ព្រៃវែង ៖ ស្ថិតនៅក្នុងបរិបទទីផ្សារស្រូវមានតម្លៃថ្លៃគួរសម សម្រាប់ខេត្តព្រៃវែងបាន និងកំពុងផលិតពូជស្រូវប្រភេទថ្មីដែលស្ថិតនៅក្នុងដំណាក់កាលសាកល្បងក្នុងជំហានទី២ ជាមួយនឹងការទទួលបានលទ្ធផលគួរឱ្យគត់សម្គាល់ និងសាទរពីសំណាក់ថ្នាក់ដឹកនាំធនាគារអភិវឌ្ឍន៍ជនបទ និងកសិកម្ម(ARDB) ដែលជាសេនាធិការបស់រាជរដ្ឋាភិបាលកម្ពុជា។

ជាមួយនឹងដំណើរការនៃការផលិតពូជស្រូវប្រភេទថ្មីនេះ នៅថ្ងៃទី២១ ខែកុម្ភៈ ឆ្នាំ២០២៤ ឯកឧត្ដមបណ្ឌិត កៅ ថាច ប្រតិភូរាជរដ្ឋាភិបាល ទទួលបន្ទុកជាអគ្គនាយកធនាគារអភិវឌ្ឍន៍ជនបទ និងកសិកម្ម(ARDB) រួមជាមួយសហការីបានចុះពិនិត្យមើលការច្រូតកាត់ប្រមូលផលស្រូវជាក់ស្តែង ដែលជាស្រូវប្រភេទពូជថ្មីនៅទីតាំងស្រែគំរូ ស្ថិតនៅក្នុងស្រុកស្វាយអន្ទរ ខេត្តព្រៃវែង។

ការប្រមូលផលស្រូវសាកល្បងលើកទី២នេះ លោក ឈិត ប៊ុនថន ម្ចាស់រោងម៉ាស៊ីនកិនស្រូវក៏ដូចជាម្ចាស់ស្រែគំរូបានឱ្យដឹងថា នេះគឺជាស្រូវប្រភេទពូជថ្មី ហើយនៅមិនទាន់មានការកំណត់ ឬដាក់ឈ្មោះអ្វីឱ្យច្បាស់​លាស់នៅឡើយទេ ព្រោះវាកំពុងស្ថិតក្នុងការដំាដុះសាកល្បង ហើយការដាំដុះលើកទីមួយប្រើប្រាស់គ្រាប់ពូជតែ៣០គីឡូ​ក្រាមប៉ុណ្ណោះសម្រាប់ផ្ទៃដីមួយហិកតា និងលើកទីពីរប្រើគ្រាប់ពូជ១០០គីឡូក្រាម លើផ្ទៃដីមួយហិកតា។

លោកឈិត ប៊ុនថនបានបញ្ជាក់ថា ប្រភេទពូជស្រូវថ្មីខាងលើនេះ ប្រើប្រាស់ពេលវេលាដំាដុះពី ៩០ ទៅ​៩៥ ថ្ងៃ ដែលចំនួនរយៈពេលដាំដុះប្រមាណបីខែដូចគ្នាទៅនឹងស្រូវចំប៉ីស៧០ដែរ ហើយកសិករអាចប្រមូលផលបានក្នុងកម្រិតខ្ពស់។ គួររំឭកថា ទីតាំងស្រូវគំរូស្រុកស្វាយអន្ទរ ខេត្តព្រៃវែង ធ្លាប់បានពិសោធន៍ម្តងរួចមកហើយ ដោយទាំងលើកទី១ និងលើកទី២នេះ គឺទទួលបានទិន្នផលជាង ៨តោន ក្នុងមួយហិកតាដូចគ្នា។

ជាក់ស្តែងលើកទីមួយទទួលបានទិន្នផលចំនួន ៨តោន និង២៤០គីឡូក្រាម ហើយលើកទី២ អាចប្រមូលផលបានផល ៨តោន និង២០០គីឡូក្រាមក្នុងដីមួយហិកតា ហើយពូជស្រូវថ្មីនេះ អាចលក់បានថ្លៃប្រហាក់ប្រហែលទៅនឹងពូជស្រូវ ៥៤៥១ ដែលមានតម្លៃលើទីផ្សារក្នុងតំបន់ថ្ងៃនេះ ១១០០រៀលក្នុងមួយគីឡូក្រាម។

សូមជម្រាបថា ខេត្តព្រៃវែង កាលពីឆ្នាំ២០២៣នេះ(គិតត្រឹម១១ខែ) បរិមាណនាំស្រូវចេញក្រៅផ្លូវការទៅប្រទេសវៀតណាមមានចំនួនប្រមាណ ១,៩១៥,៦២៩តោន ចំណូលសរុប ៤៩៣,១៣៨,៤០៤ដុល្លារ។ ចំណែកតម្លៃស្រូវ IR504-04 ជាមធ្យមតម្លៃ១,២២០រៀល ក្នុង១គីឡូក្រាម, ស្រូវ OM5451តម្លៃ១២០០រៀលក្នុង១គីឡូ​ក្រាម និងស្រូវក្រអូបតម្លៃ ១,៣២០រៀល ក្នុង១គីឡូក្រាម។

ចំពោះផលិតកម្មដំណាំស្រូវរដូវវស្សានៅខេត្តព្រៃវែង គិតត្រឹមថ្ងៃទី១៥ ខែវិច្ឆិកា ឆ្នាំ២០២៣ អនុវត្តបានលើផ្ទៃដីព្រោះសរុប ២៨៥,០៤៤ហិកតា (ស្ទូងគ្មាន)ស្មើនឹង ១១៤.០២% នៃផែនការ ២៥០,០០០ហិកតា ធៀបនឹងឆ្នាំមុន ខ្ពស់ជាង ៨,២២៥ហិកតា (គិតក្នុងរយៈពេលដូចគ្នា)។ បញ្ចប់ការដាំដុះ ប្រមូលផលស្រូវរដូវវស្សាសម្រេចបាន ១៤៤,៣៤៦ហិកតា ស្មើនឹង៥០.៦៤% នៃផ្ទៃដីអនុវត្តបានសរុប ២៨៥,០៤៤ហិកតា បរិមាណផលសរុប ៥៥៨,៦៥២តោន។

ចំណែក ការបង្កបង្កើនស្រូវប្រាំងខេត្តព្រៃវែង បានកើនជាង៦ពាន់ហិកតា ខណៈផែនការដាំដុះមានប្រមាណ១២ម៉ឺនហិក​​​តា។ ខេត្តមួយនេះ ក្រសួងធនធានទឹកជួយអន្តរាគមន៍ដោះស្រាយបញ្ហាទឹកបានច្រើន ផ្ទៃដីសង្គ្រោះបានចំនួន ៣៦៦ ហិកតា ដោយប្រើស្ថានីយបូមទឹក ៤កន្លែង និងម៉ាស៊ីនបូមទឹកចល័ត ៦៥សេះ ចំនួន៤គ្រឿង ។

គិតត្រឹមថ្ងៃ១៣ ខែកុម្ភ: ឆ្នាំ២០២៤ ល្បឿនបង្កបង្កើនផលស្រូវដូវប្រាំង៖ស្រូវពង្រោះ(ព្រោះ)សរុប ១៣៨ ៩៥៤ហិកតា គិតជាភាគរយស្មើ ១៨៥,២៧% នៃផែនការ ៧៥ ០០០ហិកតា ប្រមូលផលសរុប ៤៥ ៣៤១ហិកតា គិតជាភាគរយ ៣២.៦៣% នៃផ្ទៃដីអនុវត្តបាន ១៣៨ ៩៥៤ហិកតា។

ចំណែកតម្លៃស្រូវ(គិតត្រឹមថ្ងៃ១៣ ខែកុម្ភ: ឆ្នាំ២០២៤) ជាមធ្យមស្រូវ IR504-04 តម្លៃ ១,២២០រៀល ក្នុង១គីឡូក្រាម, ស្រូវ OM5451តម្លៃ១២០០រៀលក្នុង១គីឡូក្រាម និងស្រូវក្រអូបតម្លៃ ១,៣២០រៀល ក្នុង១គីឡូក្រាម។

យោងតាមស្ថិតិកសិកម្ម (ឆ្នាំ២០២២) ផលិតកម្មស្រូវសរុបទាំងស្រូវវស្សា និងប្រាំង បានបង្ហាញថា នៅខេត្តបាត់ដំបងមានផ្ទៃដីផលិតស្រូវធំជាងគេ តែខេត្តព្រៃវែងផលិតស្រូវបានច្រើនជាងគេដោយសារមានដី​ស្រែ​ប្រាំងធំ និងទិន្នផលស្រូវប្រាំងខ្ពស់ជាងគេ។ ដោយឡែកនៅឆ្នាំ២០២៣ ខេត្តព្រៃវែង ជាប់ចំណាត់ថ្នាក់លេខ២ ក្នុងការផលិតដំណាំស្រូវ ហើយលេខ១បានទៅលើខេត្តបាត់ដំបងវិញ៕