សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ រាជរដ្ឋាភិបាលអាណត្តិទី៧នៃរដ្ឋសភា ក្រោមការដឹកនាំដោយសម្ដេចមហាបវរធិបតី ហ៊ុន ម៉ាណែត ជានាយករដ្ឋមន្ត្រីនៃកម្ពុជា បានផ្ដោតការយកចិត្តទុកដាក់លើការវាស់វែង ចុះបញ្ជី ចេញបណ្ណកម្មសិទ្ធិដីធ្លីជូនប្រជាពលរដ្ឋឱ្យបានចប់សព្វគ្រប់នៅមុនដំណាច់ឆ្នាំ២០៣០ ខណៈដែលបច្ចុប្បន្នក្រុមការងារវាស់វែងដីធ្លីរបស់ក្រសួងរៀបចំដែនដី នគរូបនីយកម្ម និងសំណង់ គិតជាមធ្យមអាចវាស់បានប្រមាណ ១ម៉ឺនប្លង់ក្នុងមួយថ្ងៃ ។
ឯកឧត្តម សាយ សំអាល់ ឧបនាយករដ្ឋមន្ត្រី និងជារដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់បានមានប្រសាសន៍ថា ចាប់តាំងពីខែវិច្ឆិកា ឆ្នាំ២០២៣ រហូតដល់ពេលនេះ ក្រុមការងារចុះវាស់វែងដីធ្លីបានវាស់វែងបានប្រមាណ ២លានក្បាលដី ដោយក្នុងមួយថ្ងៃក្រុមការងារអាចវាស់វែងបានប្រមាណជាមធ្យម ១ម៉ឺនក្បាលដី ។
ឯកឧត្តមបន្តថា ក្រោយពេលវាស់វែងរួចរាល់ ក្រសួងក៏នឹងចុះបញ្ជីក្បាលដីទាំងនោះ ចេញបណ្ណកម្មសិទ្ធិជូនបងប្អូនប្រជាពលរដ្ឋ ហើយការវាស់វែងចុះបញ្ជី និងចេញបណ្ណកម្មសិទ្ធិនេះទៀតសោត អាចនឹងបញ្ចប់វិវាទ ទំនាស់ដីធ្លីបានច្រើនរវាងអ្នកភូមិដែលមានដីនៅជាប់គ្នា ខណៈដែលគណៈកម្មការដោះស្រាយវិវាទដីធ្លីក៏បានធ្វើការងារ និងដោះស្រាយបានច្រើនជូនពលរដ្ឋ ។
ឯកឧត្តមបានបន្ថែមថា កាលពីរយៈពេលប្រមាណ១០ឆ្នាំមុន វិវាទដីធ្លីនៅទូទាំងប្រទេសដែលមិនទាន់បានដោះស្រាយមានរហូតដល់ជាង ២ម៉ឺនករណី ប៉ុន្តែរាជរដ្ឋាភិបាលកាលពីអាណត្តិមុនបានដោះស្រាយអស់ច្រើន ហើយបើគិតមកដល់បច្ចុប្បន្ននេះ គឺនៅសល់តែប្រមាណជាង១ពាន់ករណីប៉ុណ្ណោះដែលមិនទាន់បានដោះស្រាយ និងរំពឹងថាអាចដោះស្រាយបានអស់នៅពេលឆាប់ៗនេះ ។
ឯកឧត្តមបានបញ្ជាក់ថា ៖
« វិវាទដីធ្លីដែលនៅសេសសល់ មិនមែនជាវិវាទដីធ្លីរសើបនោះទេ គឺជាវិវាទតិចតួច ដូចជាទំនាស់ដីរវាងអ្នកភូមិ និងផ្លូវថ្នល់ក្នុងភូមិជាដើម ។ បច្ចុប្បន្ននេះ ក្រសួងរៀបចំដែនដី នគរូបនីយកម្ម និងសំណង់ បានដាក់បញ្ចូលសេវាសាធារណៈរបស់ក្រសួងទៅកាន់ប្រព័ន្ធឌីជីថល ហើយប្រជាពលរដ្ឋ នឹងប្រើប្រាស់សេវានោះកាន់តែងាយស្រួល ដោយមិនចាំបាច់មកកាន់ការិយាល័យទៀតទេ គឺអាចធ្វើប្រតិបត្តិការស្វែងរកសេវានានារបស់ក្រសួងតាមទូរសព្ទ» ។
ឯកឧត្តមឧបនាយករដ្ឋមន្ត្រីបានបន្ថែមថា នៅថ្ងៃខាងមុខនេះ ចំនួនក្បាលដីនៅទូទាំងប្រទេសកម្ពុជាអាចនឹងកើនឡើងដល់១៥លានក្បាលដី ហើយនៅពេលនោះចំណូលដែលបានពីការបង់ពន្ធលើអចលនទ្រព្យ ក៏នឹងក្លាយជាចំណែកមួយជួយដល់ចំណូលរបស់រដ្ឋផងដែរ ។
គួរបញ្ជាក់ថា យោងតាមរបាយការណ៍របស់ក្រសួងរៀបចំដែនដី នគរូបនីយកម្ម និងសំណង់ បានបង្ហាញលទ្ធផលទិន្នន័យក្នុងផែនការ ៧លានក្បាលដីគិតពីខែកញ្ញាឆ្នាំ២០២៣ ដល់ចុងខែមិថុនាឆ្នាំ២០២៤ ក្រសួងវាស់វែងដីបានចំនួន ១៦៤ ៣៤០ក្បាលដី បិទផ្សាយជាសាធារណៈបានចំនួន ៥៣៥ភូមិ ស្មើនឹង ៥៦៤ ១៤៧ក្បាលដី ចេញបណ្ណបានចំនួន ៤៨៣ ១២៣បណ្ណ និងចែកជូនពលរដ្ឋបានចំនួន ៣៧១ ៥៣៣បណ្ណផងដែរ ៕
Account
Security
Favourite Content