ស្របពេលបច្ចេកទេសក្នុងការចិញ្ចឹមសត្វក្នុងស្រុកកំពុងមានភាពរីកចម្រើន ជាពិសេសការចិញ្ចឹម មាន់ និងទា ក្រួច ជាដើម នាំឱ្យមានការកែច្នៃនូវ​ឧបករណ៍ទូភ្ញាស់អគ្គិសនីសម័យថ្មី ដែលអាចផ្ដល់នូវអត្រាញាស់បានច្រើនតាមការចង់បាន ដែលត្រូវបានផលិត ផ្គុំ និងរៀបចំឡើងនៅ​ក្នុង​ស្រុកផ្ទាល់តែម្ដង។

លោក អេង​ រស់ ជាអ្នកផលិតទូភ្ញាស់មួយកន្លែងស្ថិតនៅតំបន់ចាក់អង្រែក្រោម បានមានប្រសាសន៍ប្រាប់ AMS ឲ្យដឹងថា កាលពីមុនស្ទើរតែគ្រប់​អាជីវកម្មភ្ញាស់ពងមាន់ ពងទា ឬពងក្រួចកាលពីប៉ុន្មានឆ្នាំមុនភាគច្រើនបាននាំចូលទូភ្ញាស់ពីប្រទេសជិតខាង ប៉ុន្តែបច្ចុប្បន្ននេះ ទូភ្ញាស់ត្រូវបានបង្កើតឡើងនៅក្នុងស្រុក និងមានប្រសិទ្ធភាពលើការភ្ញាស់បានដូចគ្នា។

លោកបន្តថា ៖

«ប្រភេទទូភ្ញាស់ដែលយើងរៀបចំបង្កើតសម្រាប់ដាក់លក់នៅលើទីផ្សារមានច្រើនទំហំដែលអាចដាក់ពងបានចាប់ពី ១៤០គ្រាប់រហូតដល់ ១ ០៥៦គ្រាប់ ដោយទូមួយអាចមានតម្លៃពី ១៦៥ដុល្លារឡើងទៅ អាស្រ័យទៅតាមទំហំ និងប្រភេទក្បាលម៉ាស៊ីន​ដែល​បំពាក់ក្នុងទូ តួយ៉ាង ដូចជាទូភ្ញាស់ដែលអាចផ្ទុកបាន ១៤០គ្រាប់ មានតម្លៃ ១៦៥ដុល្លារ ទំហំដាក់បាន ២៦៤គ្រាប់ តម្លៃ ២៨០ដុល្លារ និងទូទំហំ ៣៥០គ្រាប់ មានតម្លៃ ៣០០ដុល្លារ»។

សម្រាប់រូបរាង និងគុណភាពទូភ្ញាស់នេះវិញ គឺមិនចាញ់ផលិតផលនាំចូលទេ ដោយលោកបានច្នៃជាប្រព័ន្ធស្វ័យ​ប្រវត្តិក្នុងការបង្វិល​កញ្ច្រែង បាញ់ទឹក និងបឺតកម្ដៅចេញពេលក្ដៅជ្រុលជាដើម ហើយអតិថិជនរបស់លោកភាគច្រើននិយមទិញប្រភេទទូតូចដែល​មានទំហំ​សមល្មមអាចផ្ទុកពងបាន១៤០គ្រាប់ ពោល គឺងាយស្រួលសម្រាប់ចិញ្ចឹមតាមផ្ទះ ឬកសិដ្ឋានខ្នាតតូច។

ដោយឡែកវត្ថុធាតុដើម និងសម្ភារៈសំខាន់ៗ ម្ចាស់អាជីវកម្មខាងលើរៀបរាប់ថា ក្នុងការបង្កើតទូគឺត្រូវការជញ្ជាំងកាបូន ស្នោ ក្បាល​បញ្ជា កញ្ច្រែងដែកជាដើម ដែលសុទ្ធតែនាំចូលមកពីក្រៅស្រុក។ ចំពោះការរៀបចំបង្កើតទូភ្ញាស់វិញ មិនសូវមានភាពលំបាក​នោះទេដោយ​ទូមួយអាច​ចំណាយ​ពេល​ចន្លោះ ២-៣ថ្ងៃប៉ុណ្ណោះ ហើយអាចទទួលបានប្រាក់​ចំណេញចាប់ពី ៣០ដុល្លាឡើងទៅអាស្រ័យទៅតាមទំហំទូផងដែរ។​

លោក អេង រស់ បានប្រាប់ផងដែរថា  ដោយសារគុណភាព និងទំនុកចិត្តលើការប្រើប្រាស់ បច្ចុប្បន្ននេះ ទូភ្ញាស់របស់លោក ត្រូវបានទទួលការបញ្ជាទិញពីអតិថិជនតាមបណ្តាខេត្តផ្សេងៗជាច្រើន ដូចជាខេត្តព្រះវិហារ សៀមរាប និងតាកែវជាដើម ដែលសុទ្ធតែដឹងពីគុណភាពទូតៗគ្នា ហើយក៏មានអ្នកខ្លះបានធ្វើការបញ្ជាទិញតាមហ្វេសប៊ុកផងដែរ។

ពាក់ព័ន្ធទៅនឹងពងដែលដាក់ភ្ញាស់វិញ ត្រូវលោកបានប្រាប់ឱ្យដឹងដែរថា ធម្មតាគេត្រូវចំណាយពេលត្រឹមចន្លោះពី ១៨-២១ថ្ងៃ ពងនឹងញាស់ ប៉ុន្តែមិនមែនញាស់ទាំងអស់ទេ ដោយក្នុងមួយសប្ដាហ៍ដំបូងគេត្រូវពិនិត្យមើល​ទៅលើការវិវត្តរបស់ពង ប្រសិនពិនិត្យឃើញ​ថាពងណា​គ្មានសរសៃមេជីវិតវាត្រូវយកចេញ ព្រោះវាខូចមិនអាចញាស់បានទេ។

គួរបញ្ជាក់ដែរថា អាជីវកម្មមួយនេះចាប់ផ្ដើមឡើងអស់រយៈពេល ៤ឆ្នាំមកហើយ ដោយម្ចាស់អាជីវកម្មខាងលើបានរៀន​បច្ចេក​ទេស​​តាម YouTube ខ្លះ និងអនុវត្តកែច្នៃដោយខ្លួនឯងបន្ថែម។​ ដំបូងឡើយ លោកដំឡើង និងរៀបចំបង្កើតទូភ្ញាស់នេះ​ មានមតិ​ពី​អ្នកជិតខាង និងអ្នកប្រើប្រាស់ក្នុងការកែលម្អជារឿយៗ ហើយលោកក៏បានព្យាយាមអភិវឌ្ឍបន្ថែមទាំងរូបរាង និងគុណភាពទូ​ដែលអាច​ផ្ដល់លទ្ធភាពញាស់បានច្រើនដូចសព្វថ្ងៃ។

ចុងក្រោយ លោក អេង រស់ ក៏បានថ្លែងអំណរគុណដល់អតិថិជន​ទាំងអស់ដែលបានគាំទ្រទូភ្ញាស់​របស់លោកជា​បន្តបន្ទាប់​មកនេះ ហើយលោកក៏មានបំណងចង់ពង្រីកអាជីវកម្មមួយនេះឲ្យបានកាន់តែធំជាងនេះផងដែរ ដើម្បីអាចបំពេញតម្រូវការ​របស់​កសិករដែលប្រកបរបរភ្ញាស់ពងមាន់ ពងទាកាន់តែច្រើនតាមការចង់បាន៕