សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
បរទេស៖ វៀតណាម បានកំណត់គោលដៅរបស់ខ្លួនប្រកបដោយមហិច្ឆតាក្នុងការទាក់ទាញភ្ញៀវបរទេសឲ្យដល់ចំនួន ២៥ លាននាក់នៅឆ្នាំ២០២៦ នេះបើយោងតាមសេចក្ដីរាយការណ៍ពី Vietnam Pictorial។
នៅក្នុងឆ្នាំ ២០២៥ នេះ វៀតណាមបានស្វាគមន៍ភ្ញៀវទេសចរអន្តរជាតិប្រមាណ ២១,៥ លាននាក់។ដោយសារការងើបឡើងវិញដ៏រឹងមាំនៃវិស័យមួយនេះ រដ្ឋាភិបាលវៀតណាមបានដាក់គោលដៅទាក់ទាញភ្ញៀវបរទេសចំនួន ២៥ លាននាក់នៅឆ្នាំក្រោយ។ គោលដៅនេះត្រូវបានប្រកាសនៅក្នុងសន្និសីទបូកសរុបលទ្ធផលការងាររបស់វិស័យទេសចរណ៍ប្រចាំឆ្នាំ២០២៥ ដែលប្រារព្ធឡើងកាលពីថ្ងៃទី២៤ ខែធ្នូ ឆ្នាំ២០២៥ ក្រោមការចូលរួមពីសំណាក់ក្រសួងវប្បធម៌ កីឡា និងទេសចរណ៍របស់វៀតណាម។
លោក Nguyen Trung Khanh នាយកនៃអាជ្ញាធរជាតិទេសចរណ៍វៀតណាម (VNAT) បានលើកឡើងថា នាយករដ្ឋមន្ត្រីទទួលស្គាល់ថា វិស័យទេសចរណ៍ គឺជាចំណុចភ្លឺនៅក្នុងសង្គម និងសេដ្ឋកិច្ច ដែលបង្កើតបានជាជំហានដ៏សំខាន់មួយសម្រាប់ការអភិវឌ្ឍន៍ក្នុងដំណាក់កាលបន្ទាប់។ ការអភិវឌ្ឍន៍ស្ថាប័ន និងការកែលម្អគោលនយោបាយបានទទួលការយកចិត្តទុកដាក់ជាពិសេសពីសំណាក់រដ្ឋាភិបាល។ លើសពីនេះ អាជ្ញាធរជាតិទេសចរណ៍វៀតណាម (VNAT) បានណែនាំឱ្យក្រសួងវប្បធម៌ កីឡា និងទេសចរណ៍ ដាក់ឯកសារសំខាន់ៗមួយចំនួនជូនរដ្ឋាភិបាល និងនាយករដ្ឋមន្ត្រី ដើម្បីអនុម័តផែនការនានា ដូចជា ផែនការមេសម្រាប់ប្រព័ន្ធទេសចរណ៍ ចន្លោះឆ្នាំ២០២១-២០៣០ ដែលមានចក្ខុវិស័យដល់ឆ្នាំ២០៤៥ និងការលើកលែងទិដ្ឋាការចំនួន ១២ ប្រទេស។ អាជ្ញាធរជាតិទេសចរណ៍វៀតណាម (VNAT) កត់សម្គាល់ថា សកម្មភាពផ្សព្វផ្សាយទេសចរណ៍ត្រូវបានអនុវត្តជាប្រព័ន្ធ និងប្រកបដោយវិជ្ជាជីវៈពេញមួយឆ្នាំ២០២៥ ខណៈដែលអាជ្ញាធរបានចូលរួមក្នុងពិព័រណ៍ទេសចរណ៍អន្តរជាតិធំៗ ដើម្បីសិក្សាបន្ថែមផងដែរ។ មិនត្រឹមតែប៉ុណ្ណោះ ភាពទាក់ទាញទេសចររបស់វៀតណាមត្រូវបានផ្សព្វផ្សាយក្រោមប្រធានបទ “Vietnam – Travel to Love” តាមរយៈកម្មវធីមហោស្រពភាពយន្ត Cannes និងកម្មវិធីទេសចរណ៍ Hue 2025 ដែលទទួលបានចំណាប់អារម្មណ៍យ៉ាងទូលំទូលាយពីភ្ញៀវជាតិ និងអន្តរជាតិ។
ជាមួយគ្នានេះ ស្របពេលដែលវិស័យទេសចរណ៍ពិភពលោកកំពុងងើបឡើងវិញបន្តិចម្តងៗ វៀតណាម បានក្លាយជាគោលដៅដ៏លេចធ្លោមួយ និងទទួលបានការសរសើរពីអន្តរជាតិ។ អង្គការទេសចរណ៍សហប្រជាជាតិ (UN Tourism) បានទទួលស្គាល់ Lo Lo Chai និង Quynh Son ជាភូមិទេសចរណ៍ល្អបំផុតរបស់ពិភពលោក។ បន្ថែមពីនេះ វៀតណាម បានជាប់ឈ្មោះជាគោលដៅបេតិកភណ្ឌឈានមុខគេលើពិភពលោកចំនួន ៦ ដង និងគោលដៅនាំមុខគេរបស់អាស៊ីចំនួន ៧ ដង។ នៅឆ្នាំ២០២៥ ភ្ញៀវទេសចរអន្តរជាតិបានកើនឡើងប្រហែល ២២% ដែលលើសពីមធ្យមភាគសកលប្រហែល ៥% និងលើសពីមធ្យមភាគអាស៊ីប៉ាស៊ីហ្វិក ៨% ។ សមិទ្ធផលទាំងនេះ បានបង្កើតជាសន្ទុះដ៏រឹងមាំសម្រាប់វិស័យទេសចរណ៍ ដោយទទួលភ្ញៀវបរទេសចំនួន ២១,៥ លាននាក់ និងភ្ញៀវទេសចរក្នុងស្រុកចំនួន ១៣៥,៥ លាននាក់ ជាមួយនឹងការបង្កើតប្រាក់ចំណូលសរុបពីវិស័យទេសចរណ៍ប្រហែល ៣៨ ពាន់លានដុល្លារ៕
Account
Security
Favourite Content