ភ្នំពេញ ៖ សេវាប្រាក់បញ្ញើ គឺសេវាហិរញ្ញវត្ថុដែលផ្តល់ដោយគ្រឹះស្ថានធនាគារ និងហិរញ្ញវត្ថុ ដើម្បីឱ្យសាធារណជនអាចដាក់ប្រាក់រក្សាទុកក្នុងគណនីធនាគារ ដើម្បីសន្សំ ទូទាត់ ឬ ធ្វើប្រតិបត្តិការសាច់ប្រាក់នានា។ គ្រឹះស្ថានធនាគារ និងហិរញ្ញវត្ថុ ដែលទទួលបានអាជ្ញាបណ្ណពីធនាគារ ដើម្បីទទួលប្រាក់បញ្ញើពីសាធារណជនមានតែធនាគារពាណិជ្ជ និងគ្រឹះស្ថានមីក្រូហិរញ្ញវត្ថុទទួលប្រាក់បញ្ញើតែប៉ុណ្ណោះ។

ក្នុងប្រទេសកម្ពុជា គ្រឹះស្ថានធនាគារ និងហិរញ្ញវត្ថុ បានផ្តល់សេវាប្រាក់បញ្ញើជាច្រើនប្រភេទ ស្របតាមបរិបទនៃទីផ្សារហិរញ្ញវត្ថុ​ តម្រូវការហិរញ្ញវត្ថុ និងគោលបំណងផ្សេងៗ របស់អតិថិជន។ ទោះយ៉ាងនេះក្តី ប្រភេទសេវាប្រាក់បញ្ញើចម្បងៗ ត្រូវបានចែងចែកជា ៣​ រួមមាន ៖

១.​​​​​​​​​​​​​​​​​ ប្រាក់បញ្ញើចរន្ត ៖ ជាប្រភេទប្រាក់បញ្ញើ ដែលភាគច្រើនប្រើប្រាស់សម្រាប់ប្រតិបត្តិការសាច់ប្រាក់ ឬ ការទូទាត់នានាក្នុងអាជីវកម្ម។ ប្រាក់បញ្ញើប្រភេទនេះ មិនទទួលបានការប្រាក់ ឬទទួលបានការប្រាក់តិចតួច អាស្រ័យទៅតាមគ្រឹះស្ថាននីមួយៗ ប៉ុន្តែអតិថិជនអាចដកសាច់ប្រាក់ ឬ ធ្វើប្រតិបត្តិការសាច់ប្រាក់បានគ្រប់ពេលវេលា ដោយមិនតម្រូវឱ្យជូនដំណឹងដល់គ្រឹះស្ថានជាមុន ហើយអតិថិជនក៏អាចស្នើសុំមូលប្បទានបត្រ (សែក) ដើម្បីប្រើប្រាស់សម្រាប់អាជីវកម្មរបស់ខ្លួនផងដែរ។

២. ប្រាក់បញ្ញើសន្សំ ៖ ជាប្រភេទប្រាក់បញ្ញើ ដែលប្រើប្រាស់សម្រាប់ការសន្សំ ឬការទូទាត់នានារបស់បុគ្គល ឬក្រុមគ្រួសារ។ ប្រាក់បញ្ញើប្រភេទនេះ ទទួលបានការប្រាក់ជាប្រចាំ ហើយអតិថិជន អាចដកសាច់ប្រាក់ ឬធ្វើប្រតិបត្តិការសាច់ប្រាក់បានគ្រប់ពេលវេលា ដោយមិនតម្រូវឱ្យជូនដំណឹងដល់គ្រឹះស្ថានជាមុន ប៉ុន្តែអតិថិជនមិនអាចស្នើសុំមូលប្បទានបត្រ (សែក) ដូចប្រាក់បញ្ញើចរន្តនោះទេ។

៣.​ ប្រាក់បញ្ញើមានកាលកំណត់ ៖ ជាប្រភេទប្រាក់បញ្ញើ ដែលប្រើប្រាស់សម្រាប់ការសន្សំដែលមានកាលកំណត់ច្បាស់លាស់ហើយ អតិថិជននឹងទទួលបានវិញ្ញាបនបត្រដាក់ប្រាក់បញ្ញើមានកាលកំណត់ ដោយមានបង្ហាញអំពីទំហំប្រាក់បញ្ញើ រយៈពេលនៃប្រាក់បញ្ញើ កាលបរិច្ឆេទផុតកំណត់នៃប្រាក់បញ្ញើ អត្រាការប្រាក់ និងចំណូល ការប្រាក់ជាដើម។ ប្រាក់បញ្ញើប្រភេទនេះ ទទួលបានការប្រាក់ខ្ពស់ ហើយការប្រាក់នឹងមានកាន់តែខ្ពស់ ប្រសិនបើរយៈពេលនៃប្រាក់បញ្ញើកាន់តែវែង។ សម្រាប់ប្រាក់បញ្ញើប្រភេទនេះ អតិថិជនអាចដកប្រាក់នៅកាលបរិច្ឆេទផុតកំណត់នៃប្រាក់បញ្ញើ ប៉ុណ្ណោះប្រសិនបើអតិថិជនចង់ដកប្រាក់មុនកាលកំណត់ អតិថិជនត្រូវជូន ដំណឹងជាមុនដល់គ្រឹះស្ថាន ហើយអតិថិជនអាចនឹងមិនទទួលបានការប្រាក់ដូចក្នុងវិញ្ញាបនបត្រ ឬ អាចទទួលរងពិន័យចំពោះការដកប្រាក់បញ្ញើមុនកាលកំណត់ អាស្រ័យទៅតាមលក្ខខណ្ឌរបស់គ្រឹះស្ថាននីមួយៗ៕