សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
សៀមរាប ៖ សហគមន៍កសិកម្មសម្ព័ន្ធកសិករខ្មែរអង្គរ នៅខេត្តសៀមរាប ទទួលបានជំនួយឥតសំណង៧០ម៉ឺនដុល្លារពីគម្រោងពិពិធកម្មកសិកម្មកម្ពុជា (CASDP) ដែលប្រាក់ជំនួយនេះនឹងរួមចំណែកក្នុងការពង្រីកហេដ្ឋារចនាសម្ព័ន្ធកសិកម្មសំខាន់ៗ ដើម្បីបង្កើនសមត្ថភាពផលិតកម្មរបស់សហគមន៍។
ឯកឧត្តម ឃឹម ហ្វីណង់ អ្នកនាំពាក្យក្រសួងកសិកម្ម រុក្ខាប្រមាញ់ និងនេសាទ បានគូសបញ្ជាក់ថា កញ្ចប់ជំនួយនេះ គឺស្ថិតនៅក្រោមកិច្ចព្រមព្រៀងហិរញ្ញប្បទានឥតសំណងបំពេញបន្ថែមទុនវិនិយោគដែលត្រូវបានធ្វើឡើងរវាងសហគមន៍កសិកម្មសម្ព័ន្ធកសិករខ្មែរអង្គរ និងគម្រោងពិពិធកម្មកសិកម្មកម្ពុជា នៅឃុំលាងដៃ ស្រុកអង្គរធំ ខេត្តសៀមរាប កាលពីថ្ងៃទី២២ ខែកក្កដា ឆ្នាំ២០២៥។
ក្រោមគម្រោងនេះ សហគមន៍នឹងរួមចំណែកវិនិយោគ ៤០% លើការសាងសង់ផ្ទះសំណាញ់ចំនួន ៥០ ខ្នង និងផ្លូវគ្រួសក្រហមប្រវែង ៥,៣ គីឡូម៉ែត្រនៅក្នុងសហគមន៍។ កិច្ចព្រមព្រៀងហិរញ្ញប្បទានឥតសំណងនេះ ត្រូវបានចុះហត្ថលេខារវាងសហគមន៍កសិកម្មសម្ព័ន្ធកសិករខ្មែរអង្គរ និងគម្រោងពិពិធកម្មកសិកម្មកម្ពុជា ដោយមានការចូលរួមពីលោកស្រី ចំរើន មុទិតា តំណាងធនាគារពិភពលោក។ នេះបើតាមការលើកឡើងរបស់ឯកឧត្តម ឃឹម ហ្វីណង់ ។
ឯកឧត្តម អ្នកនាំពាក្យរូបនេះបានលើកឡើងដែរថា តាមរយៈការវិនិយោគទាំងនេះ សហគមន៍កសិកម្មសម្ព័ន្ធកសិករខ្មែរអង្គរ នឹងមានសមត្ថភាពអាចផ្គត់ផ្គង់បន្លែសុវត្ថិភាពចម្រុះបានប្រមាណ ១៣៥ តោនក្នុងមួយឆ្នាំ ដែលនឹងរួមចំណែកយ៉ាងសំខាន់ក្នុងការលើកកម្ពស់សន្តិសុខស្បៀង និងជីវភាពរស់នៅរបស់សមាជិកសហគមន៍។
ឯកឧត្តម ឃឹម ហ្វីណង់ បានបញ្ជាក់ថា ៖
«ប្រាក់ជំនួយនេះ គឺដើម្បីចូលរួមវិនិយោគ ៤០ភាគរយលើផ្ទះសំណាញ់៥០ខ្នង និងកសាងផ្លូវគ្រួសក្រហមក្នុងសហគមន៍ប្រវែងប្រមាណ៥,៣គីឡូម៉ែត្រ ហើយកញ្ចប់ជំនួយនេះ សហគមន៍នឹងមានសមត្ថភាពផ្គត់ផ្គង់បន្លែសុវត្ថិភាពចម្រុះប្រមាណ១៣៥តោនក្នុងឆ្នាំ»។
សូមជ្រាបថា កន្លងមក ដើម្បីជួយគាំទ្រទុនបង្វិលដល់សហគមន៍កសិកម្មទំនើប រាជរដ្ឋាភិបាលកម្ពុជា បានសម្រេចជាគោលការណ៍ផ្តល់ឥណទានថ្មីចំនួន៣៥ លានដុល្លារអាមេរិក សម្រាប់ផ្តល់ឥណទានដល់សហគមន៍កសិកម្មទំនើបសម្រាប់រយៈពេល៣ឆ្នាំ គឺ ២០២៥-២០២៧។ រដ្ឋក៏កំពុងពង្រីកសហគមន៍កសិកម្មទំនើបនៅតាមបណ្តាខេត្ត និងគ្របដណ្តប់លើដំណាំដែលមានសក្តានុពលខ្ពស់ផ្សេងទៀត ដូចជា ស្វាយ កៅស៊ូ និងទុរេនជាដើម។
បច្ចុប្បន្ន ក្រសួងកសិកម្ម រុក្ខាប្រមាញ់ និងនេសាទ, ក្រសួងសេដ្ឋកិច្ច និងហិរញ្ញវត្ថុ ,ធនាគារអភិវឌ្ឍន៍ជនបទ និងកសិកម្ម និងសាជីវកម្មធានាឥណទាន កំពុងរៀបចំដំណើការឥណទានសម្រាប់ផ្តល់ឥណទានដល់សហគមន៍កសិកម្មទំនើបថ្មី ដែលត្រូវបានចុះបញ្ជីទទួលស្គាល់ផ្លូវការជាបន្តបន្ទាប់នៅក្នុងខេត្តចំនួន ៧ រួមមាន សៀមរាប កំពង់ធំ តាកែវ កំពង់ឆ្នាំង កណ្តាល ត្បូងឃ្មុំ និងពោធិ៍សាត់ លើមុខដំណាំយុទ្ធសាស្រ្តចំនួន ៤មុខគឺ ដំណាំស្រូវ ដំណាំបន្លែ ដំណាំស្វាយចន្ទី និងដំណាំម្រេច ដែលសហគមន៍គ្របដណ្តប់លើផ្ទៃដីចំនួន ១១ ៤២១ហិកតា និងមានផលិតភាពប្រចាំឆ្នាំចំនួន ១៩,៧៧លានដុល្លារ។
សូមបញ្ជាក់ដែរថា សហគមន៍កសិកម្មទំនើប ត្រូវបានបង្កើតឡើងដើម្បីប្រែក្លាយការធ្វើកសិកម្មលក្ខណៈគ្រួសារទៅជាសហគ្រាសសេដ្ឋកិច្ចកសិកម្មដ៏រឹងមាំ ដែលអាចតម្រង់ទិសផលិតកម្មស្របតាមតម្រូវការទីផ្សារ មានសមាហរណកម្មខ្ពស់ មានសេដ្ឋកិច្ចមាត្រដ្ឋាន និងមានសមត្ថភាពប្រកួតប្រជែងកាន់តែល្អប្រសើរ៕
Account
Security
Favourite Content