សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ៖ បញ្ញាសិប្បនិម្មិត (AI) បាន និងកំពុងក្លាយជាកម្លាំងចលករជួយជំរុញសេដ្ឋកិច្ចឌីជីថលតាមរយៈការយកមកប្រើប្រាស់នៅក្នុងដំណើរការអាជីវកម្ម និងផលិតកម្មប្រចាំថ្ងៃស្ទើរគ្រប់វិស័យ។
ក្នុងវេទិកាពិភាក្សានៃទិវាជាតិវិទ្យាសាស្ត្រ បច្ចេកវិទ្យា និងនវានុវត្តន៍ ឆ្នាំ២០២៦ លោក អ៊ឹង វីរៈ អគ្គនាយកបន្តវេនរបស់ក្រុមហ៊ុនខ្មែរ ប៊ែវើរីជីស បានលើកឡើងថា បច្ចុប្បន្ន បច្ចេកវិទ្យា និងនវានុវត្តន៍ (Innovation) មានសារៈសំខាន់ដែលត្រូវបានគេយកមកប្រើក្នុងគ្រប់វិស័យ ។ ជាក់ស្ដែង ក្រុមហ៊ុន ជីប ម៉ុង (Chip Mong) និង ខ្មែរ ប៊ែវើរីជីស (Khmer Beverages) បាន និងកំពុងប្រើប្រាស់បច្ចេកវិទ្យា AI យ៉ាងទូលាយនៅក្នុងសង្វាក់ផលិតកម្ម។
លោក អ៊ឹង វីរៈ បានគូសបញ្ជាក់ថា៖ ការប្រើប្រាស់ AI មិនត្រឹមតែក្នុងផ្នែកទីផ្សារ(Marketing) ឬផ្នែកលក់ (Sales) ប៉ុណ្ណោះទេ ប៉ុន្តែថែមទាំងប្រើក្នុងផ្នែកគ្រប់គ្រងផងដែរ។ ការប្រើប្រាស់ឧបករណ៍ AI ជួយឲ្យបុគ្គលិកបង្កើនទិន្នផលការងារ និងជួយសម្រួលដល់ការផលិតវីដេអូ ឬការធ្វើបទបង្ហាញ (Presentations) ឲ្យកាន់តែរហ័ស និងមានគុណភាព។ លោកអគ្គនាយកបន្តវេន បានជំរុញឲ្យបុគ្គលិកចេះប្រើប្រាស់ឧបករណ៍ AI ដើម្បីជួយសម្រួលដល់កិច្ចការងារប្រចាំថ្ងៃ ខនៈដែលក្រុមហ៊ុនបានផ្ដល់ឱកាស និងលើកទឹកចិត្តដល់បុគ្គលិកគ្រប់ផ្នែកឲ្យចេះយកបច្ចេកវិទ្យាមកអនុវត្តដើម្បីបន្តអភិវឌ្ឍក្រុមហ៊ុន និងខ្លួនឯង។
ជាមួយគ្នានេះដែរ លោក Zhao Hongyu អគ្គនាយករងក្រុមហ៊ុន Beijing Electronic Digital Intelligence Technology (BEDI) បានលើកឡើងពីភាពរីកចម្រើនដ៏ឆាប់រហ័ស និងអត្ថប្រយោជន៍ជាក់ស្តែងរបស់ AI ព្រមទាំងឧត្តមានុវត្តន៍ជាអន្តរជាតិ ក្នុងការអភិវឌ្ឍ និងការប្រើប្រាស់បច្ចេកវិទ្យា AI។
លោកបានលើកឡើងថា៖
«យើងបានបង្កើតក្រុមការងារដ៏ខ្លាំងមួយមកពីគ្រប់វិស័យ និងមានបទពិសោធន៍ចម្រុះ។ ក្រុមហ៊ុនមេរបស់យើងជាក្រុមហ៊ុន Semi-conductor ធំបំផុតនៅក្នុងប្រទេសចិន ហើយក្រុមហ៊ុនរបស់យើងផ្ទាល់ គឺជាក្រុមហ៊ុនដែលកំពុងព្យាយាមកសាងមូលដ្ឋានគ្រឹះឌីជីថលសម្រាប់ប្រទេសចិន»។
លោកបានរៀបរាប់ពីរបៀបដែលមាតិកាបង្កើតដោយ AI (AIGC) កំពុងផ្លាស់ប្តូរការធ្វើទីផ្សារ ទេសចរណ៍ និងការអប់រំ ដោយអនុញ្ញាតឱ្យសហគ្រាសធុនតូច និងមធ្យម អាចទាញយកអត្ថប្រយោជន៍ពីបច្ចេកវិទ្យា ដែលពីមុនគឺសម្រាប់តែក្រុមហ៊ុនធំៗ។ ជាមួយគ្នានេះ លោកក៏បានបង្ហាញឧទាហរណ៍ដែលក្រុមការងាររបស់លោក បានជួយឱ្យសហគ្រាសក្នុងស្រុកបង្កើតវីដេអូ ផ្សព្វផ្សាយរាប់ពាន់ ដោយប្រើ AI ត្រឹមតែក្នុងរយៈពេលមួយយប់ ដែលជួយកាត់បន្ថយចំណាយផលិតកម្ម និងពេលវេលាយ៉ាងច្រើនសន្ធឹកសន្ធាប់។
លោក Zhao បានជំរុញឱ្យភាគីពាក់ព័ន្ធនៅកម្ពុជា ចាប់យកដំណោះស្រាយ AI និងបង្កើនកិច្ចសហប្រតិបត្តិការស៊ីជម្រៅក្នុងការកសាងពិភពលោកឌីជីថលជាមួយគ្នា៕
Account
Security
Favourite Content