ភ្នំពេញ ៖ ស្របតាមយុទ្ធសាស្ត្របញ្ចកោណរបស់រាជរដ្ឋាភិបាលថ្មីដែលផ្ដោតសំខាន់ទៅលើហេដ្ឋារចនាសម្ព័ន្ធសំខាន់ៗចំនួន៤គឺ ទឹក ភ្លើង ផ្លូវ និងមនុស្ស វិស័យរដ្ឋ និងឯកជននាពេលនេះ បាន និងកំពុងធ្វើការរួមគ្នាដើម្បីបណ្ដុះបណ្ដាល និងអភិវឌ្ឍន៍ធនធានមនុស្ស។

ដោយឡែក នាព្រឹកថ្ងៃទី២៥ ខែកញ្ញា ឆ្នាំ២០២៣ ក្រសួងសេដ្ឋកិច្ច និងហិរញ្ញវត្ថុ តំណាងដោយមូនិធិអភិវឌ្ឍន៍ជំនាញបានចុះអនុស្សរណៈយោគយល់ជាមួយក្រុមហ៊ុនឬទ្ធិពល ក្នុងការផ្ដល់ថវិកាបដិភាគសម្រាប់បណ្ដុះបណ្ដាលជំនាញដល់ធនធានមនុស្សនៅកម្ពុជា។

ក្នុងនោះ លោក គី សុខគីម នាយកប្រតិបត្តិនៃមូលនិធិអភិវឌ្ឍន៍ជំនាញបានមានប្រសាសន៍ថា មូនិធិរបស់លោកគឺយកហិរញ្ញវត្ថុដើម្បីទៅគាំទ្រការអភិវឌ្ឍជំនាញ សំដៅជំរុញសេដ្ឋកិច្ចជាតិ ឱ្យដើរទន្ទឹមនឹងចក្ខុវិស័យរបស់រាជរដ្ឋាភិបាលដែលផ្ដោតលើកត្តាធនធានមនុស្ស។

លោកបន្តមានប្រសាសន៍ថា៖

«យើងចង់ឃើញក្រុមហ៊ុនបណ្ដុះបណ្ដាលជំនាញអាចផ្គត់​ផ្គង់ទាំង​បរិមាណ និងគុណភាព…ទាក់ទងនឹងរឿងជំនាញនេះ យើងតែងតែលឺក្រុមហ៊ុននិយាយពីរឿង៣គឺ ចង់បានស្តង់ដារ គុណភាព និងតម្លៃបន្ថែម ដែលវាចេញពីជំនាញទន់ និងរឹងនេះឯង»។

លោកបន្តថា ដើម្បីដើរបានឆ្ងាយ គឺសង្គមជាតិត្រូវការមនុស្សដែលពូកែ និងមានជំនាញច្បាស់លាស់ ហើយមូលហេតុនេះផងដែរ ដែលនាំឱ្យវិនិយោគិនជាច្រើនសុខចិត្តដាក់ទី​តាំងវិនិយោគរបស់ខ្លួន​នៅក្នុង​ប្រទេសដែលមានធនធានមនុស្ស។

ជាមួយគ្នានេះ លោកស្រី រី ថានី អ្នកតំណាងក្រុមហ៊ុននរាអង្គរហេនឌីក្រាហ្វ ដែលជាដៃគូអនុវត្ត​គម្រោងបានឱ្យដឹងថា នៅឆ្នាំ ២០១១ នរាក្លាយជាក្រុមហ៊ុនទី១ដែលដឹកនាំដោយស្ត្រី និងជាកូនខ្មែរ។ ពីមួយឆ្នាំទៅមួយឆ្នាំ អាជីវកម្មរបស់លោកស្រីដែលផ្ដោតលើការកែច្នៃគ្រឿងតាំងលម្អនៅក្នុងសណ្ឋា គារផ្កាយ៥ កាន់តែរីកចម្រើនឡើងៗ ប៉ុន្តែបែរជាជួបប្រទះនឹងបញ្ហាធនធានមនុស្សនៅខាងក្នុង​សង្វាក់ផលិតកម្មទៅវិញ។

លោកស្រីបានគូសបញ្ជាក់ថា៖

«បុគ្គលិករបស់យើងមានប្រហែល ៣០ ទៅ ៤០នាក់ ប៉ុន្តែយើង​បានជួយសហគមន៍ប្រមាណជា ៥០០គ្រួសារ ដូច្នេះបញ្ហាប្រឈមរបស់យើងធំមួយគឺធ្វើការជាមួយ អ្នកផលិត»។

ក្នុងឱកាសនេះដែរ លោក ព្រឿង សំអុន ប្រធានគ្រប់គ្រងទូទៅនៃក្រុមហ៊ុន គូរីរម្យហ្វូត ប្រូដាក់សិន ដែលជាក្រុមហ៊ុនធ្វើលើការកែច្នៃដំណាប់ផ្លែឈើ ជាពិសេសដំណាប់ស្វាយសម្រាប់នាំចេញ បានជួបនូវបញ្ហាស្រដៀងគ្នា។

លោកមានប្រសាសន៍ថា៖

«ពេលចាប់ផ្ដើមក្នុងឆ្នាំ ២០១៤មក យើងមានបុគ្គលិកតែ៥០នាក់ទេ ប៉ុន្តែមកបច្ចុប្បន្នយើងមាន ១៥០០នាក់ រីឯសមត្ថភាពផលិតរបស់យើងពី ១០តោន មកដល់២០០តោនក្នុងមួយថ្ងៃ ក្នុងការផលិតស្វាយស្រស់ ហើយមានការនាំចេញទៅកាន់ ១០ប្រទេស»។

ជាមួយនឹងការគ្រប់គ្រងបុគ្គលិកក្នុងចំនួនដ៏ច្រើននេះគឺពិតជាមានភាពលំបាកសម្រាប់លោក ដោយសារតែបុគ្គលិកមានតែជំនាញរឹង ប៉ុន្តែខ្វះខាតនូវជំនាញទន់ ដែលជាជំនាញក្នុងការទំនាក់ ទំនង ធ្វើការជាក្រុម និងដោះស្រាយបញ្ហានៅកន្លែងធ្វើការជាដើម។

យ៉ាងណាមិញ ក្រោយការចូលរួមបញ្ជូនបុគ្គលិកទៅបណ្ដុះបណ្ដាលក្រោមក្រុមហ៊ុនឬទ្ធិពល ទាំងលោក ព្រឿង សំអុន និងលោកស្រី រី ថានី សុទ្ធតែបានកត់សម្គាល់ឃើញភាពខុសប្លែកនៃ បុគ្គលិករៀងៗខ្លួន។

សម្រាប់ចក្ខុវិស័យទៅមុខទៀត ទាំងវិស័យរដ្ឋនិងឯកជនសុទ្ធតែមានការប្ដេជ្ញាក្នុងការចូលរួមលើក កម្ពស់ធនធានមានជំនាញនៅកម្ពុជាឱ្យកាន់តែច្រើនឡើង ដើម្បីទាក់ទាញវិនិយោគិន ក៏ដូចជាដើម្បី រុញសេដ្ឋកិច្ចកម្ពុជាឱ្យស្របតាមចក្ខុវិស័យរបស់រដ្ឋាភិបាល៕