សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ក្នុងជំនួបជាមួយលោក សុង ហ្វូឡុង សមាជិកគណៈកម្មាធិការអចិន្ត្រៃយ៍ នៃគណៈកម្មាធិការបក្សកុម្មុយនីស្តចិន ខេត្តក្វាតុង នាថ្ងៃទី២៧ ខែឧសភា ឆ្នាំ២០២៤ ឯកឧត្តម ឃួង ស្រេង អភិបាលរាជធានីភ្នំពេញ បានស្នើឱ្យវិនិយោគិនចិនមកបណ្ដាក់ទុនវិនិយោគបន្ថែមនៅក្នុងប្រទេសកម្ពុជា ជាពិសេសនៅរាជធានីភ្នំពេញ លើវិស័យហេដ្ឋារចនាសម្ព័ន្ធ ឧស្សាហកម្មធុនធំ វិស័យវាយនភ័ណ្ឌ និងទេសចរណ៍ជាដើម ។
ឯកឧត្តមបានមានប្រសាសន៍ថា រាជធានីភ្នំពេញ ជាទីក្រុងដែលកំពុងអភិវឌ្ឍន៍ដែលទាមទារឱ្យមានអ្នកវិនិយោគ មកវិនិយោគបន្ថែមទៀត បើទោះបីជាវិនិយោគិនមកពីខេត្តក្វាងទុង បានដាក់ទុនវិនិយោគមួយចំនួនរួចទៅហើយក្ដី។
ឯកឧត្តម ឃួង ស្រេង បានស្នើឱ្យលោក សុង ហ្វូឡុង ជួយផ្សព្វផ្សាយទៅវិនិយោគិននៅខេត្តក្វាងទុងឱ្យចូលមកបណ្ដាក់ទុនវិនិយោគរកស៊ីនៅភ្នំពេញ ក៏ដូចជាក្នុងប្រទេសកម្ពុជាទាំងមូលឱ្យបានច្រើនបន្ថែមទៀត ដើម្បីឱ្យរាជធានីភ្នំពេញមានការអភិវឌ្ឍរីកចម្រើនលើគ្រប់វិស័យ ។
លោក សុង ហ្វូឡុង បានលើកឡើងថា វិនិយោគិនមកពីខេត្តក្វាងទុងបានបណ្ដាក់ទុនវិនិយោគនៅកម្ពុជា ជាពិសេសនៅរាជធានីភ្នំពេញច្រើនរួចមកហើយ ប៉ុន្តែទោះជាយ៉ាងណាក្ដី លោកនឹងធ្វើការផ្សព្វផ្សាយទៅដល់អ្នកវិនិយោគក្នុងខេត្តក្វាងទុង ឱ្យចូលមកបណ្ដាក់ទុនវិនិយោគនៅក្នុងរាជធានីភ្នំពេញ ក៏ដូចជាព្រះរាជាណាចក្រកម្ពុជាបន្ថែមទៀត ដោយកម្ពុជា និងចិនបានក្លាយជាមិត្តដែកថែប និងជាមិត្តចាស់នឹងគ្នាយូរមកហើយ ។
លោក សុង ហ្វូឡុង ក៏បានអញ្ជើញអភិបាលរាជធានីភ្នំពេញ ដឹកនាំប្រតិភូទៅបំពេញទស្សនកិច្ចនៅក្នុងខេត្តក្វាងទុង ជាពិសេសទស្សនកិច្ចក្រុមហ៊ុនធំៗរបស់ចិននៅក្នុងខេត្តក្វាងទុង ដើម្បីពិភាក្សាការងារ និងទាក់ទាញវិនិយោគិនចិនមកពីខេត្តក្វាងទុងចូលមកបណ្ដាក់ទុនវិនិយោគនៅក្នុងប្រទេសកម្ពុជា ជាពិសេសនៅក្នុងរាជធានីភ្នំពេញតែម្ដង។
សូមរំលឹកថា កាលពីពេលកន្លងទៅថ្មីៗនេះ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា បានថ្លែងបញ្ជាក់ថា រាជរដ្ឋាភិបាលបានកំណត់យកវិស័យហេដ្ឋារចនាសម្ព័ន្ធ ឧស្សាហកម្ម ថាមពលស្អាត ទេសចរណ៍ កសិកម្ម និងវិស័យសំខាន់ៗមួយចំនួនទៀត គឺជាវិស័យអាទិភាពក្នុងការទាក់ទាញវិនិយោគិនមកពីបរទេសក៏ដូចជាក្នុងប្រទេសកម្ពុជាចូលមកបណ្ដាក់ទុនវិនិយោគបន្ថែមទៀត ។
តាមរយៈការវិនិយោគលើវិស័យហេដ្ឋារចនាសម្ព័ន្ធ ឧស្សាហកម្មទាំងនេះ បានធ្វើឱ្យតម្រូវការនៃការប្រើប្រាស់ដីធ្លីនៅក្នុងតំបន់មួយចំនួនក្នុងប្រទេសកម្ពុជាមានកំណើនឡើងគួរឱ្យកត់សម្គាល់ដោយបានកែប្រែដីដែលជាវាលស្រែ ដីដែលមិនសូវមានតម្លៃ ក្លាយទៅជាតំបន់រោងចក្រ សហគ្រាស ឃ្លាំង និងផ្ទះជួលរបស់កម្មករជាដើម ៕
Account
Security
Favourite Content