សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ក្នុងគោលបំណងបំពេញតម្រូវការឱនភាពថវិកាជាតិ រាជរដ្ឋាភិបាលមានតម្រូវការហិរញ្ញប្បទានទំហំ ៣,០៤% នៃផលិតផលសរុបក្នុងស្រុក(ផ.ស.ស) ព្រមទាំងមានតម្រូវការហិរញ្ញប្បទានទំហំ ១,១៦% នៃផ.ស.ស ទៀត ស្មើនឹង ២ ៤២៨ ប៊ីលានរៀល សម្រាប់ការទូទាត់ប្រាក់ខ្ចីដើម្បីរំលស់បំណុលសាធារណៈក្នុងប្រទេស និងក្រៅប្រទេស ស្របតាមវិធាន និងនីតិវិធីថ្មីនៃការទូទាត់ប្រាក់ខ្ចី ដែលបានកំណត់ក្នុងច្បាប់ស្តីពីប្រព័ន្ធហិរញ្ញវត្ថុសាធារណៈឆ្នាំ២០២៣។
យោងតាមសរាចរស្តីពីការអនុវត្តច្បាប់ស្តីពីហិរញ្ញវត្ថុសម្រាប់ការគ្រប់គ្រងឆ្នាំ២០២៥ របស់ក្រសួងសេដ្ឋកិច្ច និងហិរញ្ញវត្ថុ បានឱ្យដឹងថា រាជរដ្ឋាភិបាលមានតម្រូវការហិរញ្ញប្បទានក្នុងទំហំ ៤,២០% នៃ ផ.ស.ស. ដែលនឹងត្រូវបានគាំទ្រហិរញ្ញប្បទានក្នុងប្រទេស តាមរយៈការបោះផ្សាយមូលបត្ររដ្ឋក្នុងទំហំ ៥០០ ប៊ីលានរៀល សមមូលនឹងប្រមាណ ១២៣លានដុល្លារអាមេរិក និងហិរញ្ញប្បទានក្រៅប្រទេសក្នុងទំហំ ៣,៩៦% នៃ ផ.ស.ស. ត្រូវជាប្រមាណ ៨ ២៨០ប៊ីលានរៀល សមមូលនឹងប្រមាណ ២ ០៣៥ លានដុល្លារអាមេរិក ក្នុងនោះរួមមានមូលនិធិទ្រទ្រងថវិកា ទំហំ ០,៩៤% នៃ ផ.ស.ស. ត្រូវជាប្រមាណ ១ ៩៧៥ បីលានរៀល សមមូលនឹងប្រមាណ ៤៨៥ លាន ដុល្លារអាមេរិក និងថវិកាវិនិយោគសាធារណៈ ដោយហិរញ្ញប្បទានក្រៅប្រទេស ទំហំ៣.០១% នៃ ផ.ស.ស. ត្រូវជាប្រមាណ ៦ ៣០៥ ប៊ីលានរៀល សមមូលនឹងប្រមាណ ១ ៥៥០ លានដុល្លារអាមេរិក។
គួរបញ្ជាក់ថា ច្បាប់ស្តីពីហិរញ្ញវត្ថុសម្រាប់ការគ្រប់គ្រងឆ្នាំ២០២៥ មានគោលដៅបន្តគាំទ្រការអនុវត្តកម្មវិធីនយោបាយរបស់រាជរដ្ឋាភិបាល ជាពិសេសការអនុវត្តអាទិភាពគោលនយោបាយសំខាន់ៗ និងវិធានការគន្លឹះនានាដែលត្រូវបានដាក់ឱ្យអនុវត្តជាបន្តបន្ទាប់ ចាប់ពីដើមនីតិកាលទី៧ នៃរដ្ឋសភា ឱ្យសម្រេចបាននូវលទ្ធផលជាអតិបរមា ដើម្បីឆ្លើយតបនឹងសំណូមពរ, សេចក្តីត្រូវការ និងការរំពឹងទុករបស់ប្រជាជនកម្ពុជា។
ទន្ទឹមនេះ ក្នុងបរិកាណ៍ដែលកម្ពុជាកំពុងទទួលផលពីសន្តិភាព និងស្ថិរភាពនយោបាយក្នុងប្រទេស ហើយសេដ្ឋកិច្ចក៏កំពុងងើបឡើងវិញ និងត្រឡប់ទៅរកភាពប្រក្រតីក្រោយវិបត្តិនៃជំងឺកូវីដ-១៩ កម្ពុជាក៏ដូចជាប្រទេសឯទៀតលើសកលលោកដែរ កំពុងត្រូវបានបន្តហ៊ុមព័ទ្ធដោយហានិភ័យ និងភាពមិនប្រាកដប្រជាខ្ពស់ ដែលប្រការនេះអាចយាយីដល់កិច្ចខិតខំប្រឹងប្រែងក្នុងការបន្តអភិវឌ្ឍសង្គម សេដ្ឋកិច្ចរបស់ខ្លួន ដើម្បីឈានទៅដំណាក់កាលថ្មីទៀត។
ជាមួយគ្នានេះ កម្ពុជាក៏ត្រូវត្រៀមលក្ខណៈឱ្យបានសមស្របក្នុងការទប់ទល់នឹងផលប៉ះពាល់ពីកត្តាខាងក្រៅប្រទេសដែលមានជាអាទិ៍ ការកើនឡើងនូវភាពតានតឹងភូមិសាស្ត្រនយោបាយតំបន់ និងសកល ជាពិសេស ការអូសបន្លាយនៃសង្គ្រាមរុស្ស៊ី-អ៊ុយក្រែន សង្គ្រាមរវាងអ៊ីស្រាអែល និងក្រុមហាម៉ាស រួមទាំងលទ្ធភាពនៃការផ្ទុះឡើងក្នុងទ្រង់ទ្រាយធំនៃជម្លោះនៅតំបន់សមុទ្រក្រហម ដែលនឹងធ្វើឱ្យប៉ះពាល់ដល់ច្រវាក់ផ្គត់ផ្គង់សកល និងអាចរុញច្រានថ្លៃទំនិញអន្តរជាតិឱ្យហក់ឡើងវិញ, ការបែកខ្ញែកនៃសេដ្ឋកិច្ចសកល ដែលប៉ះពាល់ដល់កិច្ចសហប្រតិបត្តិការ និងពាណិជ្ជកម្មអន្តរជាតិ, ការបន្តនិន្នាការថមថយនៃកំណើនសេដ្ឋកិច្ចសកល និងភាពមិនច្បាស់លាស់នៃទស្សនវិស័យសេដ្ឋកិច្ចចិន ក៏ដូចជាការប្រែប្រួលអាកាសធាតុ និងគ្រោះធម្មជាតិ ដែលអាចធ្វើឱ្យប៉ះពាល់ខ្លាំងដល់វិស័យកសិកម្ម និងបង្កឱ្យមានបញ្ហាសន្តិសុខស្បៀង និងការកើនឡើងនៃថ្លៃទំនិញ ជាពិសេសថ្លៃម្ហូបអាហារ និងធាតុចូលកសិកម្មជាដើម៕ ដោយ ៖ វិន ឈុនហ៊ាត
Account
Security
Favourite Content