សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ប្រជាជនកម្ពុជាបានផ្លាស់ប្តូរឥរិយាបទពីការទូទាត់ជាសាច់ប្រាក់មកជាការទូទាត់បែបឌីជីថល ស្របពេលបច្ចេកវិទ្យាហិរញ្ញវត្ថុក្នុងការផ្តល់សេវាទូទាត់ បាន និងកំពុងបង្កើននូវជំនឿទុកចិត្តដល់សាធារណជនក្នុងការប្រើប្រាស់សេវាទូទាត់សងប្រាក់។
យោងតាមរបាយការណ៍ធនាគារជាតិនៃកម្ពុជាបានឱ្យដឹងថា គិតត្រឹមឆ្នាំ២០២២ គ្រឹះស្ថានផ្តល់សេវាទូទាត់សងប្រាក់ចំនួន ៣៥ បានទទួលអាជ្ញាបណ្ណ និងគ្រឹះស្ថានធនាគារនិង ហិរញ្ញវត្ថុចំនួន ២ បានទទួលលិខិតអនុញ្ញាតធ្វើប្រតិបត្តិការទូទាត់សងប្រាក់។ ជាទូទៅ ផលិតផល និងសេវារបស់គ្រឹះស្ថានទាំងនេះមានលក្ខណៈជាការទូទាត់បែបឌីជីថល ដែលអាចធ្វើឡើងតាមរយៈ កម្មវិធីទូទាត់ចល័ត ឬនៅតាមបញ្ជរភ្នាក់ងារ និងបណ្ដាញទូទាត់ជាច្រើន។
ការប្រើប្រាស់បច្ចេកវិទ្យាហិរញ្ញវត្ថុក្នុងការផ្តល់សេវាទូទាត់ ជាកត្តាមួយក្នុងការលើកកម្ពស់បរិយាបន្នហិរញ្ញវត្ថុ ជំរុញការប្រកួតប្រជែង បង្កើនភាពច្នៃប្រឌិត និងបង្កើននូវជំនឿទុកចិត្តដល់សាធារណជនក្នុងការប្រើប្រាស់សេវាទូទាត់ សងប្រាក់។
ធនាគារជាតិបានឱ្យដឹងដូច្នេះថា ៖
“ការប្រើប្រាស់សេវាទូទាត់សងប្រាក់នៅតែបន្តមាននិន្នាការកើនឡើងគួរឱ្យកត់សម្គាល់ ដោយអតិថិជនបានផ្លាស់ប្តូរឥរិយាបទពីការទូទាត់ជាសាច់ប្រាក់មកជាការទូទាត់បែបឌីជីថល ក្នុងនោះចំនួនអតិថិជនដែលបានចុះឈ្មោះបង្កើតគណនីអ៊ីវ៉ាឡេតសរុបកើនដល់ ១៩,៥ លានគណនី ចំនួនប្រតិបត្តិការ របស់សេវាទូទាត់សងប្រាក់បានកើនឡើងពី ៧០៨ លានប្រតិបត្តិការ ដល់ ១ ពាន់លានប្រតិបត្តិការ ហើយទំហំទឹកប្រាក់ក៏បានកើនឡើងដល់ ២៧២,៨ ពាន់លានដុល្លារអាមេរិក (កើន ៣៤%) ប្រមាណជាង ៩ ដង នៃផលិតផលក្នុងស្រុកសរុប”
គ្រឹះស្ថានធនាគារនិងហិរញ្ញវត្ថុបានផ្តល់សេវាធនាគារតាមអ៊ីនធឺណេត សេវាធនាគារចល័ត និងបានចេញផ្សាយបណ្ណទូទាត់សរុបមានចំនួន ១២,៣ លានបណ្ណ។ ការគ្រប់គ្រង មូលនិធិរបស់គ្រឹះស្ថានផ្តល់សេវាទូទាត់សងប្រាក់ និងគ្រឹះស្ថានធនាគារនិងហិរញ្ញវត្ថុផ្តល់សេវាទូទាត់ សងប្រាក់ មានភាពល្អប្រសើរ ដោយគ្រឹះស្ថានរក្សាបាននូវសមតុល្យក្នុងគណនីអាណត្តិព្យាបាលបាន ខ្ពស់ជាងសមតុល្យរូបិយវត្ថុអេឡិចត្រូនិកសរុបដែលបានចេញផ្សាយ។
ទន្ទឹមនេះ ការទូទាត់ឆ្លងដែន ជាមួយបណ្តាប្រទេសក្នុងតំបន់ក៏ត្រូវបានបន្តជំរុញជាលំដាប់។ ជាក់ស្ដែងបន្ទាប់ពីកិច្ចសហការដោយ ជោគជ័យជាមួយធនាគារកណ្ដាលថៃ ធនាគារជាតិនៃកម្ពុជា បាននិងកំពុងបន្តភ្ជាប់ការទូទាត់ឆ្លងដែន ជាមួយធនាគារកណ្តាលឡាវ និងធនាគាររដ្ឋវៀតណាម ដើម្បីសម្រួលការទូទាត់ឆ្លងដែនឱ្យកាន់តែ មានភាពងាយស្រួល រហ័ស សុវត្ថិភាព និងជំរុញបរិយាបន្នហិរញ្ញវត្ថុ៕
Account
Security
Favourite Content