សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
បរទេស៖ ប្រធានាធិបតីអាម៉េរិក លោក ដូណាល់ ត្រាំ បានប្រកាសថា កោះតៃវ៉ាន់យល់ព្រមទិញឧស្ម័នធម្មជាតិរាវ (LNG) ចំនួន ៣០ ភាគរយពីគម្រោង Alaska LNG និងត្រៀមវិនិយោគទឹកប្រាក់ ៤,៤ ពាន់លានដុល្លារអាម៉េរិក ដើម្បីគាំទ្រដល់ការអភិវឌ្ឍគម្រោងនេះ។ នេះបើយោងតាមការរាយការណ៍របស់សារព័ត៌មានរ៉យទ័រ។
លោក ត្រាំ បានថ្លែងដូច្នេះក្នុងពេលជួបជុំអ្នកគាំទ្រនៅរដ្ឋអាឡាស្កា កាលពីថ្ងៃអង្គារ។ ទោះជាយ៉ាងណា លក្ខខណ្ឌលម្អិតនៃកិច្ចព្រមព្រៀងនេះមិនទាន់ត្រូវបានបញ្ជាក់ជាសាធារណៈនៅឡើយទេ ខណៈក្រសួងសេដ្ឋកិច្ចតៃវ៉ាន់ ដែលទទួលខុសត្រូវលើគោលនយោបាយថាមពល មិនទាន់ផ្តល់ការអត្ថាធិប្បាយភ្លាមៗជុំវិញការប្រកាសនេះទេ។
ការប្រកាសនេះកើតឡើងចំពេលតៃវ៉ាន់កំពុងព្យាយាមធានាស្ថិរភាពនៃការផ្គត់ផ្គង់ថាមពល និងបង្កើនការទិញឧស្ម័នពីអាម៉េរិក។ កាលពីខែកុម្ភៈ មន្ត្រីតៃវ៉ាន់បានលើកឡើងថា កោះនេះគ្រោងបង្កើនការទិញ LNG ពីអាម៉េរិកឱ្យស្មើប្រមាណមួយភាគបីនៃបរិមាណនាំចូលសរុបក្នុងឆ្នាំនេះ ដោយកាត់បន្ថយការទិញពីប្រទេសផ្សេងៗ។
នាយករដ្ឋមន្ត្រីតៃវ៉ាន់ លោក Cho Jung-tai បានប្រាប់អ្នកសារព័ត៌មានថា រដ្ឋាភិបាលមានភារកិច្ចរក្សាស្ថិរភាពនៃការផ្គត់ផ្គង់ថាមពលទាំងមូល និងពង្រឹងភាពធន់នៃប្រព័ន្ធថាមពល។
តៃវ៉ាន់ពឹងផ្អែកលើការនាំចូលថាមពលជាង ៩០ ភាគរយនៃតម្រូវការសរុបរបស់ខ្លួន។ កោះនេះក៏កំពុងប្រឈមនឹងតម្រូវការអគ្គិសនីកើនឡើង ដោយសារការរីកចម្រើននៃវិស័យបញ្ញាសិប្បនិម្មិត (AI) និងតួនាទីរបស់ខ្លួនក្នុងឧស្សាហកម្មផលិតបន្ទះឈីបតាមរយៈក្រុមហ៊ុន TSMC។ ការព្យាករណ៍បង្ហាញថា កំណើនតម្រូវការអគ្គិសនីជាមធ្យមរបស់តៃវ៉ាន់អាចខ្ពស់ជាងជប៉ុន និងកូរ៉េខាងត្បូងត្រឹមឆ្នាំ ២០៣៥។
កាលពីឆ្នាំ ២០២៥ ក្រុមហ៊ុនថាមពលរដ្ឋតៃវ៉ាន់ CPC Corp បានចុះហត្ថលេខាលើកិច្ចព្រមព្រៀងជាមួយក្រុមហ៊ុន Alaska Gasline Development Corp ដើម្បីទិញ LNG និងវិនិយោគលើគម្រោងបំពង់បង្ហូរឧស្ម័ននេះ។ យោងតាមអភិបាលរដ្ឋអាឡាស្កា តៃវ៉ាន់ក៏បានចុះហត្ថលេខាលើលិខិតបំណងទិញ LNG ចំនួន ៦ លានតោនក្នុងមួយឆ្នាំពីគម្រោងនេះផងដែរ។ ក្នុងអំឡុងពេលនោះ លោក Pan Men-an អគ្គលេខាធិការខុទ្ទកាល័យប្រធានាធិបតីតៃវ៉ាន់ បានទៅទស្សនកិច្ចនៅទីតាំងគម្រោងដោយផ្ទាល់។
ប្រសិនបើសាងសង់រួចរាល់ គម្រោង Alaska LNG នឹងមានសមត្ថភាពនាំចេញឧស្ម័នធម្មជាតិរាវរហូតដល់ ២០ លានតោនក្នុងមួយឆ្នាំ។ បច្ចុប្បន្ន គម្រោងនេះប្រមូលបានកិច្ចព្រមព្រៀងផ្គត់ផ្គង់ចំនួន ១៣ លានតោនក្នុងមួយឆ្នាំ ពីអ្នកទិញនៅអាស៊ី និងក្រុមហ៊ុនថាមពលបារាំង TotalEnergies។ គម្រោងនេះនៅតែត្រូវការកិច្ចព្រមព្រៀងផ្គត់ផ្គង់បន្ថែមចំនួន ៣ លានតោនក្នុងមួយឆ្នាំ ព្រមទាំងត្រូវបម្លែងកិច្ចព្រមព្រៀងនានាទៅជាកិច្ចសន្យាដែលមានកាតព្វកិច្ចផ្លូវច្បាប់ ដើម្បីអាចទាក់ទាញទុនសម្រាប់ការសាងសង់។
គម្រោងនេះមានគោលដៅដឹកជញ្ជូន LNG ពីអាម៉េរិកទៅកាន់ទីផ្សារអាស៊ី រួមទាំងតៃវ៉ាន់ ដោយមិនចាំបាច់ឆ្លងកាត់ព្រែកជីកប៉ាណាម៉ា ឬធ្វើដំណើរជុំវិញទ្វីបអាហ្វ្រិក ដែលអាចជួយកាត់បន្ថយរយៈពេល និងចំណាយដឹកជញ្ជូន។
កាលពីខែមុន លោក ត្រាំ ក៏បានប្រកាសថា កូរ៉េខាងត្បូងយល់ព្រមវិនិយោគ ៥៤ ពាន់លានដុល្លារលើគម្រោង Alaska LNG ផងដែរ។ ប៉ុន្តែទីក្រុងសេអ៊ូលបានបញ្ជាក់ថា កិច្ចព្រមព្រៀងនេះមិនទាន់ត្រូវបានសម្រេចជាផ្លូវការនៅឡើយទេ។
តៃវ៉ាន់បានប្តេជ្ញាបង្កើនការទិញទំនិញពីអាម៉េរិក រួមទាំងផលិតផលថាមពល ក្នុងគោលបំណងកាត់បន្ថយអតិរេកពាណិជ្ជកម្មដ៏ធំរបស់ខ្លួនជាមួយទីក្រុងវ៉ាស៊ីនតោន៕
Account
Security
Favourite Content