សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ អ្នកអភិវឌ្ឍន៍អចលនទ្រព្យដ៏ធំមួយនៅក្នុងប្រទេសកម្ពុជា អ្នកឧកញ៉ា សៀ ឬទ្ធី ប្រធានក្រុមប្រឹក្សាភិបាលនៃក្រុមហ៊ុន Worldbridge Group បានមានប្រសាសន៍ក្នុងកិច្ចសម្ភាសន៍ជាមួយអ្នកសារព័ត៌មានឱ្យដឹងថា ទីផ្សារខុនដូនៅក្នុងប្រទេសកម្ពុជាមានភាពទូលាយ និងងាយស្រួលលក់ជាងលំនៅឋានក្នុងបុរី ដូច្នេះ បើសិនជាការអភិវឌ្ឍលំនៅឋានជាបុរីច្រើនលើសពីតម្រូវការនឹងធ្វើឱ្យចាល់ទីផ្សារពិបាកក្នុងការលក់ចេញ ។
អ្នកឧកញ៉ាបានមានប្រសាសន៍ថា បើនិយាយពីទីផ្សារលំនៅឋានគឺផ្ដោតលើខុនដូ និងផ្ទះជាប់ដី ដូចជា ផ្ទះក្នុងបុរីជាដើម ហើយសម្រាប់លំនៅឋានទាំងពីរប្រភេទនេះ អ្នកឧកញ៉ាមើលឃើញថា ខុនដូជាទីផ្សារដែលមានភាពងាយស្រួល និងទូលំទូលាយជាងលំនៅឋានក្នុងបុរី ពីព្រោះខុនដូគេអាចលក់បានទាំងភ្ញៀវជាជនជាតិបរទេស និងភ្ញៀវក្នុងស្រុក ចំណែកលំនៅឋានក្នុងបុរី គឺអាចលក់បានតែអតិថិជនជាជនជាតិខ្មែរប៉ុណ្ណោះ ដោយសារច្បាប់ក្នុងប្រទេសកម្ពុជា ជនបរទេសអាចមានសិទ្ធិទិញផ្ទះចាប់ពីជាន់ទី១ឡើងទៅ ហើយខុនដូជាលំនៅឋានដែលមានច្រើនជាន់ដែលជនបរទេសអាចទិញស្នាក់នៅ ឬក៏ជួលបាន ។
អ្នកឧកញ៉ាបន្តថា ៖
«សម្រាប់គម្រោង Worldbridge Sport Village ដែលស្ថិតនៅប៉ែកខាងជើងរាជធានីភ្នំពេញ មានអភិវឌ្ឍន៍ទាំងខុនដូ និងផ្ទះក្នុងបុរី ប៉ុន្តែសម្រាប់គម្រោងទាំងមូល អគារខុនដូ ដែលក្រុមហ៊ុនបានអភិវឌ្ឍគឺមានជនបរទេសទិញគម្រោងទាំងមូលៗ ចំនួន៦អគារបាត់ទៅហើយ នៅឡើយតែគម្រោងផ្ទះក្នុងបុរីប៉ុណ្ណោះ ដែលលក់មិនទាន់អស់ ដូច្នេះយើងមើលឃើញថា គម្រោងអភិវឌ្ឍន៍ខុនដូគឺលក់ចេញលឿនជាងគម្រោងលំនៅឋានជាបុរី »។
អ្នកឧកញ៉ាបានបន្ថែមថា ក្នុងអំឡុងពេលបច្ចុប្បន្ននេះ ទៅរយៈពេល ២ ឬ ៣ ឆ្នាំខាងមុខទៀត វិស័យអចលនទ្រព្យនឹងមិនទាន់ប្រសើរដូចមុនទេ តែក្នុងរយៈពេល ២ ទៅ ៣ឆ្នាំទៀត វិស័យនេះអាចនឹងប្រសើរ និងមានតម្រូវការកាន់តែច្រើន ប៉ុន្តែវិស័យដែលមានតម្រូវការ និងងើបឡើងខ្ពស់មិនមែនជាការអភិវឌ្ឍខុនដូ ឬលំនៅឋាននោះទេ តែវាអាចតម្រូវការឃ្លាំង រោងចក្រជាដើម ក្នុងនោះមានទាំងឃ្លាំងសម្រាប់ស្តុកទំនិញឧស្សាហកម្ម និងឃ្លាំងស្តុកទុកកសិផលផងដែរ ។ ដូច្នេះ ចាប់ពីពេលនេះទៅ អ្នកវិនិយោគអាចងាករកមើលការវិនិយោគលើប្រភេទនេះវិញ ។
យោងតាមរបាយការណ៍របស់ក្រុមហ៊ុនអចលនទ្រព្យ CBRE Cambodia បានបង្ហាញថា ក្នុងឆ្នាំ២០២៤កន្លងទៅនេះ ចំនួនខុនដូនៅក្នុងរាជធានីភ្នំពេញមាន ៧២ ០០០យូនីត ហើយរំពឹងថា ក្នុងឆ្នាំ២០២៥ខាងមុខ ការអភិវឌ្ឍខុនដូ នៅក្នុងរាជធានីភ្នំពេញ មានកើនឡើងដល់ ៧៨ ០០០យូនីត ។ ចំណែកលំនៅឋានជាបុរី ក្នុងឆ្នាំ២០២៤ មានចំនួន ១៦៧ ០០០ល្វែង ដោយរំពឹងថានឹងកើនឡើងដល់ ១៨២ពាន់ល្វែង/ខ្នង នៅក្នុងឆ្នាំ២០២៥នេះ ។
បើតាមឯកឧត្តម សាយ សំអាល់ ឧបនាយករដ្ឋមន្ត្រី និងជារដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ បានថ្លែងថា អ្នកអភិវឌ្ឍន៍លំនៅឋាននៅក្នុងប្រទេសកម្ពុជាគួរសិក្សាពីតម្រូវការ និងទីផ្សារជាមុនសិន មុននឹងសង់លំនៅឋានផ្គត់ផ្គង់ជូនប្រជាពលរដ្ឋ ។ ក្នុងអំឡុងពេលពលរដ្ឋមានតម្រូវការផ្ទះសមរម្យ តែអភិវឌ្ឍន៍បែរជាសាងសង់ផ្ទះតម្លៃខ្ពស់ តម្លៃថ្លៃ ដែលធ្វើឱ្យលំនៅឋានសាងសង់រួចមិនមានអ្នកទិញ ព្រោះតែពលរដ្ឋមិនមានលទ្ធភាពទិញផ្ទះតម្លៃថ្លៃៗសម្រាប់ស្នាក់នៅ ។
ឯកឧត្តមក៏បានណែនាំឱ្យអ្នកអភិវឌ្ឍន៍លំនៅឋាននៅក្នុងប្រទេសកម្ពុជាត្រូវតាមដានព្រឹត្តិការណ៍ពិភពលោក ទាំងសេដ្ឋកិច្ចពិភពលោក និងនយោបាយពិពភពលោក ពីព្រោះថាកម្ពុជាបានធ្វើសមាហរណកម្មសេដ្ឋកិច្ចជាមួយនឹងពិភពលោក ដូច្នេះ នៅពេលពិភពលោកមានបញ្ហាវានឹងជះឥទ្ធិពលដល់សេដ្ឋកិច្ចកម្ពុជា ហើយនៅពេលសេដ្ឋកិច្ចកម្ពុជាមានបញ្ហាវាក៏ធ្វើឱ្យប៉ះពាល់ដល់ទីផ្សារលំនៅឋាន និងអចលនទ្រព្យរបស់កម្ពុជាផងដែរ ៕
Account
Security
Favourite Content