សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ កិច្ចសន្យាឥណទាន គឺសំដៅទៅលើកិច្ចសន្យាខ្ចីប្រាក់រវាងអតិថិជន និងស្ថាប័នផ្ដល់កម្ចីផ្លូវការដែលរូមមាន ធនាគារ និងមីក្រូហិរញ្ញវត្ថុ។ ជាធម្មតា មុនទទួលបានកម្ចី អតិថិជនមានភាពចាំបាច់ក្នុងការអានកិច្ចសន្យាទាំងនោះ ដើម្បីយល់អំពីដំណើរការក្នុងការដោះស្រាយនៅពេលមានបញ្ហាណាមួយកើតឡើង។
ជាទូទៅ ដោយសារតែកិច្ចសន្យាមានលក្ខខណ្ឌច្រើន និងមានភាពស្មុគស្មាញផង ទើបនាំឱ្យអតិថិជនមួយចំនួនមិនបានយកចិត្តទុកដាក់អានឱ្យល្អិតល្អន់ ដែលនាំឱ្យពួកគេមិនបានដឹងអំពីទំនួលខុសត្រូវរបស់ខ្លួនក្នុងនាមជាអ្នកប្រើប្រាស់កម្ចី។
លោក អ៊ុក កុសល ប្រធាននាយកប្រតិបត្តិច្បាប់ និងប្រតិបត្តិតាមរបស់គ្រឹះស្ថានមីក្រូហិរញ្ញវត្ថុ អេអឹមខេ បានមានប្រសាសន៍ថា កិច្ចសន្យាឥណទានបច្ចុប្បន្ននេះត្រូវបានកែសម្រួលច្រើនហើយដើម្បីឱ្យមានភាពងាយស្រួលសម្រាប់អតិថិជន។ ម្យ៉ាងទៀត គ្រប់ស្ថាប័នផ្ដល់កម្ចីផ្លូវការបច្ចុប្បន្ននេះ គឺប្រើប្រាស់កិច្ចសន្យារឥណទានក្នុងទម្រង់តែមួយដែលកំណត់ដោយធនាគារជាតិនៃកម្ពុជា។
លោកបន្តទៀតថា ដើម្បីបញ្ចៀសបញ្ហាផ្សេងៗដែលអាចកើតឡើង គ្រឹះស្ថានផ្ដល់កម្ចីនីមួយៗតែងមានមន្ត្រីឥណទានដែលជាអ្នកសម្របសម្រួល និងពន្យល់កិច្ចសន្យានោះទៅកាន់អតិថិជន ដើម្បីធានាថាពួកគេបានយល់ច្បាស់អំពីកាតព្វកិច្ច និងទំនួលខុសត្រូវរបស់ខ្លួន។
អ្នកជំនាញរូបនេះ បានលើកជាឧទាហរណ៍ជាក់ស្ដែងថា៖
«ប្រសិនបើអតិថិជននោះស្នើសុំកម្ចីដើម្បីប្រកបអាជីវកម្ម ប៉ុន្តែបែរជាយកកម្ចីនោះទៅចាយវាយដោយមិនបានបង្កើនចំណូល ក៏ស្មើនឹងការធ្វើខុសពីកិច្ចសន្យាផងដែរ ហើយករណីបែបនេះ ស្ថាប័ននីមួយៗមានសិទ្ធិចាត់វិធានការទៅតាមលក្ខខណ្ឌដែលបានចែងនៅក្នុងកិច្ចសន្យា»។
ដូច្នេះ ដើម្បីកុំឱ្យមានការខាតបង់ អ្នកជំនាញរូបនេះបានលើកទឹកចិត្តឱ្យអ្នកប្រើប្រាស់កម្ចីទាំងអស់យកចិត្តទុកដាក់បន្ថែមលើការអានកិច្ចសន្យាឥណទាន ហើយប្រសិនបើមានចំណុចណាដែលមិនយល់គឺអាចទំនាក់ទំនងទៅកាន់គ្រឹះស្ថាននោះផ្ទាល់តែម្ដង៕
Account
Security
Favourite Content