សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ព្រះសីហនុ ៖ នៅពេលនិយាយពីក្រុងព្រះសីហនុ ជាពិសេសទិដ្ឋភាពតាមតំបន់ឆ្នេរ គេមិនអាចភ្លេចបាននោះទេនូវអម្រែកមឹកអាំងចង្កាក់ៗរបស់បងប្អូនអាជីវករដែលកំពុងញាប់ដៃញាប់ជើងអាំងមឹកផង អាំងពោតបារាំងផង និងលើកឱ្យអ្នកកំពុងអង្គុយរង់ចាំលើកន្ទេលជិតនេះផងដែរ។ សកម្មភាពទាំងនេះ ត្បិតថាជាមុខរបរតូចតាចលក់ចល័តតាមតំបន់ឆ្នេរក៏ពិតមែន ប៉ុន្តែអាជីវកម្មលក់មឹកអាំងនេះអាចរកចំណូលបានច្រើនគួរសមសម្រាប់ផ្គត់ផ្គង់គ្រួសារ។
តួយ៉ាង អ្នកស្រី គង់ ស្រៀម ជាអ្នកលក់មឹកអាំងម្នាក់នៅតាមបណ្ដោយឆ្នេរអូរឈើទាលបានរៀបរាប់ឱ្យដឹងថា មុខរបររែកអម្រែកមឹកអាំងដើរលក់នៅតាមតំបន់មាត់ឆ្នេរនេះត្បិតថាមានភាពនឿយហត់បន្តិច ប៉ុន្តែវាជាមុខរបរស្របច្បាប់ និងអាចទទួលបានប្រាក់ចំណូលច្រើនគួរសមសម្រាប់ផ្គត់ផ្គង់ជីវភាពគ្រួសារ និងមិនចាំបាច់ចំណាយលុយជួលទីតាំងនៅតំបន់ទីប្រជុំជននោះឡើយ។
អ្នកស្រីបន្តថា ៖
“យើងលក់នៅតាមឆ្នេរ ដោយថ្ងៃណាមានភ្ញៀវច្រើនយើងរែកលក់ចល័ត តែថ្ងៃណាមិនសូវមានយើងមានកន្លែងអង្គុយលក់ខុសៗគ្នា ឃ្លាតៗគ្នាពីអ្នកលក់ដទៃទៀត ហើយជាធម្មតាយើងអាចលក់បានមឹកប្រមាណ ២-៣គីឡូក្រាម ឬថ្ងៃណាដាច់ខ្លាំងអាចលក់បាន ៥-៦គីឡូក្រាមក៏មាន តែវាក៏អាស្រ័យលើរដូវកាលបុណ្យទានមានភ្ញៀវមកកម្សាន្តច្រើន។”
នៅលើអម្រែកដែលមានចង្ក្រានសម្រាប់អាំងសាច់ឃើញមានប្រភេទមឹកបំពង់ មឹកដូង យាហឺ និងពោតបារាំងអាំង ដោយក្នុងនោះមឹកបំពង់ ១០ចង្កាក់តម្លៃ ១៥០០០រៀល មឹកដូង ១០ចង្កាក់២ម៉ឺន ពោតបារាំង៣ចង្កាក់ ៥០០០រៀល និងយាហឺ ១ចង្កាក់ ១ម៉ឺនរៀលផងដែរ ហើយមឹកដែលលក់ដាច់ច្រើនជាងគេគឺប្រភេទមឹកបំពង់ដែលមានទឹកត្រីបុកម្ទេសកោះកុងបន្ថែមជូន។
អ្នកស្រី គង់ ស្រៀម បន្តថា ៖
“ខ្ញុំបានចាប់ផ្ដើមអាជីវកម្មលក់មឹកអាំងនេះប្រមាណ ៦ឆ្នាំមកហើយ។ ជាប្រចាំថ្ងៃ ខ្ញុំត្រូវក្រោកពីព្រឹកទៅផ្សារទិញមឹកល្អៗ និងស្រស់ យកមកលាងសម្អាត ច្របាច់ជាមួយអំបិល និងទឹកស្អាត លុះដល់ម៉ោង៩ព្រឹក ខ្ញុំចាប់ផ្តើមចេញអាំងលក់នៅតំបន់ឆ្នេររហូតដល់ពេលរសៀល ឬអស់ភ្ញៀវទើបត្រឡប់ទៅផ្ទះវិញ ហើយជាមធ្យមខ្ញុំអាចលក់បានប្រមាណ ២០ម៉ឺនរៀលក្នុងមួយថ្ងៃ។”
គួរបញ្ជាក់ដែរថា អ្នកស្រី គង់ ស្រៀម មានស្រុកកំណើតនៅខេត្តតាកែវ ប៉ុន្តែដោយសារតែកត្តាជីវភាពមានភាពខ្វះខាត ហើយមុខរបរធ្វើស្រែមិនសូវទទួលបានផលល្អផងដែរនោះ អ្នកស្រីក៏សម្រេចចិត្តទៅរស់នៅក្រុងព្រះសីហនុ ហើយប្រកបមុខរបរលក់ពងទាស្ងោរ។ លុះក្រោយមកដោយសារមើលឃើញអាជីវករដទៃទៀតលក់មឹកអាំងនៅតាមតំបន់ឆ្នេរអាចទទួលបានចំណូលគួរសម ក៏ចាប់ផ្តើមប្ដូរមកអាំងមឹកលក់រហូតមកដល់ពេលបច្ចុប្បន្ន៕
Account
Security
Favourite Content