សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
បរទេស ៖ យោងទៅតាមប្រភពព័ត៌មានពី Arab News បានរាយការណ៍ថា កាលពីខែតុលាកន្លងទៅនេះ ការនាំចេញប្រេងឆៅរបស់អារ៉ាប៊ីសាអូឌីតបានកើនឡើងពី ៧,៧២ លានបារ៉ែលដល់ ៧,៧៧ លានបារ៉ែលក្នុងមួយថ្ងៃ ដែលឈានដល់កម្រិតខ្ពស់ក្នុងរយៈពេល ៣០ ខែ ដោយសារតម្រូវការប្រេងជាសកលបានកើនឡើង។
ផ្អែកទៅលើទិន្នន័យពី JODI បានកត់សម្គាល់ឃើញថា កំណើននៃការនាំចេញត្រូវបានជំរុញជាចម្បងដោយសារកំណើនតម្រូវការបានកើនឡើងនៅក្នុងប្រទេសធំៗដូចជា សហភាពអឺរ៉ុប ចិន សហរដ្ឋអាមេរិក និងឥណ្ឌាជាដើម។ ទោះជាយ៉ាងណាក្តី គេបានកត់សម្គាល់ថា ផលិតកម្មប្រេងឆៅរបស់ប្រទេសអារ៉ាប៊ីសាអូឌីតបានបន្ថយមកសល់ត្រឹម ១០,៩៦ លានបារ៉ែលក្នុងមួយថ្ងៃតែប៉ុណ្ណោះ ដោយសារការអនុវត្តវិធានការកាត់បន្ថយផលិតកម្មប្រេង។ ការនាំចូលបេ្រងមកកាន់អារ៉ាប៊ីសាអូឌីតបានធ្លាក់ចុះមកត្រឹម ២,៦៨ លានបារ៉ែលក្នុងមួយថ្ងៃ ខណៈដែលការនាំចេញផលិតផលប្រេងជាសរុបបានកើនឡើងដល់ ១,៥៨ លានបារ៉ែលក្នុងមួយថ្ងៃ។
កាលពីដើមខែធ្នូនេះ អង្គការនៃប្រទេសនាំចេញប្រេង និងសម្ព័ន្ធមិត្ត ឬ ហៅកាត់ថា OPEC+ បានយល់ព្រមគ្នានៅតែរក្សាទិន្នផលប្រេងដែលខ្លួនផលិត បន្ទាប់ពីអង្គការ OPEC+ បានយល់ព្រមកាត់បន្ថយទិន្នផលចំនួន ២ លានបារ៉ែលក្នុងមួយថ្ងៃ ឬ ប្រហែល ២ ភាគរយនៃតម្រូវការពិភពលោក ដែលត្រូវបានអនុវត្តពីខែវិច្ឆិការហូតដល់ចុងឆ្នាំ២០២៣។ កាលពីខែតុលាកន្លងទៅនេះ តម្រូវការសកលគឺនៅកម្រិត ៩៩ ភាគរយ ខណៈដែលផលិតកម្មប្រេងឆៅមានត្រឹមតែ ៩៦ ភាគរយតែប៉ុណ្ណោះ។
យោងទៅតាមប្រភពដដែលបានបង្ហាញផងដែរថា ផលិតកម្មប្រេងរបស់រុស្ស៊ីបានធ្លាក់ចុះមកនៅត្រឹម ៩,៨៨ លានបារ៉ែល ដោយសារតែជម្លោះជាមួយនឹងអ៊ុយក្រែន ដែលធ្វើឱ្យប្រទេសអឺរ៉ុបជាច្រើនផ្អាកការនាំចូលថាមពលពីរុស្ស៊ី។
កាលពីខែតុលាកន្លងទៅនេះ ក្នុងនាមជាប្រទេសមានសេដ្ឋកិច្ចដ៏ធំបំផុតរបស់អាស៊ី តម្រូវការប្រេងនៅចិនបានកើនឡើង ៥១៨,០០០ បារ៉ែលក្នុងមួយថ្ងៃបន្ថែមទៀត ហើយការនាំចូលប្រេងឆៅបានកើនឡើងដល់ ១០,១៩ លានបារ៉ែលក្នុងមួយថ្ងៃ ដែលជាចំនួនខ្ពស់បំផុតក្នុងរយៈពេល ៥ ខែ។ នៅសហរដ្ឋអាមេរិក ការផលិតប្រេងឆៅបានធ្លាក់ចុះមកត្រឹម ១១,៩៧ លានបារ៉ែលក្នុងមួយថ្ងៃ ខណៈពេលដែលតម្រូវការប្រេងបានកើនឡើងចំនួន ៦២១,០០០ បារ៉ែលបន្ថែមទៀតក្នុងមួយថ្ងៃ ។ ដោយឡែក តម្រូវការហ្គាសធម្មជាតិជាសកលបានកើនឡើង ៥,៨ ពាន់លានម៉ែត្រគូបកាលពីខែតុលាកន្លងទៅនេះផងដែរ ខណៈដែលផលិតកម្មហ្គាសបានស្ទុះងើបឡើងបន្តិចវិញ។ ទន្ទឹមនឹងនេះដែរ នៅក្នុងរបាយការណ៍ប្រចាំខែរបស់ OPEC បានកត់សម្គាល់ថា តម្រូវការប្រេងនៅឆ្នាំ២០២៣ នឹងកើនឡើងដល់ ២,២៥ លានបារ៉ែលក្នុងមួយថ្ងៃ ឬ ប្រហែល ២,៣ ភាគរយនៃតម្រូវការពិភពលោកបន្ថែមទៀត។ អង្គការ OPEC បានបន្ថែមដែរថា បើទោះបីជាភាពមិនច្បាស់លាស់នៃសេដ្ឋកិច្ចពិភពលោកមានកម្រិតខ្ពស់ និងប្រឈមហានិភ័យនៃកំណើននៅក្នុងសេដ្ឋកិច្ចសំខាន់ៗនៅតែផ្អៀងទៅរកការធ្លាក់ចុះក៏ដោយ ប៉ុន្តែវាអាចនឹងមានកត្តាមួយចំនួនដែលអាចទប់ទល់នឹងបញ្ហាប្រឈមនាពេលបច្ចុប្បន្ន និងបន្តនាពេលអនាគតខាងមុខបានផងដែរ៕
Account
Security
Favourite Content