(ពោធិ៍សាត់)៖ សហគមន៍តំបន់ការពារធម្មជាតិភូមិទំព័រ ស្ថិតនៅក្នុងដែនជម្រកសត្វព្រៃភ្នំសំកុស ភូមិសាស្រ្តភូមិទំព័រ ក្នុងឃុំប្រម៉ោយ ស្រុកវាលវែង ខេត្តពោធិ៍សាត់ ជាទីកន្លែងដែលល្បីល្បាញថា មានប្រជាសហគមន៍ដាំដុះស្ពៃដែលមានរសជាតិឆ្ញាញ់។

សហគមន៍នេះមានសមាជិក ១១១គ្រួសារ ក្នុងនោះមានជាង ១០គ្រួសារបាននិងកំពុងដាំដុះស្ពៃ​ក្ដោប និងស្ពៃក្រញ៉ាញ់សម្រាប់ផ្គត់​ផ្គង់ទីផ្សារក្នុងតំបន់ និងតាមបណ្ដាខេត្តនានា។ ភាពល្បីល្បាញ នៃស្ពៃទាំងពីរប្រភេទនេះដែរ គឺដោយសារស្ពៃស្រួយល្អ មិនមានក្លិនក្រពុល និងជាស្ពៃដែលដាំដុះ ដោយមិនប្រើជីគីមី។

អ្នកស្រី ពេន​ ស៊ីថុល ដែលជាកសិករដាំដុះស្ពៃក្ដោប និងស្ពៃក្រញ៉ាញ់ក្នុងរោងសំណាញ់ជុំវិញផ្ទះ បានឱ្យដឹងថា អ្នកស្រីនិងស្វាមីដាំស្ពៃដោយប្រើប្រាស់ជីលាមកគោ និងជីសេរីរាងសម្រាប់ទ្រាប់បាតដី ហើយប្រើប្រាស់ជីទឹកសេរីរាង្គក្នុងការស្រោចដំណាំ ដែលជីទឹកនេះដែរ ស្វាមីអ្នកស្រីជា​អ្នកលាយ​ដោយខ្លួនឯង។

សម្រាប់ជីទឹកនេះទៀតសោត អ្នកស្រីបានរៀបរាប់ឱ្យដឹងថា ខ្លួនប្រើប្រាស់ស្លឹកស្ពៃបន្ទាប់ពីប្រមូល ក្ដោបចេញ ប្រើផ្លែល្ហុងទុំ ផ្លែត្រប់ដែលរលួយចោល និងលាយជាមួយអំបិល ៣ ទៅ ៤គីឡូ ដាក់ត្រាំ ចូលក្នុងធុងចំណុះ ២០០លីត្រ។

អ្នកស្រីបន្តឱ្យដឹងថា ការធ្វើបែបនេះគឺនាំឱ្យទិន្នផលដែលប្រមូលបានជាប្រភេទបន្លែសុវត្ថិភាព មិនមានជាតិគីមី មិនមានសត្វល្អិត ម្លោះហើយបានជាវាមានរសជាតិឆ្ញាញ់ខុសប្លែកពីគេ។ ពីមួយឆ្នាំ ទៅមួយឆ្នាំភាពល្បីល្បាញរបស់ស្ពៃទាំងពីរប្រភេទនេះក៏កាន់តែខ្លាំងឡើងៗ ដែល​បច្ចុប្បន្ននេះ អ្នកស្រី និងកសិករជាង១០គ្រួសារទៀត កំពុងផ្គត់ផ្គង់រហូតដល់ក្រុងភ្នំពេញផងដែរ។ សម្រាប់អ្នកស្រីវិញ អ្នកស្រីប្រើប្រាស់គេហទំព័រហ្វេសប៊ុកដើម្បីជំរុញដល់ការលក់បន្ថែមទៀត ដែលអ្នកស្រីមានអតិថិជន ២៥ខេត្តក្រុងតែម្ដង។

បច្ចុប្បន្ននេះផងដែរ អ្នកស្រីបានពង្រីករោងសំណាញ់សម្រាប់ដាំដុះរហូតដល់ ៣រោង និងមានបំណងចង់ពង្រីកដល់ផ្ទៃដី ៣ហិកតានៅឆ្នាំបន្ទាប់ទៀតផងដែរ ខណៈអ្នកទិញមាននៅក្នុងតំបន់ខ្លះ ហើយខ្លះទៀតជាអ្នកខេត្តពោធិ៍សាត់ អ្នកខេត្តបាត់ដំបង និងមកដល់ភ្នំពេញទៀតផង។

រីឯរយៈពេលនៃការដាំវិញ អ្នកស្រីបានឱ្យដឹងថា៖

“ខ្ញុំដាំក្នុងចន្លោះពេល ៧០ថ្ងៃ ទៅ១០០ថ្ងៃ ទើបបានប្រមូលផល ហើយពេលប្រមូលផលម្ដងៗ​ អាចលក់បានក្នុងមួយថ្ងៃ ៥០គីឡូ។”

ដោយឡែក ក្នុងមួយរដូវអ្នកស្រីអាចប្រមូលបានរហូតដល់ ១តោន ទៅ២តោនឯណោះ ហើយបើគិតជាចំណូលគឺប្រមាណជា ១៥លានរៀល។

យ៉ាងណាមិញ ក្រៅពីការដាំស្ពៃទៅ អ្នកស្រីនិងគ្រួសារក៏ធ្វើចំការផងដែរ ហើយចំណូលដែលបាន មកពីទិន្នផលដំណាំចំការទាំងនោះ ក៏អ្នកស្រីអាចយកទៅប្រើប្រាស់ ទិញសម្ភារៈនានា កែប្រែជីវភាព បានយ៉ាងល្អប្រសើរផងដែរ។

អ្នកស្រីក៏បានបញ្ជាក់ផងដែរថា ជីវភាពគ្រួសាររបស់អ្នកស្រីបានស្គាល់ភាពធូរធាច្រើន ក្រោយពេល​ដាំដុះស្ពៃក្ដោប និងស្ពៃក្រញ៉ាញ់ ក្រោមការជួយជ្រោមជ្រែងពីក្រសួងបរិស្ថាន។ តាមរយៈភាពជោគ ជ័យនេះ អ្នកស្រីក៏បានចែករំលែកពូជ និងបច្ចេកទេសដាំដុះដល់គ្រួសារដែលខ្វះខាតផ្សេងទៀតដែរ ហើយជាលទ្ធផលពួកគេក៏មានជីវភាពកាន់តែល្អប្រសើរផងដែរ៕