សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ៖ សម្រាប់តែក្នុងដំណាក់កាលដំបូងក្នុងឆ្នាំ២០២៦នេះ ក្រុមហ៊ុនជំនាញកសិកម្មក្នុងស្រុក Men Sarun MDR Co., Ltd. បានសហការជាមួយក្រុមហ៊ុនដៃគូដ៏ធំរបស់ចិន ដើម្បីនាំចេញគ្រាប់ស្វាយចន្ទីសំបកប្រភេទ M23 តម្លៃប្រមាណ ៣៥លានដុល្លារ ក្នុងដំណាក់កាលដំបូង ហើយនឹងគ្រោងពង្រីកសក្ដានុពលនាំចេញឱ្យបាន ៤០០ លានដុល្លារនៅពេលអនាគត ក្រោមកិច្ចព្រមព្រៀងលើអនុស្សរណៈនៃការយោគយល់គ្នា (MoU) ស្តីពី «កិច្ចសន្យាផ្គត់ផ្គង់គ្រាប់ស្វាយចន្ទីកម្ពុជា»។
តាមរយៈកិច្ចព្រមព្រៀងរួមគ្នាដែលបានធ្វើឡើងកាលពីថ្ងៃទី១១ ខែមីនា ឆ្នាំ២០២៦ តាមរយៈក្រុមហ៊ុនដៃគូទាំង២ខាងលើនេះ កម្ពុជានឹងចាប់ផ្តើមនាំចេញគ្រាប់ស្វាយចន្ទីទាំងសំបក (ប្រភេទ M23) ក្នុងជំហានដំបូងដែលមានទំហំទឹកប្រាក់ប្រមាណ ៣៥លានដុល្លារសហរដ្ឋអាម៉េរិក ហើយតាមផែនការភាគីទាំងពីរមានចក្ខុវិស័យ និងយុទ្ធសាស្ត្រក្នុងការជំរុញទំហំនាំចេញបន្ថែមទៀត ដែលរំពឹងថានឹងអាចកើនឡើងដល់ទឹកប្រាក់សរុបប្រមាណ៤០០លានដុល្លារសហរដ្ឋអាម៉េរិកនាពេលខាងមុខនេះ។
ឯកឧត្តម សំហេង បូរ៉ា រដ្ឋលេខាធិការក្រសួងពាណិជ្ជកម្ម និងជាប្រធានក្រុមការងារជំរុញការនាំចេញ(EPTF) ដែលធ្វើជាសាក្សីនៃកិច្ចចុះហត្ថលេខា បានមានប្រសាសន៍ថា៖ សមិទ្ធផលនេះគឺកើតចេញពីកិច្ចខិតខំប្រឹងប្រែងសម្របសម្រួល និងផ្គូរផ្គងយ៉ាងសកម្មរបស់ក្រុមការងារជំរុញការនាំចេញ (EPTF) នៃក្រសួងពាណិជ្ជកម្ម ដែលតែងតែដើរតួនាទីជាតួអង្គស្នូលក្នុងការផ្សារភ្ជាប់ទំនាក់ទំនងរវាងអ្នកនាំចេញកម្ពុជា ជាមួយអ្នកបញ្ជាទិញសក្តានុពលអន្តរជាតិ។ ទន្ទឹមនឹងនេះ កិច្ចសហប្រតិបត្តិការដ៏រឹងមាំរវាងក្រុមហ៊ុនទាំងពីរ មិនត្រឹមតែធានាបាននូវកំណើននៃការនាំចេញស្វាយចន្ទីទៅកាន់ទីផ្សារប្រទេសចិនជាបន្តបន្ទាប់ប៉ុណ្ណោះទេ ប៉ុន្តែថែមទាំងជាសញ្ញាវិជ្ជមានដ៏ធំក្នុងការទាក់ទាញវិនិយោគិនចិនឱ្យមកបណ្តាក់ទុននៅកម្ពុជា ដើម្បីពង្រីកវិសាលភាពនៃការនាំចេញកសិផលជាតិចូលទៅកាន់ទីផ្សារអន្តរជាតិឱ្យកាន់តែទូលំទូលាយបន្ថែមទៀត។
ឯកឧត្តមរដ្ឋលេខាធិការបានបញ្ជាក់ប្រាប់ AMS Economy ថា ៖
«កិច្ចព្រមព្រៀងនាំចេញគ្រាប់ស្វាយចន្ទីក្នុងដំណាក់កាលដំបូងទំហំប្រមាណ ៣៥លានដុល្លារអាម៉េរិកនេះ ធ្វើឡើងសម្រាប់ឆ្នាំ២០២៦នេះប៉ុណ្ណោះ ប៉ុន្តែក្នុងករណីដែលប្រមូលមិនគ្រប់តាមផែនការ ក្រុមហ៊ុននឹងបន្តធ្វើឱ្យគ្រប់តាមចំនួនដែលបានបញ្ជារទិញ ហើយប្រសិនបើជោគជ័យនៅដំណាក់កាលនេះ ជាដំណាក់កាលបន្ទាប់នឹងអនុវត្តរហូតដល់គោលដៅដែលបានកំណត់»។
លោក អួន ស៊ីឡុត ប្រធានសមាគមស្វាយចន្ទីកម្ពុជាបានបញ្ជាក់ឱ្យដឹងថា៖ ក្នុងឆ្នាំ២០២៥ កម្ពុជាប្រមូលផលស្វាយចន្ទីឆៅបានចំនួន ១ ០២០ ៧៥៧ តោន ក្នុងនោះការនាំចេញទៅវៀតណាមមានបរិមាណ ១ ០០០ ៧៥៧ តោន គិតជាទឹកប្រាក់ ១,៥ពាន់លានដុល្លា(កើន ២៧%បើធៀបឆ្នាំ២០២៤) ហើយគិតត្រឹមដើមឆ្នាំ២០២៥ដដែល កម្ពុជាមានសហគ្រាសកែច្នៃស្វាយចន្ទីចំនួន ៥២ ក្នុងនោះមាន ៦ ជារោងចក្រធុនមធ្យម (សមត្ថភាពផលិត ៧ ០០០ តោន ទៅ ១៤០ ០០០ តោនក្នុងមួយឆ្នាំ)។ ចំណែក ៤៨ សហគ្រាសផ្សេងទៀតជាសិប្បកម្មលក្ខណៈគ្រួសារតូចៗប៉ុណ្ណោះ ៕
Account
Security
Favourite Content