សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
បរទេស៖ យោងតាមប្រភពព័ត៌មានពី CNN បានរាយការណ៍ថា ប្រធានាធិបតីអាម៉េរិក Donald Trump យល់ព្រមបន្ទាបពន្ធលើការនាំចូលពីប្រទេសហ្វីលីពីន ពី ២០% មកនៅត្រឹម ១៩% បន្ទាប់ពីមេដឹកនាំប្រទេសទាំងពីរបានជួបពិភាក្សាគ្នានៅសេតវិមាន។
កាលពីថ្ងៃអង្គារសប្ដាហ៍នេះ លោក Trump បានបង្ហោះនៅលើ Truth Social ថា ៖
«ពន្ធថ្មី គឺជាផ្នែកមួយនៃកតិកាសញ្ញាឲ្យកាន់តែទូលំទូលាយ ដោយ ហ្វីលីពីន នឹងដកពន្ធលើទំនិញរបស់អាម៉េរិក ហើយប្រទេសទាំងពីរនឹងសហការគ្នាផ្នែកយោធា។ នេះវាគឺជាដំណើររួមគ្នាដ៏ល្អមួយ ហើយយើងបានបញ្ចប់កិច្ចព្រមព្រៀងពាណិជ្ជកម្ម»។
យ៉ាងណាមិញ Trump មិនបានផ្តល់ព័ត៌មានលម្អិតបន្ថែមអំពីកិច្ចព្រមព្រៀងនេះទេ។ នៅក្នុងផ្នែកនៃកិច្ចព្រមព្រៀងនេះ ទំនិញរបស់ ហ្វីលីពី នាំចេញទៅអាម៉េរិកនឹងជាប់ពន្ធ ១៩% ខណៈទំនិញនាំចេញពីអាម៉េរិកទៅហ្វីលីពីននឹងមិនជាប់ពន្ធឡើយ។ អ្វីដែលសំខាន់ បើទោះបីអាម៉េរិកបន្ទាបពន្ធលើការនាំចូលពីហ្វីលីពីនក៏ដោយ ប៉ុន្តែអត្រាពន្ធខ្ពស់ជាងអ្វីដែល Trump បានប្រកាសជាលើកដំបូងកាលពីខែមេសា ដែល Trump បានដំឡើងពន្ធឆ្លើយតបឲ្យមានភាពស្មើរគ្នា ១៧% លើការនាំចូលពីហ្វីលីពីន ប៉ុន្តែក្រោយមកអត្រាពន្ធបានកើនឡើង ២០% ក្នុងការប្រកាសនៅខែកក្កដានេះ។
មុនពេលកិច្ចប្រជុំទ្វេភាគី រដ្ឋមន្ត្រីហិរញ្ញវត្ថុ ហ្វីលីពីន លោក Ralph Recto បានលើកឡើងថា ហ្វីលីពីន នឹងបើកចំហរក្នុងការកាត់បន្ថយពន្ធលើទំនិញអាម៉េរិកដែលបានជ្រើសរើសមកត្រឹម ០% ដើម្បីបញ្ចុះបញ្ចូល Trump ឱ្យកាត់បន្ថយពន្ធ។ យ៉ាងណាមិញ លោក Recto មិនបញ្ជាក់អំពីផលិតផលណាមួយដែលត្រូវជ្រើសរើសសម្រាបកាត់បន្ថយពន្ធមកត្រឹម ០% នោះទេ គ្រាន់តែលោកបញ្ជាក់ថា ទីក្រុងម៉ានីល កំពុងជំរុញឱ្យមានកិច្ចព្រមព្រៀងពាណិជ្ជកម្មសេរីដែលអាចធ្វើទៅបានជាមួយអាម៉េរិក។ ក្រោយមក ប្រធានាធិបតីហ្វីលីពីន Ferdinand Marcos បានលើកឡើងថា ទីក្រុងម៉ានីល អាចអនុញ្ញាតយកពន្ធ ០% លើរថយន្តនាំចូលពីអាម៉េរិក ប៉ុន្តែមិនបានផ្តល់ពេលវេលាកំណត់បន្ថែមទៀតទេ។
ទន្ទឹមនឹងនេះ ស្ថានទូតហ្វីលីពីន ចេញសេចក្តីថ្លែងការណ៍មួយថា ការកាត់បន្ថយពន្ធចុងក្រោយបំផុតគឺជាការលើកទឹកចិត្តមួយ ប៉ុន្តែខ្លួនបន្តស្វែងរកមធ្យោបាយផ្សេងទៀតដើម្បីបង្កើនភាពជាដៃគូសេដ្ឋកិច្ចជាមួយនឹងអាម៉េរិកឲ្យកាន់តែស៊ីជម្រៅ។ គួរឲ្យបញ្ជាក់ដែរថា ហ្វីលីពីនគឺជាដៃគូពាណិជ្ជកម្មមួយរបស់អាម៉េរិក ដោយបានបញ្ជូនទំនិញប្រហែល ១៤,២ ពាន់លានដុល្លាររួមមាន គ្រឿងបន្លាស់រថយន្ត ម៉ាស៊ីនអគ្គិសនី វាយនភណ្ឌ និងប្រេងដូងទៅមហាអំណាចមួយនេះកាលពីឆ្នាំ ២០២៤។ អាម៉េរិកនាំចេញទំនិញទៅហ្វីលីពីនតម្លៃ ៩ ពាន់លានដុល្លាររួមមាន កុំព្យូទ័រ គ្រឿងអេឡិចត្រូនិច និងអាហារកែច្នៃជាដើម៕
Account
Security
Favourite Content