាក់ទងទៅកាន់ផ្សារ ផ្លែដូងល្អ មានការពិនិត្យមើលស្របតាមស្តង់ដារ និងមានគុណភាពល្អ។

ចំពោះអាយុកាលរបស់ដូងវិញត្រូវបានម្ចាស់ចំការដូងរូបនេះបន្ថែមថា ៖

«តាមរយៈការជ្រើសរើសពូជ និងការថែទាំយើងអាចប្រមូលផលបាននៅអាយុត្រឹម ២ឆ្នាំកន្លះ តែគេក៏ត្រូវប្រើជីបំប៉នឱ្យបានត្រឹមត្រូវទើបទទួលផលបានច្រើន តួយ៉ាងដូចជាការប្រមូលក្នុងឆ្នាំទីមួយអាចប្រមូលបាន ៣០០០ផ្លែ និងកើនឡើងជាបន្តបន្ទាប់នៅលើកក្រោយទៀត»។

សូមជម្រាបថា សម្រាប់អ្នកដែលចង់ដាំដំណាំដូងក្រអូបនេះ គឺចាំបាច់ត្រូវមានប្រព័ន្ធទឹកស្រោចស្រពឱ្យបានគ្រប់គ្រាន់ តាំងពីចាប់បេលផ្ដើមដាំរហូតដល់ដូងធំ កាន់តែធំកាន់តែត្រូវការទឹក ។ ក្រៅពីនេះ គេក៏ត្រូវសិក្សាពីពូជ ក៏ដូចជាដំណើរការនៃការដាំដុះ និងបច្ចេកទេសផ្សេងៗទើបអាចទទួលបានជោគជ័យ៕