ភ្នំពេញ ៖ សម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានបញ្ជាក់ថា រាជរដ្ឋាភិបាលអាណត្តិទី៧ បានដាក់ចេញកម្មវិធីនយោបាយអាទិភាពចំនួន៦ នៃយុទ្ធសាស្ត្របញ្ចកោណដំណាក់កាលទី១ ដែលរដ្ឋគ្រោងចំណាយថវិកាប្រមាណជិត ៤៥០លានដុល្លារ ដើម្បីជួយទៅដល់ប្រជាពលរដ្ឋរងគ្រោះ និងងាយរងហានិភ័យផ្សេងៗ។

សម្តេចធិបតី ហ៊ុន ម៉ាណែត បានថ្លែងបញ្ជាក់ដូចនេះ នាឱកាសអញ្ជើញជាអធិបតីបិទសន្និបាតក្រសួងសង្គមកិច្ច អតីតយុទ្ធជន និងយុវនីតិសម្បទា និងលើកទិសដៅឆ្នាំ២០២៤ នាព្រឹកថ្ងៃទី៦ ខែកុម្ភៈ ឆ្នាំ២០២៤។

សម្តេចធិបតី មានប្រសាសន៍បញ្ជាក់ថា ការជួយអន្តរាគមន៍របស់រាជរដ្ឋាភិបាលទៅដល់ប្រជាពលរដ្ឋ គឺធ្វើឡើងដោយផ្អែកលើគ្រាមានអាសន្ន និងការលំបាកប៉ុណ្ណោះ ពោលគឺមិនមែនជាការជួយជាអចិន្ត្រៃយ៍ឡើយ។

សម្តេចធិបតី ហ៊ុន ម៉ាណែត នាយករដ្ឋមន្ត្រី ថ្លែងបញ្ជាក់ថា ការអន្តរាគមរបស់រាជរដ្ឋាភិបាលក្នុងការជួយទៅដល់ប្រជាពលរដ្ឋដែលជួបការលំបាក ឬស្ថិតក្នុងគ្រាមានអាសន្ន មិនមែនធ្វើឡើងជារៀងរហូតនោះទេ។ សម្តេចបានលើកឧទាហរណ៍ ពាក់ព័ន្ធនឹងករណីជួយប្រជាពលរដ្ឋដែលរងគ្រោះដោយសារវិបត្តិជំងឺកូវីដ-១៩ និងរងគ្រោះដោយសារបញ្ហាផ្សេងៗ គឺនឹងត្រូវបិទបញ្ចប់នៅពេលដែលស្ថានភាពជំងឺកូវីដ-១៩ បានធូរស្រាល និងស្ថានភាពសេដ្ឋកិច្ចមានភាពល្អប្រសើរឡើង។ រីឯករណីជួយឧបត្ថម្ភដល់ស្ត្រីមានផ្ទៃពោះ រហូតដល់កូនអាយុ២ឆ្នាំ នឹងត្រូវបិទបញ្ចប់នៅពេលកូនផុតអាយុ២ឆ្នាំ។

សម្តេចធិបតី ហ៊ុន ម៉ាណែត បានមានប្រសាសន៍បន្តថា ជាក់ស្តែងរាជរដ្ឋាភិបាលអាណត្តិទី៧ បានដាក់ចេញកម្មវិធីនយោបាយអាទិភាពចំនួន៦ នៃយុទ្ធសាស្ត្របញ្ចកោណដំណាក់កាលទី១ ដែលរដ្ឋគ្រោងចំណាយថវិកាប្រមាណជិត ៤៥០លានដុល្លារ ដើម្បីជួយទៅដល់ប្រជាពលរដ្ឋរងគ្រោះ និងងាយរងហានិភ័យផ្សេងៗ ដែលរួមមាន៖
កម្មវិធីទី ១. ការផ្តល់ការថែទាំសុខភាព ឆ្ពោះទៅកម្មវិធីគ្របដណ្តប់សុខភាពជាសកល
កម្មវិធីទី ២. ការបណ្តុះបណ្តាលជំនាញវិជ្ជាជីវៈនិងបច្ចេកទេសដល់យុវជនមកពីគ្រួសារក្រីក្រ និងគ្រួសារងាយរងហានិភ័យ នៅទូទាំងប្រទេស
កម្មវិធីទី ៣. ការធ្វើស្ថាបនូបនីយកម្មកម្មវិធីជាតិជំនួយសង្គមសម្រាប់គ្រួសារក្រីក្រ ក្រុមជនងាយរងគ្រោះនៅក្នុងគ្រួសារក្រីក្រ និងគ្រួសារងាយរងហានិភ័យ នៅក្នុងគ្រាមានវិបត្តិសេដ្ឋកិច្ចនិងគ្រាមានគ្រោះអាសន្ន

កម្មវិធីទី ៤. ការដាក់ចេញនិងការជំរុញអនុវត្តយុទ្ធសាស្ត្រអភិវឌ្ឍសេដ្ឋកិច្ចក្រៅប្រព័ន្ធ ឱ្យមានលទ្ធភាពចូលរួមទៅក្នុងសេដ្ឋកិច្ចក្នុងប្រព័ន្ធ
កម្មវិធីទី ៥. ការដាក់ចេញនូវយន្តការសម្របសម្រួលនិងកម្មវិធីហិរញ្ញប្បទាន សំដៅលើកស្ទួយផលិតកម្ម រកទីផ្សារ និងរក្សាលំនឹងថ្លៃកសិផលសំខាន់ៗ ក្នុងកម្រិតសមរម្យ
និងកម្មវិធីទី ៦. ការដាក់ពង្រាយមន្ត្រីបច្ចេកទេសកសិកម្មទៅគ្រប់ឃុំ-សង្កាត់ ដែលមានសកម្មភាពកសិកម្ម នៅទូទាំងប្រទេស ដើម្បីជំរុញការលើកកម្ពស់ផលិតភាពកសិកម្ម និងជួយដល់គ្រួសារកសិករ ក្នុងការលើកស្ទួយផលិតផលកសិកម្មរបស់ខ្លួន និងការរៀបចំឱ្យមានសមាគមកសិករនៅតាមទីជនបទ។

សម្តេចធិបតីនាយករដ្ឋមន្ត្រី បានគូសបញ្ជាក់ថា រាជរដ្ឋាភិបាលនីតិកាលទី៧ នៃរដ្ឋសភា ប្តេជ្ញាបន្តអភិវឌ្ឍប្រព័ន្ធគាំពារសង្គមនៅព្រះរាជាណាចក្រកម្ពុជាឱ្យមានលក្ខណៈប្រមូលផ្តុំ, សង្គតិភាព, ប្រសិទ្ធភាព, សមធម៌ និងចីរភាព ដោយឈរលើស្មារតី «មិនបោះបង់ពលរដ្ឋណាម្នាក់» តាមរយៈការផ្តោតកិច្ចអន្តរាគមន៍របស់រាជរដ្ឋាភិបាលលើគ្រួសារក្រីក្រ ក្រុមជនងាយរងគ្រោះ និងគ្រួសារងាយរងហានិភ័យ។

សម្តេចធិបតី បានថ្លែងបន្តថា ជាចក្ខុវិស័យរយៈពេលវែងរបស់រាជរដ្ឋាភិបាល គឺការបន្តពង្រឹងការអភិវឌ្ឍប្រព័ន្ធគាំពារសង្គមនៅកម្ពុជាឱ្យកាន់តែរឹងមាំ សំដៅផ្តល់ការគាំពារជូនដល់ប្រជាពលរដ្ឋកម្ពុជាគ្រប់រូបពីអសន្តិសុខប្រាក់ចំណូល ក្នុងអំឡុងពេលប្រឈមនឹងហានិភ័យនានា ដែលអាចកើតមានឡើងនៅក្នុងវដ្ដជីវិតនីមួយៗ តាមរយៈការបន្តពង្រីកវិសាលភាពរបបសន្តិសុខសង្គម និងកម្មវិធីជាតិជំនួយសង្គមដែលមានស្រាប់ ទៅកាន់ក្រុមពលរដ្ឋដែលមិនទាន់ទទួលបានការគាំពារ ព្រមទាំងពិនិត្យលទ្ធភាពដាក់ចេញនូវរបប ឬកម្មវិធីថ្មីៗ ទៅតាមភាពជាក់ស្តែងនៃការវិវឌ្ឍនៃសង្គម-សេដ្ឋកិច្ច៕