សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ពោធិ៍សាត៖ មន្ត្រីជាន់ខ្ពស់ក្រសួងកសិកម្ម រុក្ខាប្រមាញ់ និងនេសាទ បានថ្លែងកោតសរសើរដល់សហគមន៍នេសាទស្រីចឹក ដែលបានចូលរួមយ៉ាងសកម្មក្នុងការចូលេរួមបង្ក្រាបបទល្មើសនេសាទ និងធ្វើឱ្យទិន្នផលជលផលក្នុងមូលដ្ឋានកើនឡើងជាលំដាប់។
លោកជំទាវ អ៊ឹម រចនា អនុរដ្ឋលេខាធិការ នៃក្រសួងកសិកម្ម រុក្ខាប្រមាញ់ និងនេសាទ កាលពីសប្ដាហ៍កន្លងទៅ បានចុះទៅដល់សហគមន៍នេសាទស្រីចឹក ក្នុងដំណើរទស្សនកិច្ចអមដោយអ្នកសារព័ត៌មាន ដែលសហការរៀបចំដោយក្រសួងកសិកម្ម រុក្ខាប្រមាញ់ និងនេសាទ រដ្ឋបាលជលផល សហភាពអឺរ៉ុប និងអង្គការស្បៀង និងកសិកម្ម នៃអង្គការសហប្រជាជាតិ FAO នៅក្នុងភូមិកញ្ជរ ឃុំកញ្ជរ ស្រុកកណ្ដៀង ខេត្តពោធិ៍សាត់។
បើតាមលោកជំទាវ អ៊ឹម រចនា សហគមន៍នេសាទនេះ មានលទ្ធភាពសន្សំប្រាក់រក្សាទុកក្នុងធនាគារ ដើម្បីយកការប្រាក់មកបង្វែរធ្វើកិច្ចទ្រទ្រង់សហគមន៍ ដូចជាការល្បាត ចូលរួមយ៉ាងសកម្មការបង្ក្រាបបទល្មើសនេសាទនានា និងការដាំដើមឈើឡើងវិញជាដើម។
ក្រោមការផ្ដល់នូវជំនួយបច្ចេកទេសពី FAO និងកញ្ចប់ថវិកាពីសហភាពអឺរ៉ុប សហគមន៍នេសាទ ស្រីចឹក បានអភិវឌ្ឍខ្លួនលើសមត្ថភាពពង្រីកសក្ដានុពលរបស់សហគមន៍ ជាពិសេសការចូលរួមបង្ក្រាបបទល្មើសនេសាទ ដែលនាំឱ្យមានកំណើនជលផលទឹកសាបកើនឡើង។
សម្រាប់ សហគមន៍នេសាទស្រីចឹក មានប្រជាពលរដ្ឋសរុបចំនួន២ ០៤៨នាក់ និងមានផ្ទៃក្រឡាដីប្រមាណ ២ ៦៩៦ ហិកតា។ សហគមន៍មានប្រាក់សន្សំចំនួន ៧ ៥០០ដុល្លារ ដែលកំពុងតែដាក់នៅធនាគារ និងក្រុមសន្សំប្រាក់សហគមន៍។ នេះបើយោងតាម លោកឌុក សុខា ប្រធានគណៈកម្មការគ្រប់គ្រងសហគមន៍នេះ។
ក្នុងនាមក្រសួងកសិកម្ម លោកជំទាវ អ៊ឹម រចនា បានថ្លែងអំណរគុណចំពោះកិច្ចសហការជាមួយអង្គការ FAO កន្លងមក និងការគាំទ្រថវិការពីសហភាពអឺរ៉ុប ហើយក្រសួងសង្ឃឹមថាក្រោយគម្រោងនេះបញ្ចប់នឹងអាចមានគម្រោងថ្មីៗបន្តទៀត ដែលសហភាពអឺរ៉ុបអាចនឹងពិចារណាផ្ដល់ជាជំនួយជូនដល់សហគមន៍ ខណៈដែលសហគមន៍នឹងបន្តបំពេញកិច្ចការងារអភិរក្ស សហគមន៍នេសាទនេះឱ្យកាន់តែល្អបន្ថែមទៀត។
សូមជម្រាបថា តាមរយៈកម្មវិធី CAPFISH-Capture អង្គការស្បៀង និងកសិកម្មនៃសហប្រជាជាតិ (FAO) បានផ្តល់ការគាំទ្រផ្នែកបច្ចេកទេសបន្ថែមដល់រដ្ឋបាលជលផល ក្នុងការអនុវត្តសកម្មភាព ដែលបានចាប់ផ្តើមនៅខែកក្កដា ឆ្នាំ២០១៩ រហូតដល់ខែធ្នូ ឆ្នាំ២០២៥ ដើម្បីគាំទ្រដល់ការគ្រប់គ្រងអភិរក្ស និងការអភិវឌ្ឍធនធានជលផល។ ការគាំទ្ររបស់ FAO, CAPFISH-Capture បានបង្កើតនូវគំនិតផ្តួចផ្តើម និងការកសាងសមត្ថភាពដល់មន្ត្រីរដ្ឋបាលថ្នាក់ជាតិ និងថ្នាក់ក្រោមជាតិ ព្រមទាំងគណៈកម្មការ សមាជិកសហគមន៍នេសាទ និងសហគមន៍ស្រះជម្រកត្រី ដើម្បីធានានូវការប្រើប្រាស់ធនធានជលផល ប្រកបដោយការទទួលខុសត្រូវ មានសមភាព និងនិរន្តរភាព។
សកម្មភាពសំខាន់ៗរបស់កម្មវិធីនេះមានដូចជា ការផ្តល់ថវិកាដល់សហគមន៍ចំនួន ២៥០ប្រចាំឆ្នាំចំនួន១ពាន់ដុល្លារក្នុង១សហគមន៍ ការកសាងសមត្ថភាពក្នុងការគ្រប់គ្រងថវិកា រៀបចំផែនការ សម្រាប់ដំណើរការអភិវឌ្ឍន៍សហគមន៍ ការទប់ស្កាត់បទល្មើស ការបោះបង្គោលកំណត់ព្រំសហគមន៍ ការដាំស្តារព្រៃលិចទឹកឡើងវិញផងដែរ។ បន្ថែមពីនោះ មានការផ្តល់វគ្គបណ្តុះបណ្តាលគ្រូបង្គោលនៅក្នុងខេត្តចំនួន២០ ដែលរួមមានទាំងការផ្តល់ជំនួយបច្ចេកទេសជូនដល់រដ្ឋបាលជលផលផងដែរ។
សូមជម្រាបថា រហូតមកទល់ពេលនេះ សហគមន៍ នេសាទចំនួន៥១៦ ត្រូវបានបង្កើតឡើងនៅទូទាំងប្រទេស។ ក្នុងនោះមានសហគមន៍នេសាទទឹកសាបចំនួន ៤៧៥ និងសហគមន៍នេសាទតំបន់ឆ្នេរ៤១។ ទន្ទឹមនឹងនេះ សហគមន៍ ស្រះជម្រកត្រីចំនួន ៩២៩ ក៏ត្រូវបានបង្កើតឡើង។ ក្នុងនោះមានសហគមន៍ស្រះជម្រកត្រីតំបន់ឆ្នេរចំនួន ១០៥៕
Account
Security
Favourite Content