សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
នៅក្នុងឱកាសទិវាជាតិអប់រំបណ្ដុះបណ្ដាលបច្ចេកទេស និងវិជ្ជាជីវៈលើកទី៦ គេសង្កេតឃើញមានបណ្តាក្រុមហ៊ុន ស្ថាប័ន វិទ្យាស្ថានជាច្រើននៅទូទាំងប្រទេសបានចូលរួមដាក់តាំងសមិទ្ធផលផ្សេងៗសំដៅផ្សព្វផ្សាយពីជំនាញនានា ក៏ដូចជាលើកទឹកចិត្តឱ្យមានការសិក្សាជំនាញឱ្យកាន់តែច្រើនពីសំណាក់សិស្សានុសិស្ស។
នៅក្នុងព្រឹត្តិការណ៍ទាំងមូល គេឃើញមានស្តង់មួយរបស់វិទ្យាស្ថានពហុបច្ចេកទេសកុសមៈ ដែលបានដាក់តាំងស្នាដៃ របស់និស្សិតតាមជំនាញផ្សេងៗតម្រៀបត្រៀបត្រា។ នៅម្ខាងនៃស្តង់មានផ្ទាំងព័ត៌មានលម្អិតស្ដីពីមុខជំនាញដែលវិទ្យាស្ថានមានបណ្ដុះបណ្ដាល ក៏ដូចជាការងារដែលសិស្ស-និស្សិតនឹងទទួលបានបន្ទាប់ពីបញ្ចប់ការសិក្សា។
លោក ជី វណ្ណី ជាព្រឹត្តិបុរសមហាវិទ្យាល័យអគ្គិសនីនៃវិទ្យាស្ថានពហុបច្ចេកទេសកុសមៈ និងដែលជាអ្នកចាំផ្ដល់ព័ត៌មានផ្សេងៗនៅស្តង់ផងនោះបានបង្ហាញពីចំណាប់អារម្មណ៍រីករាយចំពោះវត្តមាននៃសិស្សានុសិស្ស-និស្សិត បណ្ដាអ្នកធ្វើការ អ្នកជំនួញ ដែលចូលរួមក្នុងទិវាជាតិអប់រំបណ្ដុះ បណ្ដាលបច្ចេកទេស និងវិជ្ជាជីវៈនាឆ្នាំនេះ។ ដោយឡែក ក្នុងនាមជាគ្រូបង្គោលមួយរូប លោកបានកត់សម្គាល់ឃើញថាយុវជន យុវនារី សិស្សដែល បញ្ចប់ការសិក្សាពីថ្នាក់វិទ្យាល័យហើយនោះ ច្រើនតែមិនសូវមានចំណាប់អារម្មណ៍លើការរៀនជំនាញ នោះទេ ដោយភាគច្រើនសំដៅរកតែមុខវិជ្ជាណាដែលមិនសូវលំបាក។
លោក ជី វណ្ណី បានលើកឡើងថា ៖
“យើងបានត្រៀមខ្លួនមកយូរហើយក្នុងការបណ្ដុះបណ្ដាលធនធានមនុស្សផ្នែកជំនាញ ជាពិសេសក្នុងបដិវត្តន៍ឧស្សាហកម្ម ៤.០ នេះតែម្ដង ប៉ុន្តែជាក់ស្ដែងសិស្សមិនសូវជាមានចំណាប់អារម្មណ៍ចង់រៀនជំនាញប៉ុន្មានទេ។”
លោកបន្តឱ្យដឹងថា ក្នុងឆ្នាំសិក្សាឆ្នាំ២០២៣នេះ វិទ្យាស្ថានរបស់លោកមានសិស្សសិក្សាប្រមាណជា ៤ ០០០នាក់ ហើយភាគច្រើននៃពួកគេគឺកំពុងរៀនជំនាញអគ្គិសនី និងសំណង់ ក្រោមហេតុផលថា ជំនាញនេះមានតម្រូវការច្រើនលើទីផ្សារ។ ដោយឡែក ចំនួនទាំងនេះក៏នៅតែមិនទាន់គ្រប់តម្រូវការទីផ្សារនៅឡើយដោយលោកអះអាងថា ទីផ្សារទាំងក្នុងស្រុក និងក្រៅស្រុកមានតម្រូវការផ្នែកជំនាញនេះខ្លាំង ប៉ុន្តែបែរជាមិនសូវជាមានសិស្សរៀនច្រើន។
លោក ជី វណ្ណី បានបញ្ជាក់ថា ៖
“យើងដឹងហើយថា ក្មេងឥឡូវមិនសូវចូលចិត្តរៀនជំនាញទេ គាត់ខ្លាចហត់ ខ្លាចប្រឡាក់ ខ្លាចលំបាក អីចឹងទៅគាត់ចង់ទៅរៀនជំនាញផ្សេងៗ ដើម្បីធ្វើការងារដែលងាយស្រួលវិញ។ ប៉ុន្តែយ៉ាងណា ខ្ញុំបានមើលឃើញថា ប៉ុន្មានឆ្នាំចុងក្រោយនេះ សិស្ស-និស្សិតហាក់បង្វែរចំណាប់អារម្មណ៍មកជ្រើសរើសជំនាញឡើងវិញ។ ក្នុងនោះ ក៏មានផងដែរនូវការរួមចំណែកពីទិវាជាតិអប់រំបណ្ដុះ បណ្ដាលជំនាញ និងវិជ្ជាជីវៈ ដែលបានប្រព្រឹត្តិទៅចំនួន ៥លើករួចមកហើយ។”
ជាចុងក្រោយ លោកបានសំណូមពរឱ្យមានការយកចិត្តទុកដាក់បន្ថែមទៀតពីថ្នាក់ដឹកនាំ ក្រសួង ស្ថាប័នពាក់ព័ន្ធក្នុងការរៀបចំកម្មវិធីនានា សំដៅផ្សព្វផ្សាយការសិក្សាជំនាញឱ្យកាន់តែទូលំទូលាយបន្ថែមទៀត។ យ៉ាងណាមិញ សិស្សដែលមានបំណងចង់ចូលរៀននៅសកលវិទ្យាល័យ លោកក៏សំណូមពរឱ្យសិក្សាបន្ថែមពីជំនាញនានា ព្រោះនេះជាពេលវេលាដែលទីផ្សារនៅទូលាយងាយស្រួលស្វែងរកការងារ៕
Account
Security
Favourite Content