សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
បាត់ដំបង ៖ ពោតលីងអប់ ជាអាហារសម្រន់មួយប្រភេទរបស់សិប្បកម្មកែច្នៃគ្រាប់ធញ្ញជាតិលក្ខណៈគ្រួសារមួយនៅខេត្តបាត់ដំបង កំពុងមានប្រជាប្រិយភាព ដែលទទួលបានការគាំទ្រពីសំណាក់អតិថិជនក្នុងតំបន់ទាំងចាស់ទាំងក្មេង ដោយសារតែមានរសជាតិឆ្ងាញ់ប្លែក ឈ្ងុយ ស្រួយ ញ៉ាំជក់មាត់តែម្ដង។
សិប្បកម្មស្រីមុំ ជាសិប្បកម្មកែច្នៃគ្រាប់ធញ្ញជាតិមួយស្ថិតនៅក្នុងខេត្តបាត់ដំបង ដែលមានផលិត និងដាក់លក់នូវផលិតផលច្រើនមុខ ប៉ុន្តែអ្វីដែលគេពេញនិយមទិញទទួលទានជាងគេនោះ គឺពោតលីងអប់ មានបីរសជាតិ គឺរសជាតិស្លឹកខ្ទឹម រសជាតិហឹរ និងរសជាតិល្ងរ ដែលជាផលិតផលឈានមុខ និងទទួលបានការគាំទ្រច្រើនពីអតិថិជន។
អ្នកស្រី នុត សម្ផស្ស ជាម្ចាស់សិប្បកម្មនេះបានប្រាប់ឱ្យដឹងថា៖
«ផលិតផលឈានមុខយើងគឺ ពោតលីងអប់ ដោយសារតែវាប្លែក យើងមានរូបមន្តឆ្ងាញ់ប្លែកខុសគេ ដោយយើងលក់ជាកញ្ចប់ទម្ងន់ ២០០ក្រាមតម្លៃ ៨០០០រៀល ដែលលក់តាមការតាំងពិព័រណ៌នានា និងបោះតាមផ្សារម៉ាតទាំងនៅខេត្តបាត់ដំបងផង នៅតាមបណ្តាខេត្តផ្សេងៗផង មាននៅផ្សារទំនើប ហេង ឆៃលី និងបោះដុំតាមហាងកាហ្វេមួយចំនួនផងដែរ»។
ចំពោះបរិមាណផលិត អ្នកស្រីមិនអាចប៉ាន់ស្មានបានជាក់លាក់នោះទេ ដោយសារតែការកម្ម៉ង់ពីអតិថិជនមិនទៀងទាត់ ហើយម៉្យាងទៀត ការផលិតនៅជាលក្ខណៈគ្រួសារនៅឡើយ ប៉ុន្តែបើគិតជាចំណូលវិញ ក្នុងមួយខែ អាចរកបានប្រមាណ ៤-៦លានរៀល នេះគិតជារួមជាមួយផលិតផលផ្សេងទៀត ខណៈដែលផលិតផលពោតលីងអប់នេះអាចរក្សាទុកបានចន្លោះពី ៣ ទៅ៥ខែ។
សម្រាប់គ្រាប់ពោត ដែលជាវត្ថុធាតុដើមចម្បងក្នុងការផលិត ជាកសិផលដែលទិញពីកសិករក្នុងខេត្តបាត់ដំបងខ្លះ និងតាមខត្តដទៃខ្លះ ដែលជាគ្រាប់ពោតចាស់ ហាលស្ងួតស្រាប់ ដោយធម្មតាអ្នកស្រីទិញស្តុកទុកកន្លះតោន ឬមួយតោនតាមរដូវដែលសម្បូរ ឬខ្សត់ ហើយការរក្សាគ្រាប់ពោតទៀតសោតអាចទុកសម្រាប់ផលិតបានរយៈពេលពី ៦ខែ ទៅ ១ឆ្នាំ។
យ៉ាងណាក៏ដោយ សម្រាប់សិប្បកម្មមួយនេះនៅមានទំហំតូច ផលិតដោយដៃ និងមិនទាន់មានម៉ាស៊ីនទំនើបដើម្បីជំនួយក្នុងការផលិតនៅឡើយ ទើបធ្វើឱ្យការផលិតនៅមានកម្រិត ទោះបីមានកម្ម៉ង់ច្រើនក៏ផលិតមិនទាន់ដែរ។ ដោយឡែកសម្រាប់គោលបំណងនៅថ្ងៃអនាគត ម្ចាស់សិប្បកម្មស្រីមុំរូបនេះ ចង់ពង្រីកការផលិត និងបំពាក់នូវម៉ាស៊ីនជំនួយដូចជា ម៉ាស៊ីនលីងពោត និងម៉ាស៊ីនបំពងជាដើម ដើម្បីឱ្យការផលិតកាន់តែទូលំទូលាយ ហើយក៏អាចជួយដល់កសិករបានមួយចំណែកផងដែរ៕
Account
Security
Favourite Content