បន្ទាប់ពីបង្កើតជាសហគមន៍កសិកម្មដូងក្រអូប ដែលមានការទទួលស្គាល់ និងគាំទ្រច្រើនពីទីផ្សារ លោកបណ្ឌិត សួង ណយ ជាស្ថាបនិក​នៃ​សហគមន៍​នេះ​ និងជាអគ្គលេខាធិការងគណកម្មាធិការជាតិជំរុញចលនាភូមិ១ ផលិតផល១ នៃទីស្តីការគណរដ្ឋមន្ត្រី កំពុងដំណើរការរៀប​ចំ​ទីតាំងច្នៃដូងក្រអូប ដំបូងនៅក្នុងស្រុក ដើម្បីជំរុញការប្រើប្រាស់វត្ថុធាតុដើមឱ្យអស់ពីលទ្ធភាព។

តាមការកត់សម្គាល់របស់លោកបណ្ឌិត សួង ណយ កន្លងមកកសិករច្រើនតែបោះចោលនូវទិន្នផលរបស់ខ្លួននៅពេលដែលមិនមានទីផ្សារ ឬលក់បានក្នុង​តម្លៃទាបពេក។ ការបោះចោលវត្ថុធាតុដើមនេះ ក៏ដោយសារតែកសិករពឹងផ្អែកយ៉ាងសំខាន់លើការលក់កសិផលស្រស់ ហើយ​មិនបានរិះរកវិធីក្នុងការកែច្នៃបន្ថែម។ ម៉្លោះហើយ ការបង្កើតជាទីតាំងកែច្នៃដូងក្រអូបនេះ មិនសំដៅគាំទ្រតែលើផលិតផលដូងក្រអូបតែ ប៉ុណ្ណោះ​ទេ ប៉ុន្តែក៏​នឹង​ជួយ​ដល់កសិករដែលដាំដុះដំណាំផ្សេងទៀតឱ្យមានទីផ្សារផងដែរ។

លោកបណ្ឌិត សួង ណយ បានបញ្ជាក់ថា ៖

“មិនត្រឹមតែជាកន្លែងផលិតកែច្នៃដូងក្រអូបទេ យើងធ្វើជាទឹកផ្លែឈើ ទឹកល្ពៅ ម្សៅល្ពៅដែល​អាច​ឆុង​ទឹកបាន និយាយរួមគឺ យើងនឹងសិក្សាទឹកផ្លែ​ឈើដែល​ជំនួយ​សុខភាពប្រជាជនយើង។ ការបង្កើតកន្លែងកែច្នៃបែបនេះ ទី១បន្ថយការបោះ​ចោល​របស់កសិករ ទី២យើងអាចកាត់បន្ថយរឿងនាំ​ចូល ហើយបង្កើនការងារ បើយើងលក់វត្ថុធាតុដើមទៅឱ្យ​គេ យើងនឹងបាត់​ការងារ​ដល់​ប្រជាជនយើង។”

ជាមួយគ្នានេះ លោកបណ្ឌិតក៏បានលើកឡើងបញ្ជាក់ផងដែរថា ការកែច្នៃកសិផលបែបនេះអាចរក្សាទុកបានយូរ ហើយថែមទាំងអាច​បម្រើ​ដល់​សុខភាពប្រជាជនជាជាងការហូបភេសជ្ជៈកំប៉ុងដែលនាំឱ្យប៉ះពាល់សុខភាព។ នេះក៏ជាផ្នែកមួយក្នុងការជួយ កសាងសេដ្ឋកិច្ច​ប្រជាជន​កម្ពុជា​ជារួម ព្រោះថាកាលណាពលរដ្ឋមានសុខភាពល្អ ការប្រកបការងារ ផ្សេងៗក៏មានភាពរលូនទៅតាមនោះផងដែរ។

គោលបំណងជារួមគឺមិនខុសគ្នាពីចលនាភូមិមួយផលិតផលមួយ ដែលចង់ឱ្យប្រជាជនចេះកែច្នៃ មិនចង់ឱ្យលក់វត្ថុធាតុ​ដើមចេញទៅក្រៅ ពោល​គឺធ្វើយ៉ាងណាឱ្យផលិតផលសម្រេចបាន​ដល់ដៃអ្នក​ប្រើប្រាស់ក្នុងស្រុកតែម្ដង។ យ៉ាងណាមិញ បច្ចុប្បន្នគម្រោងនេះកំពុងតែស្ថិតក្នុង​ដំណាក់​កាលរៀបចំឯកសារ និងស្វែងរកដៃគូ ហើយគ្រោងនឹងដំណើរការសាងសង់នៅខែកញ្ញាខាងមុខ។

ដោយឡែក សម្រាប់ទីផ្សារដូងក្រអូបក្នុងរយៈពេល៦ខែកន្លងមកនេះ លោកបណ្ឌិតបានឱ្យដឹងថា មានភាពល្អប្រសើរច្រើន ដោយផ្គត់ផ្គង់​ទីផ្សារ​ក្នុងស្រុកមិនគ្រប់ផង។ រីឯទីផ្សារសំខាន់សម្រាប់ដូង ក្រអូបនេះគឺ ផ្សារទំនើប ផ្សារម៉ាត ហាងកាហ្វេ ហាងបាយជាដើម៕